1 Korɛnt Kristo-yab 7

1T ji diid man yin daan diɛn kadaaɔg g bual’n yal nba po. L ŋan g jua ń daa nagd puo. 2Ama cunconm n yaan yabd nyan, l bual g jua kul ń gii mɔg u ŋaapuo i, g puo kul mɔ ń gii mɔg u sal. 3Puojua kul ń tu te u ŋaapuo, puo n bua yal nba jua buol, puo mɔ ń tu te u sal jua n bua yal nba puo buol. 4Puo kaa yen wano mɔno gbannand, u sal n yen. Jua mɔ kaa yen wano mɔno gbannand, u ŋaapuo n yen. 5Yend ń daa yie g bel lua k b kan taan dinduanu. L gii g tie k i bua n jaand i kaa, g taan mɔb g daa paad yen lieb waam. Ama jaandi po gii pend, yin guan gii be yen lieb g daa ŋaa g Sitaan ń la sɔnu g bign’i g dugn yin yaan g so i kua nyan po. 6Min maad’i yal ne g tie mabl kaa, n cab’i mɔb i, k i bu fid g tien nnyan. 7N bo sun g niib kul ń gii tie nyan min nyan i. Ama nil kul yen gaal u yul po paab i Yendu buol. Sua be k u pii’ug paab ne, lua mɔ k u pii’ug liel ne. 8Min bu maad jikpaga yen pekɔa po yal nba n ne: B gii bu fid gii be nnyan, nyan min mɔno min be jikpagd nand ne, lann n baa su b po. 9Ama b gii kan fid g suol b kua, jab gii kuan puob, g puob mɔ kun jab, lann n su yen ban gii be b kua g jab yen niɛn puob, g puob mɔ niɛn jab. 10Yab nba kuan lieb mɔ, min bu te’b mɔbonn nba n ne, l g nyiɛ n buol kaa, Yonmdaan n yed g: Puo ń daa nya g ŋaa u sal. 11Ama u gii nyiɛ g ŋaa u sal, wan yen ji daa kun jafan, lann i kaa wan yen guan g manŋ yen u sal. Jua mɔ ń daa nyanŋ u ŋaapuo. 12Yab nba tenn, min bu maad’b yal n ne, lann ji g nyiɛ Yonmdaan buol kaa, min n maad: Kristo‑yua gii mɔg puo, k l puo g tie Kristo‑yua g yen tuo g baa be yen’o, wan daa nyan l puo. 13Kristo‑yua nba tie puo mɔ gii mɔg sal k u g tie Kristo‑yua, g yen tuo g baa be yen’o, wan mɔ ń daa nya g ŋaa u sal. 14K l maa jua nba g tie Kristo‑yua nyan mɔ ji nagn Yendu n nyan, g dugn u ŋaapuo po. G puo nba g tie Kristo‑yua mɔ ji nagn Yendu n nyan, g dugn u sal po. L bo gii g tie nnyan, b bid bo baa tie nyan b tie jɔgnd bid nyan i Yendu nunŋ n, k l yen g tie nnyan ; b ŋan g dagd Yendu po. 15Ama yua nba g tie Kristo‑yua gii yie k b bu yad lieb, ban ŋaa’ɔg wan gii saa. L youg, yua tenn g tie Kristo‑yua nyan gii tie jua ii, u gii tie puo ii, siɛl yaa mabl ji g be u po. Yendu yiin’i k yin gii be k l man i. 16K l maa fin puo, a bu fiel a sal ii, a kan fiel’o oo, a daa g ban. K fin jua i, a bu fiel a ŋaapuo oo, a kan fiel’o oo, a daa g ban. 17Lan nyan min maad yal ne o, nil kul ń gii be binbem nba ninŋ g Yonmdaan cab’o k wan gii be. Yendu n bo yiin yua kul g sua k u be binbem nba ninŋ nyan, wan gii be nnyan. N tien l mɔbonn i, Kristo‑yab tintaancaga kul n ninŋ. 18Yendu bo gii yiin nil g sua k u kɔnd, wan daa kpaan k wan piin kɔnd banm u po. Yendu bo gii yiin nil g sua k u daa g kɔnd mɔ, wan ji daa kpaan k wan kɔnd. 19Kɔnd g tie siɛl, yua g kɔnd mɔ, l biɛ g pugd siɛl. Yal nba tie bonmɔnn tie g nil ń cɔln Yendu Mɔmaam i. 20Nil kul ń gii be wan bo be nand g Yendu yiin’o. 21A bo gii tie yonm i, g Yendu yiin’a, ŋan daa bual. Ama a gii la sɔnu g bu fid g nya yonmd n ninŋ, ŋan nya. 22G dugn nil nba g Yonmdaan yiin’o g sua k u tie yonm, Yonmdaan nyan wano yonmd n ninŋ n nyan. Yua nba k u bo yiin’o g sua k u g tie yonm mɔ, u ji te Kristo yonm n nyan. 23U pa i po i, g nyan’i yonmd n, lann ji daa te man niib yonmi. 