1 Korɛnt Kristo-yab 14

1I kpaan man k i gii bua i lieb, k i pala ń gii kɔn k i gii mɔg Foŋanm paab, mandg paab nba nyuan Yendu maam sɔgnu po. 2K l maa yua nba maad mabuolfani n ninŋ g maad yen niib kaa, u maad yen Yendu i, g dugn sua yen g gbiɛ wan maad yal nba. Foŋanm n tu te wan gii maad maam nba tie ŋasiil g duag. 3Ama yua nba gaan Yendu maam g sɔgnd niib nuan pugd’b paalu i b dindann n, g paand b pala, g sɔnŋd b pala. 4Yua nba maad mabuolfani n ninŋ pugd u dindann i paalu, ama yua nba gaan Yendu maam g sɔgnd niib nuan pugd Kristo tintaanu niib kul dindann i paalu. 5N bo sun k i kul ń gii maad mabuolfani n ninŋ. Ama n yen mand g bua k i gii sɔgnd Yendu maam i. G dugn, yua nba sɔgnd Yendu maam tuonn mɔg nyuad g cie yua maad mabuolfani n ninŋ, l gii g tie g sua be g sɔgnd l mabuolfani lieb po i kaa. 6N naataani, yinm mɔno ń ji diid, n gii baal g maad yen’i mabuolfani n ninŋ, n maam gii g dɔgd siɛl g ŋɔn’i, g g tie’i siɛl yaa banm, g g sɔgn’i Yendu maam, g g tie’i tundl, n baalu mɔg bɛ nyuad i i po i ? 7L tie nyan bona nba g fo g yen mɔg niɛlu, nyan yelg lann i kaa kogdug nyan i. L gii g mɔ g gagd, niib bu tien nle i g bann yelg n mɔ nand lann i kaa kogdug n mɔ nand i ? 8B gii g g pieb tɔb naatunn k l mɔ g gagd, ŋmaa bu bobn g nya tɔb i ? 9Nnyan i k i mɔ gii maad mabuolfani n ninŋ yal nba g sua g gbiɛ, sua kan bann yin maad yal nba. I bund g yaad mɔb fam i. 10Mabuoli-buoli be bonciɛnn ŋanduna n ninŋ, ama siɛl g be g g mɔg niimn. 11Nil gii maad yen’n mabuolu nba k n g gbiɛ, l daan tie nisaan i n po, k n mɔ tie nisaan u po. 12I mɔ, yin yaan kpaan yen pakɔnn k i gii mɔg Foŋanm paab nyan, mɔnd man gii kpaan yal nba bu tod Kristo tintaanu n niib b dindann n. 13Lann, yua nba maad mabuolfanu n ninŋ ń miɛl Yendu k wan te k wan fid gii sɔgnd l maam. 14G dugn, n gii jaand mabuolfanu n ninŋ, n yam n ninŋ i k n jaand, ama n maalm g be l n ninŋ. 15Lann, n ji bu tien nle ? N baa jaand n yam n ninŋ k n maalm be n jaandi n ninŋ. N baa yiin yani n yam n ninŋ, k n maalm be n yani n ninŋ mɔ. 16G dugn, l gii sua k a yam n ninŋ kukua i k a tiend Yendu balg, yua nba be i tintaanu n ninŋ, g yen g ban l bonn po, u bu tien nle i g maad a balg tienu po k « Amɛnn » g yen g ban ŋan maad yal nba i ? 17Yen mɔni, a balg tienu nuan ŋan hal bonciɛnn, g nyaan l yen g tod lua ŋano k u dindann pugn. 18N tiend Yendu balg yen min maad mabuolfani n ninŋ g cie i kul ne. 19Ama n gii be Kristo tintaanu n ninŋ, n tu maad niib n gbiɛ maam nba ninŋ nyan lanbona ŋanmu nne kua i, k lan te’b tundl, lann n su yen min maad lanbona tuda piig mabuolfanu n ninŋ k b yen kan gbad siɛl. 20N naataani, i yanjagl n ninŋ yin daa tie nyan bid nyan. Biid tienu n ninŋ yin gii tie nyan sanpandi nyan, g nyaan i yanjagl n ninŋ nuan yin gii tie nyan cegdkab nyan. 21L diɛn Yendu Mɔmaam kadaaɔg n g maad: « N tan bu sun niib nba maad mabuolfanu i ban maad yen n buolu, buolfanu n tan bu maad yen’m, yen l kul, b kan cenŋ’n ». Yonmdaan n maad yal n nyan. 22Lann, mabuolfani n maadu be k lan ŋɔn yab nba g dug Kristo po i bonn, l g tie yab nba dug u po yal kaa. Ama Yendu maam sɔgnu nuan be k lan ŋɔn Kristo‑yab i bonn, lann g be yab nba g tie Kristo‑yab po kaa. 23Kristo tintaanu n niib kul gii taan, g sua kul ji maad mabuolfani n ninŋ, yab nba daa g ban l po, lann i kaa yab nba g tie Kristo‑yab gii kua g la nnyan, b kan yed k i waad kaa aa ? 24Ama l gii sua k i kul sɔgnd Yendu maam i, g yua nba g tie Kristo‑yua, lann i kaa yua nba daa g ban l po tan kua g gbad i kul n maad yal nba, u bu bann k u tie biiddaan, wan gbad yal nba kul bu kɔn yen’o u pal n ninŋ. 25Yal nba tu tie ŋasiil g be u pal n kul bu dɔgd. L youg, u bu baa g gbaan g pii nunŋ yen tinŋ i g pug Yendu g maad: « Yen mɔni, Yendu be yen’i ». 26N naataani, t ji bu tien nle ? I tu gii taan lieb g bu jaand, yua nba mɔg yanu g bu yin ii, yua nba mɔg tundl g bu te ii, yua nba g Yendu ŋɔn’o madɔgnkam k u bua n maad ii, yua nba maad mabuolfani n ninŋ ii, yua nba sɔgnd l mabuolfani ii, i kul ń tien yal nba bu pugn tintaanu n niib dindann. 27Niib gii bua ban maad mabuolfani n ninŋ, ban daa cie niib banle lann i kaa niib bantaa, ban gii maad tuago tuago, g biɛ gii mɔg yua nba sɔgnd l maam. 28Sua gii g be g bu sɔgn, lann yua bo bu maad mabuolfani n ninŋ nyan ń gii ŋmin Kristo‑yab tintaanu n. Wan gii maad u kua yen Yendu. 29L gii tie Yendu sogni‑nba mɔ, banle lann i kaa bantaa ń gaal maam g lieb ń jag g diid l maam n. 30Nil gii be i siign g Yendu ŋɔn’o madɔgnkam k wan maad niib, yua nba bo kpiɛ g maad nyan ń suon. 31K l maa i kul bu fid gii sɔgnd Yendu maam tuago tuago k lan te sua kul tundl g biɛ paan sua kul pal. 32Yendu sogni‑nba bu fid g suol b kua yaa youg nba k b sɔgnd Yendu maam, 33g dugn Yendu g tie kpil kpil Yendu kaa, u tie yanduanm Yendu i. Nyan lan tie Kristo‑yab tintaancaga kul n ninŋ nand nyan, 34l bual g Kristo‑yab tintaancaga n ninŋ puob ń gii ŋmin i, k l maa yiko g cab k b gii be tintaanu n ban gii maad, l tie k ban jiin b kua b yudanm buol i, nyan Yendu Mɔmaam n mɔno n maad nand nyan. 35B gii bua ban bual g bann siɛl i yaa aa, ban kun ŋaag o g bual b salb, g dugn l mɔg fai yen puo ń gii maad Kristo‑yab tintaanu n ninŋ. 36Laabaal i, Yendu maam nyiɛ i buol yaa aa ? Bii i buol kua i k l maam pund i ? 37Yua nba gii mali k u tie Yendu sogni, lann i kaa g Foŋanm n cab’o k u maad, l daan ń bann k min da’i yal nba ne tie Yonmdaan mɔmaam i. 38U gii g tuo k l tie nnyan, Yendu mɔ g ban’o. 39Lann, n naataani, i pala ń gii kɔn Yendu maam sɔgnu po, g nyaan yin yen daa kɔn yen yab nba maad mabuolfani n ninŋ mɔ. 40Ama yin gii tie bonn kul lan bual nand, g daa tie nyabl nyabl.

will be added

X\