1 Korɛnt Kristo-yab 4

1Lann, nil kul ń gii diɛ k t tie Kristo tuonsunna i, k t tie yab nba k b cab’b k ban gii ŋɔnŋ niib Yendu ŋasiil i. 2B gii bil nil tuonn mɔ, l tie k wan ŋanm g sun yen papienn i. 3Min nuan, yinm n gii jalg’n ii, nifanm n gii jalg’n nyan nifosaal n tu jalg u lua nand nyan ii, n baga g be. Min mɔno yen g jalg n kua. 4N ban k n tug n ninŋ pien, ama lann kaa ŋɔnŋ k n g mɔg biid. Yonmdaan n tie yua nba n ja min yaa buud. 5Lann, daa tu gbaa g jiɛl man sua buud g daal daa g pund. Guul man g Yonmdaan ń baal. Wano n bu dɔgd yal nba wuo bunbɔnn n ninŋ, g ŋɔn maalm nba be niib pala n ninŋ. L youg u, g yua kul bu gaal wan dagd yen pinpagd nba Yendu buol. 6N naataani, n tug maninnaɔnŋ min yen Apolɔs po k yin gbad niimn i, k yin la t buol g bann g sua kan fid g kand diɛni n yed yal nba po gii pua jipaad k wano bua u ne i, u g bua u ne. 7Ŋmaa yed k fin cie lieb i ? A mɔg bɛ i g Yendu kaa tie’a nii ? K b gii tie’a nii, bɛ po i k a yen ji pua jipaad nyan b g tie’a kaa nyan i ? 8Yinm la yin bua yal nba kul o ! I ji tie ŋalmandanm i ! I dii bal g ŋaa’ti no! Man ne k i ji l tie batieb i yen mɔni, t mɔ bo kan taan yen’i gii tie batieb kaa aa ? 9L naan g Yendu te k tinm Yiesu sundi n ji l juod. T tie nyan niib nba k b jiɛl b buud k l tie k ban kpi’b niwulug nunŋ n nyan i. Ŋanduna n ninŋ, niib kul laa’ti, malɛg‑nba laa’ti nii, g niib mɔ biɛ laa’ti. 10Tinm tie waadb i, g dugn Kristo po. K yinm ceg g dugn yin be yen’o po. Tinm tie tali i, k yinm tie paalb. Niib cɔln yinm, g nyaan g yen nund tinm. 11Saa yen mɔlane, tinm biɛ daa l be yen kom yen nyunnyuglu i, g g mɔg tiɛd, k b puag’ti, k t waa g g mɔg ŋai. 12Tinm biɛ daa l cagn g suun tuonn yen t nui i g di. Yab sugd’ti, t tu gaal’b mɔgaalŋani i, yab cagn’ti tin juun g gaal l cicagm. 13Yab nba jond t po, t tu jiin’m yen yanfomaam i. Saa yen mɔlane, niib daa l nyuan tinm k t tie ŋanduna ne tinbenmuad i. B yaa po t tie ŋanduna ne jɔgnd i. 14N g da’i nne k min kuan’i fai kaa, n bua n te’i cegli i, g dugn i tie nyan n bid nyan i, k n bua’i bonciɛnn. 15Yen mɔni, baa i gii mɔg tundkaab tuda piig mɔno k b ŋmagd’i Kristo sɔnu n ninŋ, baa‑nba nuan, i kan fid gii mɔg’b k b yab. Yiesu Kristo ŋuanu n ninŋ, min nba baal yen Laabamann i buol nyan, min n mal’i. 16Lann, n balm’i, i togd man n binbem. 17L po n te k n sun Timote i buol. U suun t Yonmdaan tuonn lan bual nand k n bua’ɔg nyan n big nyan. U bu guan g tiɛd’i min yaan ŋua Yiesu Kristo g be nand. N biɛ tund lann i kaannaa kul, Kristo‑yab tintaancaga kul n ninŋ. 18I ninŋ siɛb ji daan mali k n kan baal i buol i, g ji pua jipaad. 19Ama Yendu gii bua, l ji kan wai yen k n baal i buol. Lann i k n bu bann l jipaadanm n pua mɔb g maad yal nba yen ban bu fid g tien yal nba. 20G dugn, Yendu diem g tie nil n pua mɔb g maad yal nba kaa, l tie wan bu fid g tien yal nba i. 21I bua bɛ i ? N baal i buol yen lanbann ii ? Bii i bua k n baal yen buam yen pasɔnŋl i?

will be added

X\