1 Korɛnt Kristo-yab 6

1L tien nle i k i ninŋ yend tu mɔg maam yen u lua g tug’o g gad yen’o buuddanm nba g tie Kristo‑yab buol, g kan ŋaa k u Kristo‑yab lieb kaa ń ŋanm l maam i ? L g mɔg’i fai ii ? 2I g ban g Kristo‑yab n tan bu jiɛl ŋanduna ne yab buud ii ? K l gii tie k i tan bu jiɛl ŋanduna yab buud, i kan fid g bu mabid-bid nba baad’i ne buud ii ? 3I g ban k t tan bu jiɛl malɛg‑nba buud ii ? K t binbem ne ninŋ mabid-bid nba baad’ti ni k t ji bu gbal l buud jiɛlu uu ? 4K l mabid-bid gii baal i binbem n ninŋ i, n tua i tu tug yab nba g tie siɛl Kristo tintaanu n ninŋ i, k ban jiɛl l buud a ? 5L tie i fai i, min n maad’i. Lann, i ninŋ sua g be k u yam fo k u bu fid g jiɛl buud yinm nba taan g tie ninjann ne siign ninŋ ii ? 6Ama i ŋaa lann yo, g Kristo‑yua tu fil u ninja g gad yen’o buuddanm nba g tie Kristo‑yab buol. 7Lan yaan l tie yal nba kul, yin bu yen i lieb nyan, l ŋɔn k i ji l kpiɛd sɔnu n nyan. L bo g dagd k i tuo g nil ń biil’i nii ? L bo g dagd k i ŋaa g nil ń di’i nii ? 8K yinm mɔno biɛ ji gɔ g tie i lieb yal nba g ŋan, g di’b k b yen tie i ninjanm Kristo‑yab i. 9I g ban g biiddanm g mɔg yiɛl Yendu diem n ninŋ ii ? Daa bɔnd man i kua, yab nba conm, yab nba pad pada, jab nba dua yen puob k l g tie b ŋaapuob, puob nba dua yen jab k l g tie b salb, jab nba dua yen b jalieb, 10naayiga, tubondanm, dinyuyukpiena, ŋalaacidanm yen yab nba fe lieb bona, b kul ne, baa sua kan kua Yendu diem n ninŋ. 11I ninŋ, siɛb mɔ bo tie nnyan i. Ama Yendu ŋuul i biid kul, g te k i ji tie u kukua yaa yab, g tie nimɔnm u nunŋ n, Yonmdaan Yiesu Kristo sann po yen t Yendu Foŋanm po. 12« Siɛl g be g tie kual n po », ama bonn kul kaa tie bonŋann. « Siɛl g be g tie kual n po », ama min yen kan ŋaa siɛl ń gii diɛ’n nyan n tie dansalg nyan. 13« Jied be puol po i, g puol mɔ be jied po », Yendu yen bu biɛn l ŋanle kul o. Ama gbannand nuan g be cunconm po kaa, l be Yonmdaan po i, Yonmdaan n yen t gbannand. 14Yendu n yaan yied t Yonmdaan nyan, u bu yied t mɔ u paalu po. 15I g ban k i gbannand tie Kristo gbannand bɔga aa ? K nnyan i, n bu tug Kristo gbannand bɔgl k lan te cunconn gbannand bɔgl ii ? Palb, lann kan tien. 16Bii i g ban g yua nba yen cunconn taan lieb, wano yen l cunconn ji tu taan gii tie gbannanyend ii ? G dugn l diɛn Yendu Kadaaɔg n g maad: « Banm banle ji bu taan gii tie gbannanyend i ». 17Ama yua nba taan yen Yonmdaan nuan, wano yen Yonmdaan n bu taan gii mɔg yanyenm. 18Lɔgl man cunconm. Biid nba g nil tie kul, l g tie u gbannand yal kaa, ama yua nba tie cunconm nuan, u gɔ g biid wano mɔno yaa gbannand i. 19I g ban k i gbannand tie Foŋanm ŋaag ii ? Foŋanm nba g Yendu tie’i nyan be i ninŋ i. I g ban k i ji g yen i kua aa ? 20Yendu n pa i po g yend’i. Lann, tug man i gbannand g sun tuonn nba bu don Yendu sann.

will be added

X\