24N naataani, sua kul ń gii be yen Yendu, nyan Yendu n bo yiin’o g sua k u be nand nyan. 25Mɔlane, n ji bua n maad yab nba daa g kuan lieb po i. Yonmdaan g tie’n u mɔbonn l po. Ama Yonmdaan n diid’n yen nunmanŋ, g te k n tie yua dagd yen ban gii dug u po nyan, n bu fid g maad min mali yal l po. 26N mali k tin be yaa youg nba ne n yaan ji biɛ nyan, l ŋan g nil kul ń gii be wan tu be nand i. 27A gii mɔg puo, ŋan daa kpaan k a nyan’o. A gii g mɔg puo mɔ ŋan ji daa kpaan k a kuan puo. 28Ama a yen gii kuan puo, a g tien biid kaa. Sipaan mɔ gii kun jua, u mɔ biɛ g tien biid kaa. G nyaan yab nba kuan lieb yen bu la fala nuan bonciɛnn binbem ne ninŋ. Min bo bua k i lɔgl l fala i. 29N naataani, min bua n maad yal nba n ne: Youg pel o. Lan cil mɔlane gii saa, yab nba mɔg puob ń ji gii be nyan b g mɔg puob nyan. 30Yab nba buud ń tien nyan b g buud nyan, yab nba kpanm ń tien nyan b g kpanm nyan, yab nba daa bona ń tien nyan ban daa yal nba g tie b yal nyan. 31Yab nba do nyuad ŋanduna ne po ń gii tie nyan b g do siɛl yaa nyuad nyan. G dugn ŋanduna ne n ji tie nand ne, u kan wai yen wan pend. 32N g bua yin gii mɔg siɛl yaa yanbani. Yua nba g mɔg puo, u mali wan bu tien nand g sun Yonmdaan tuona i, u kpaan k wan manŋ Yonmdaan pal i. 33Ama yua nba mɔg puo nuan mali ŋanduna ne bona po i. U kpaan k wan manŋ u ŋaapuo pal i. 34U maalm ji bɔgd munle i. Puo nba g mɔg jua, lann i kaa sipaan nba daa g kun jua mɔ mali Yonmdaan tuona po, g bua k wan tug u maalm yen u munn kul g cab Yonmdaan. Ama puo nba mɔg sal nuan mali ŋanduna ne bona po i, g kpaan k wan manŋ u sal pal. 35N maad nnyan k lan ŋanm yinm i. N g bua n kuan’i mabl n ninŋ kaa, n bua k yin gii be binbem nba ŋan g dagd i, g tug i kua g cab Yonmdaan yen payenn. 36Yua nba mɔg sikpenŋ, g diid g sua k wan niɛn’o nand nyan, u kan fid g suol u kua g cɔln l sikpenŋ, g mali k l dagd yen ban kuan lieb, b bu fid g kuan lieb nyan wan bua nand nyan. U g tien biid kaa. 37Ama yua nba jag g suol u pal n ninŋ, g siɛl yaa mabl g be l n ninŋ, k l tie u yanbuam i k u yed k u kan kuan u sikpenŋ, l ŋan. 38Lann, yua nba kuan u sikpenŋ, u ŋanm i, ama yua nba g kuan u sikpenŋ yal n be liig. 39Puo sal daa gii be g mɔg miɛl i, k u tie u sal. U gii kpe nuan, puo bu fid g guan g kun wan bua yua nba, ama l bual k l daan ń gii tie Kristo‑yua i. 40G nyaan, n yaa maalm n ninŋ, u yen bo gii be nnyan g g guan g kun jua i k u bo bu ŋanm gii be pamann n ninŋ. Min mali yal n nyan, g mali k n mɔ mɔg Yendu Foŋanm.

will be added

X\