1 Korɛnt Kristo-yab 15

1N naataani, n bua n tiɛd’i Laabamann nba k n bo muand’i k i gaal, g tug i dindann kul g tien l n ninŋ nyan i. 2L Laabamann n bu te yin la fielu, l gii sua k i l ŋanm g diɛ’l nyan min bo muand’i nand nyan, ama l gii g tie nnyan nuan, i dindann tie fam i. 3Min cind g luan’i yal nba k l tie bonmɔnn canyiin tie min mɔno n bo gaal yal nba i, lan tie g Kristo kpe t biid po nyan lan bo diɛn Yendu Kadaaɔg n nand nyan, 4k b pii’ug, g daa ŋantaa daal k u yied nyan lan bo diɛn Yendu Kadaaɔg n nand nyan, 5k u dɔgd g Kefas la’ɔg, k u sundi piig yen banle mɔ biɛ la’ɔg. 6L puol po k u dɔgd k u ŋuantieb nba cie niib kobiinmu taan g la’ɔg, b ninŋ bonciɛnn daa be g fo, g nyaan siɛb mɔ kpe o. 7K l po pend, k u dɔgd g Saak la’ɔg, k u sundi kul mɔ yuand g la’ɔg. 8B kul ne po pend yo, k u dɔgd k min nba tie nyan b bo mal’n g daal g pund nyan mɔ ji tan juod g la’ɔg. 9G dugn Yiesu sundi n ninŋ, min n ji l ŋanm g juod, min taan bo g dagd yen ban yiin’n u sundu mɔno, k l maa n ŋɔn Yendu tintaanu niib fala. 10Ama Yendu ŋalbalg po n te k n tie min tie yua nba dinne, l ŋalbalg g te fam, l tod’n mɔno k n sun g cie b kul. Min kaa sun, Yendu ŋalbalg nba be yen’n nyan n sun tuonn. 11Lann, l gii tie min ii, l gii tie banm ii, tin muand yal nba n nyan. I mɔ biɛ bo tuo g gaal lann i. 12Lann, tin muand g Kristo yied kpienm siign nyan, l tien nle i k i ninŋ siɛb biɛ tua g kpienm tan kan yied i ? 13L gii tie g kpienm tan kan yied, lann Kristo mɔ bo g yied. 14Kristo gii g yied, lann tin muand yal nba tie fam i, i dindann mɔ biɛ tie fam i. 15L taan cie nnyan mɔno, l gii tie mɔni g kpienm tan kan yied, l ŋɔn k t ci ŋalaaci Yendu po n nyan, g dugn t yed k tinm tie sieda‑nba k u yied Kristo, k u yen g yied’o. 16L kon gii tie mɔni g kpienm tan kan yied nuan, lann Kristo mɔ bo g yied. 17Kristo gii g yied, lann i dindann tie fam i, i biɛ daa be i biid n ninŋ i. 18L biɛ ŋɔnŋ g yab nba bo dug Kristo po o g kpe nyan biɛl fam n nyan. 19L gii tie t binbem tinŋ ne po kukua i k t daan Kristo n ninŋ, lann t bonn n ŋanm g mɔg ninbaaɔg g cie niib kul. 20Ama yen mɔni, Kristo yied kpienm siign, wano n tie yua nba kpiɛ g yied, k l ŋɔnŋ g kpienm mɔ tan bu yied. 21G dugn nil n baal yen kuum, nil n biɛ baal yen kpienm yiedu mɔ. 22Nyan niib kul n kpenn g dugn Adam po nyan, nnyan i g niib kul mɔ bu yied g dugn Kristo po. 23Ama l mɔg yua lii g yua tua i. Kristo n cind g yied, u tan gii guan yaa youg, Kristo‑yab ń tuan. 24L po gii pend juodu youg ń baal. L youg u g Kristo bu tug bal g ŋmiɛn u Baa Yendu, g sua k u paad batieb kul yen yikodanm kul yen yal nba l mɔg paalu kul o. 25K l maa l bual g Kristo ń gii diɛ bal saa yen youg nba g Yendu bu te wan ŋmaa u ninnanda kul po i. 26Wan bu juod g gbenn ninnand nba maam n tie kuum. 27L kon diɛn Yendu Kadaaɔg n g maad: « Yendu te k u mɔg nuu bonn kul po ». Ama lan maad k « u ji mɔg nuu bonn kul po » nyan, Yendu nuan g be kul ŋann n ninŋ, g dugn wano n te g Kristo mɔg nuu bonn kul po. 28Bonn kul tan gii be Kristo nuu n ninŋ yaa youg u, k wano Kristo nba tie Yendu Bija mɔ ji bu tug u kua g tien Yendu nuu n ninŋ, wano nba tie’og nuu bonn kul po, g Yendu kukua ń ji gii mɔg nuu bonn kul po. 29L gii g tie nnyan, yab nba k b wuul’b nyum kpienm po nyan tan bu tien nle ? L gii tie g kpienm kan yied palb, bɛ po i k b yen ji wuul nyum b po i ? 30K tinm mɔno i, bɛ po i k t suun daal kul tuonn nba bu fid g baal yen t kuum i ? 