1 Korɛnt Kristo-yab 9

1N g yen n kua aa ? N g tie Yiesu sundu kaa aa ? N bo g la t Yonmdaan Yiesu ii ? Yinm kaa tie min sun t Yonmdaan po g la yab ii ? 2Baa siɛb gii g nyuan k n tie Yiesu sundu mɔno, i yaa po n l tie i, g dugn yin yaan te Kristo‑yab nyan mɔno n ŋɔn k n sun n sundu tuonn Yonmdaan po. 3Yab nba kɔn yen’n nyan, min bu jiin’m yal nba n ne: 4T g mɔg yiko yen tin di g nyu g dugn tuonn nba k t suun po ii ? 5T g mɔg yiko yen tin mɔ ń tug puo nba tie Kristo‑yua t tu gii saa naan tin gii diɛ’og nyan Yiesu sundlieb yen Yonmdaan ninjanm yen Kefas n tie nand nyan ii ? 6Bii min yen Barnabas kukua i k l tie mabl k tin gii suun g laad t jied ii ? 7Sijelano n baa suun u tuonn g g gaan ŋmaapaaɔg u ? Bii ŋmaa n baa ŋuund dimɔunŋ tiidi u, g yen g mua l luana i ? Bii ŋmaa n baa kpaa bonkobd o, g yen ji g nyu b biim i ? 8Min maad yal ne tie nifosaal maalm kua yaa aa ? Moyis kadaaɔg n yiko g maad lann kaa nyan ii ? 9Yen mɔni, l kon diɛn Moyis yiko kadaaɔg n g maad: « Naab nba tod’a k a pua a dii, a kan lol u mɔb ». Yendu bo fabn nai po yaa aa ? 10U bo g maad tinm kaa aa ? Yen mɔni nuan, l bo diɛn t yaa po i. L bual g yua nba ko tanmɔnn ń gii daan, yua nba pua dii mɔ ń gii daan g sua kul mɔg u biinu wan suun tuonn nba nyan ninŋ. 11Tin bo tie’i ŋalman, k l tie Foŋanm yal nyan, lann l g dagd yen tin mɔ ń ji gaal i buol ŋalman nba tie nifosaal yal ii ? 12Lieb gii mɔg yiko yen ban gaal todl i buol, tinm kaa ŋanm g mɔg l yiko ii ? G nyaan tinm yen g tug t yiko g sun yen tuonn, t tuo g gaal falabuolu kul, k l maa t bo g bua Kristo Laabamann ń guan puol. 13I g ban g yab nba suun jaanddeciɛɔnŋ n ninŋ tuonn, k b jied nya l jaanddeciɛɔnŋ n ii, g yab nba suun salg binbindl buol mɔ yaa biinu nya salg nba k b yid nyan n ninŋ ii ? 14L tie nnyan i g Yonmdaan tie mɔb, g yab nba muand Laabamann mɔ ń gii di Laabamann muandu po. 15Ama min yen g tug l yiko kul baa yenn g sun yen tuonn. Min biɛ da kadaaɔg nba ne mɔ, l g tie k n ji bua siɛl kaa. N gii kpe lann n su yen nil ń te min luol min pua jipaad yal nba po. 16N kan fid gii pua jipaad Laabamann muandu po, g dugn l tie niinn i n po. N gii g muand Laabamann nuan, fala tie n yal i. 17Min mɔno n bo gii tagd n yam n ninŋ k n sun l tuonn, n bo bu fid g gaal paaɔg l po, ama lan tie niinn n po nyan, n suun lan bual k n sun yal nba i. 18Lann, n nyuad tie bɛ i ? L tie k min gii muand Laabamann fam i, g daa gaan min mɔg yiko yen k n gaal yal nba l Laabamann muandu po. 19Min n yen n kua, sua g yen’n. Ama n yen tug n kua g tien niib kul yonm i, k n fid g gɔgl niib bonciɛnn k ban te Kristo‑yab. 20N gii be yen Suif‑nba, n tu tien nyan banm nyan i, k min fid g gɔgl Suif‑nba k ban te Kristo‑yab. N gii be yen yab nba g Moyis yiko mɔg nuu b po, n tu tien nyan banm nyan i, g Moyis yiko yen g mɔg nuu n yaa po. N tie nnyan k n fid g gɔgl b mɔ i. 21Yab nba g ban Moyis yiko mɔ, n be yen’m nyan n mɔ g ban l yiko nyan i, l g tie k n g cɔln Yendu mɔmaam kaa, n cɔln Kristo mɔmaam. N tie nnyan k n fid g gɔgl b mɔ i. 22Yab nba k b dindann daa g paag mɔ, n be yen’m nyan ban be nand nyan i, k n gɔgl’b k ban te Kristo‑yab. N tug n kua g cab, g tien bonn kul b kul po, g gbaa yal kul k n fiel b ninŋ baa siɛb. 23N tie l kul ne Laabamann po i, k n mɔ ń do nyuad l po. 24I g ban g niib gii bign nantaal, k b kul siɛn, g yend kua n tu di g gaal paadi ii ? Lann, i siɛn man nand nba k i bu gaal paadi. 25Yua nba mɔg nantaal bignn kul, u tu suol u kua bona bonciɛnn n ninŋ i. B tie nnyan k ban gaal bignn paadi i, k l paadi yen kan wai. Tinm nuan yen tie nnyan g kpaan paadi nba kan ban g dud i. 26L po n te k min siɛn, ama n yen g bund g gbiɛ k n siɛn kaa. N pua cedi, ama n yen g bund g gbiɛ k n fuund kaa. 27N mabnd n gbanu bonciɛnn, g diɛ’ɔg yen ninmɔnn, k min tan daa muand lieb Laabamann g gbenn o, g yuand g luol n yaa yiɛl i.

will be added

X\