1 Piɛr 1

1Min Piɛr, n tie Yiesu Kristo sundu i. N da kadaaɔg ne g tien yinm nba g Yendu lugd’i k i tie u niib, g yad g be Pɔn yen Galasi yen Kapadɔs yen Asi yen Bitini doi n g tie saanm nyan i. 2T Baa Yendu bo lugd’i, nyan wan bo liid g bobn nand nyan i, k u Foŋanm te k i tie u yab, k yin gii cɔln Yiesu Kristo, k u sɔm ń biɛ ŋuul i biid. Yendu ń yad yedŋanm bonciɛnn i po g biɛ te k i yam ń gii dua buga. 3Yendu sann ń do, wano nba tie t Yonmdaan Yiesu Kristo Yendu g biɛ tie u Baa ! Wan yaan jie’ti ninbaaɔg bonciɛnn i, g Yiesu Kristo yiedu po k u guan g mal’ti. Nnyan i, k t ji mɔg dindann yen mɔni, 4g Yendu bil ŋalman polu po g guun’ti. L ŋalman g mɔg k l biil, l g mɔg k l jɔgn, l biɛ g mɔg k l ŋanu po juab. 5Yinm i g Yendu guu’i yen u paalu, k yin dug u po nyan, yin la fielu nba k u bobn g bu ŋɔn’ti yen mɔni dijijuog daal. 6Lann n te k i kpanm yen pamann baa yen yin l cagn mɔlane yen bigna nba kul. L bual k lan baal’i nnyan i, l yen kan wai. 7L bigna tie k ban diid g liɛ i dug Yendu po yen mɔni ii ? Diid man wula nba kan gii tund g be, niib yen tu tug g donn muu n ninŋ k ban diid g liɛ l ŋan ii ? Lann, yin dug Yendu po nyan, l tie bonmɔnn g cie wula. I gii dug g nyiɛ bigna n ninŋ, l ji bu baal yen dondl yen yudand yen sel i i po, youg nba g Yiesu Kristo tan bu legd. 8I g ban g la wano Yiesu, g yen bua’ɔg, g biɛ g nyuan’o mɔlane, g yen dug u po g kpanm yen pamann nba g nil kan fid g ŋɔn yen lanbona. 9G dugn i laad yin dug Yendu po g guu yal nba i: lan tie i fielu. 10L fielu po i g Yendu sogni‑nba bo kpaan g bual bual k ban bann. B bo liid g maad g Yendu bu te’i l ŋalbalg. 11Kristo Fuom nba bo be b ninŋ bo tuod g maad’b g Kristo bu la fala, g biɛ ŋɔn’m yudand nba bu baal l puol po, k b mɔ ji kpaan k ban bann yaa youg nba yen yal nba bo bu te k lan tien. 12Yendu bo maad u sogni‑nba g maam nba k u tie’b k ban maad nyan, g tie banm mɔno yaa yal kaa, k l tie i yaa yal i. L maam i, g yab muand Laabamann nyan, ji muand’i mɔlane Foŋanm paalu po. L Foŋanm i, g Yendu bo sun’o k u nyiɛ polu g jiid. Malɛg‑nba mɔno bua k ban gbad maam nba k b muand’i nyan niimn. 13L yaa po, bobn man gii guu, gii daan yen i pal kul k i tan bu la ŋalbalg daal nba g Yiesu Kristo tan bu legd. 14Nyan yin tie niib nba cɔln Yendu nyan, ji daa mɔg man niɛnŋ nba k i bo tu mɔg siɛnyoug k l g ŋan nyan, niɛnŋ nba k i bo tu mɔg youg nba k i daa bo be yanbɔnm n ninŋ nyan. 15Ama i binbem n ninŋ kul, yin gii tie niib nba ŋan canyiin, nyan Yendu nba yiin’i n ŋan nand nyan. 16G dugn Yendu n maad yal u kadaaɔg n ninŋ n ne: « N binbem n ŋan nyan, i mɔ yaa binbem ń gii ŋan. » 17I jaandi n ninŋ, i yi Yendu k i Baa i, wano yua nba bu nil kul nyan u tuona n tie nand nyan, g g mɔg lugdm. Lann, yin daa mɔg miɛl g be tinŋ n ninŋ ne, yin ŋɔn i binbem n ninŋ, k i cɔlm’o. 18Yinm mɔno ban k i baa‑nba n bo luan’i binbem nba k l g mɔg niimn nyan, g Yendu nyan’i l n ninŋ o. U g tug bona nba biid nyan wula lann i kaa nyan ligli nyan kaa g pa g nyan’i, 19ama u tug Kristo sɔm nba cie bonn kul i, g fiel’i, wano nba te nyan pebig nba ŋan g dagd nyan. 20Yendu bo tuod g lugd’o g sua g ŋanduna daa g tag, g te k u baal dijijuog dani ne ninŋ i po. 21Wano n te k i dug Yendu po, yua nba yied’o kpienm siign ninŋ, g tie’og yudand nyan. L po n te k i dug Yendu po g ji daan wan puon’i yal. 22Yin cɔln mamɔni ne n te k i nyiɛ biid n, k yin fid gii bua i lieb Kristo‑yab yen mɔni. Lann, yin gii bua man i lieb yen i pal kul youg ń tuu youg. 23I ban g Yendu n guan g mal’i. Nnyan, i ji tie yua nba kan ban g kpe yaa bid i. Ama yab nba kpenn nyan t baa‑nba nyan nuan, i ji g tie b yaa bid. Yendu maam nba tien miɛl g biɛ g lebd nyan paalu po i k i mal. 24G dugn l diɛn g maad: « Nifosaal kul tie nyan muaɔg nyan i, k u yudand tie nyan mɔpuug nyan. Muaɔg kuod, k l puug suod g baa, 25ama Yonmdaan maam nuan be i, youg kul. » L maam n tie Laabamann nba k b muand’i.

will be added

X\