1 Korɛnt Kristo-yab 5

1Niib yad g maad kaannaa kul k i ninŋ siɛb suun cuncontuona, cuncontuona nba bi hal bonciɛnn, g yab nba g tie Kristo‑yab mɔno kan sun. N gbad k i ninŋ yend diɛ u baa puo g dua yen’o ! 2Yen l kul k i biɛ pua jipaad ii ? L bo g dagd k i pala ń biil l po, k yin bel g yaan yua nba suun l tuonn nyan i siign ii ? 3Min nuan, yen min l be banfagl nand kul, n maalm yen be yen’i. Min tuod g jiɛl yua nba sun l tuonn buud nyan n be i siign nyan i. 4I gii taan lieb Yonmdaan Yiesu sann po, n mɔ baa be yen’i n maalm n ninŋ, k t Yonmdaan Yiesu paalu mɔ be yen’ti, 5yin tug l daan g cab’o Sitaan, k wan biil u gbannand, g Yonmdaan guanu daal wan la fielu. 6Jipaad nba k i pua nyan g ŋan. I g ban g dibina waam nne n tu te g kpanu yom kul ń fid ii ? 7Biid tie nyan dibina nyan i. Tuod g nyan man l dibina i ninŋ, g ji gii tie nyan kpanu yom nba k b buun g g tien dibina nyan. I yen l tie nnyan i yen mɔni. G dugn b kpii Kristo, yua nba tie t Fielu jaanm pebig o. 8Lann, t di man t jaanm, k lan ji daa tie k t mɔg tonu g biɛ suun cuncontuona kaa: lann nuan tie nyan kpanu nba k b tien yen dibina nyan i. Ama tin di yen papienn yen mamɔni: lann n tie nyan kpanu nba k b g tien yen dibina nyan. 9Min daan kpiɛ g diɛn’i kadaaɔg nba, n daan maad’i mii yin daa taand yen cuncona baa siɛl n ninŋ. 10N daan g maad nnyan g nyuan niib nba l yad g be ŋanduna n ninŋ g suun cuncontuona, yab nba mɔg tubonm, yab nba fe lieb bona yen yab nba pad pada kul kaa. L gii tie k i bu lɔgl b kul ne, lann i yen bu nya ŋanduna n ninŋ saa ! 11N daan maad g nyuan yua nba yi u kua Kristo‑yua o, g biɛ yen conm, g mɔg tubonm, g pad pada, g ci ŋalaaci lieb po, g tie dinyuul, lann i kaa g tie naayig nyan i. Baa yin daa taand g di jied mɔno yen l daan. 12L la’n lɛ i k n mɔ tan ja yab nba g tie Kristo‑yab buud i ? L g bual k yin gii ja yab nba tie Kristo‑yab yaa buud kaa aa ? 13Yab tenn nuan, Yendu n bu jiɛl b buud. Nyan Yendu Kadaaɔg n maad nyan: « Nyan man nibiiug i siign ninŋ ».

will be added

X\