31N naataani, yinm nba k n bu fid gii pua jipaad i po g dugn yin be yen t Yonmdaan Yiesu Kristo nyan, n pol g tie’i g daal kul, n l togd kuum i. 32L gii sua k l tie nifosaal n nyuan bona nand kukua po i, k n bo kɔn yen bonkobbiid Efɛs doug n, n liɛ n nyuad i ? Kpienm gii kan yied nuan, lann « tin gii di g nyu, gii ban g wonn t won bu kpe ». 33Daa bɔnd man i kua, « yua nba yegd yen nibiid n mɔg tɔgbiiug. » 34Ŋaa man k i yam ń guan lan bual nand, k i ji ŋaa biid tienu. G dugn i ninŋ siɛb g ban Yendu, l tie i fai i k n maad’i. 35Ama sua bu fid g bual g kpienm tan bu yied nle i ? K b tan bu guan yen gbannanland i ? 36A g mɔg yam, ŋan bul yal nba gii g bed, l kan pa. 37Ŋan buul yal nba, yen yal nba bu pa g do, l g naan. Fin nuan tu bul dibim lann i kaa siɛl yaa bonbinn kua i. 38G nyaan Yendu n ji tu te lan pa gii naan wan bua nand, bonbinn kul yen u ninnaɔnŋ. 39Gbannand g taa taa buolu, niib yal be l kua, g bonkobd yal be l kua, g nuani yal be l kua, g jani yal mɔ be l kua. 40Bona be polu po g mɔg b ninnaɔnŋ, g bona be tinŋ n g mɔg b ninnaɔnŋ. Polu po bona n nyili nand yen tinŋ n yal n nyili nand l g taa. 41Yendu n nyili nand yen ŋmaalg n nyili nand yen ŋmaabid n nyili nand, l g taa taa. Ŋmaabiyenŋ nyilgu yen ŋmaabilieg yal mɔ biɛ g taa. 42L tan baa tie nnyan i kpienm yiedu youg mɔ. Gbannand nba k b pii k l tie bonbedkal tan bu yied g ji kan ban g bed. 43Gbannand nba k b pii k l g mɔg nyuandu palb bu yied g ji gii nyili g tuud i. Gbannand nba k b pii k l g mɔg paalu bu yied gii gbie yen paalu i. 44Gbannand nba k b pii k l tie nifosaal yal bu yied, g Foŋanm n ji te’og gbannanfand. G dugn gbannand nba tie nifosaal yal be, g Foŋanm n tien yal nba mɔ be. 45Nnyan i k l kon diɛn Yendu Kadaaɔg n: « G cincinn nil, Adam te nifosaal, g nyaan jijuog Adam nuan tie Fuom i g tien miɛl. » 46Foŋanm n tien gbannand nba kaa g nil tu cind gii mɔg. Nil tu mɔg u gbannand yo, Foŋanm n yuand g te’og gbannanfand. 47Cincinn nil, b bo tug tinŋ n tanbiini i g tag’o, g munle po nil nyiɛ polu po g jiid. 48Yua nba k b bo tag’o yen tinŋ n tanbiini n bo tie nand, tinŋ po ne niib mɔ tie nnyan i, yua nba nyiɛ polu po n tie nand, polu po niib mɔ tie nnyan i. 49Nyan tin bo gaal tinŋ n nil ninnaɔnŋ nyan, nnyan i k t tan bu gaal yua nba nyiɛ polu po mɔ yaa ninnaɔnŋ. 50N naataani, min bua n maad yal n ne: Yal nba tie gbannand yen sɔm kan fid g kua Yendu ŋaag n, yal nba tie bonbedkal mɔ kan fid g daa bed. 51Cenŋ man ne, n bu dɔgd ŋasiil nne g ŋɔn’i: T kul kaa bu kpe, ama t kul bu lebd, 52pilb yenm kua, nyan ningbankaaɔg kabnu nyan, ban bu pieb jijuog naatunn yaa youg. G dugn b bu pieb naatunn, kpienm ń yied, g ji gii mɔg gbannand nba kan ban g bed, t mɔ yaa gbannand ń lebd. 53G dugn, l bual k t gbannand nba bu bed ne ń lebd g ji daa ban g bed i, k t gbannand nba bu kpe ne ń lebd tin ji daa ban g kpe. 54Yaa youg nba k t gbannand nba bo bu bed tan bu lebd g ji daa ban g bed, g yal nba bo bu kpe ń lebd tin ji daa ban g kpe nyan, l youg u g Yendu Kadaaɔg n diɛni ne ji bu tien yen mɔni: « Paalu dii kuum o. 55Kuum, a biɛ bu fid g paad bɛ ? Kuum, a pienu nba k a tu yeg g kpi niib nyan be lɛ ? » 56Biid n tie kuum pienu nba kpi niib, g biid paalu mɔ nya yiko buol. 57Ama t tien man Yendu balg yen wan te k t paad l kul t Yonmdaan Yiesu Kristo po. 58Lann, n naataani, yinm nba k n bua’i, ŋanm man gii sie k l paa, g daa mɔg begnu, gii suun Yonmdaan tuonn youg kul g saa liig, i yen ban g tuonn nba k i suun Yonmdaan po g tie fam.

will be added

X\