1 Korɛnt Kristo-yab 11

1I ŋmaad man n taabuod n, nyan min mɔ ń yaan ŋmaad Kristo taabuod n nyan. 2N pag’i yen yin tiɛn n po bonn kul n ninŋ g biɛ diɛ tundl nba k n bo tie’i. 3N yen bo bua k yin bann bonyenn: Kristo n tie jua kul Yudaan, g jua tie puo yudaan, g Yendu tie Kristo Yudaan. 4Jua nba yil yucabl o g jaand, lann i kaa g sɔgnd niib Yendu n maad’o yal nba, u fiɛgd u Yudaan i. 5Ama puo nba g yil siɛl, g yen jaand, lann i kaa g sɔgnd niib Yendu n maad’o yal nba, u fiɛgd u yudaan i. G dugn l ŋman k u kuol yukolnpaanu i. 6Puo nba kan yil yucabl, wan yen ceb u yud. U gii jie fai yen wan ceb u yud lann i kaa yen wan kuol yukolnpaanu mɔ, wan yen yil yucabl. 7L g bual g jua nuan ń yil yucabl, g dugn wano n tie Yendu ninnaɔnŋ g ŋɔnŋ u yudand. Puo nuan ŋɔnŋ jua yudand i. 8K l maa Yendu bo g tug puo gbannand kaa g tag jua, u bo tug jua gbannand i g tag puo. 9U biɛ bo g tag jua puo po kaa, u bo tag puo i jua po. 10L po n te k l bual g puo ń gii yil yikod banm u yul po g dugn malɛg‑nba po. 11Ama Yonmdaan buol nuan, puo g tie siɛl g jua g be, jua mɔ g tie siɛl g puo g be. 12G dugn l tie mɔni i k b tug jua gbannand i g tag puo, ama puo mɔ n yen l maal jua, g nyaan l kul nya Yendu buol i. 13Yinm mɔno ń ŋanm g mali g liɛ l dagd yen puo ń gii jaand g miɛd Yendu g g yil siɛl ii ? 14Yendu n tien bona nand mɔno, l g ŋɔnŋ’i g jua gii ŋaa k u yud piɛ g yabd nne l mɔg fai ii ? 15Puo nuan, l tie sel i u po k u yud ń gii yab. Yen mɔni, Yendu tie puo yud k l yab k lan gii tie cabl i u po k u yil. 16Sua biɛ gii bua wan tien mɔniɛɔg l po, wan bann k tinm g ban bogdfana, Yendu tintaanu niib mɔ lann n nyan. 17Min ji bu maad’i yal nba ne, l g tie k n bua n pag’i kaa, k l maa yin tu taan lieb g suun nand nba nyan, l g ŋami’i kaa, l biid’i nii. 18Min bu cind g maad yal n ne: N gbad k i tu taan lieb g paadu be i siign. N mali k ban maad’n yal nba ninŋ bonyena tie mɔni i. 19L bual mɔno g paadu ń gii be i siign i, k ban fid g bann i ninŋ yab nba ŋua Yendu yen payenn. 20Lann, yin tu taan lieb nyan, Yonmdaan jied kaa k i tu di. 21G dugn jediyoug, sua kul tu gbaa g cil gii di u jied u kukua i, g yenm kal kom, g lieb nyu g buog. 22I g mɔg ŋai g baa di g nyu i ŋai n ninŋ ii ? Bii i nund Yendu tintaanu niib, g bua yin fiɛg yab nba g mɔg siɛl i ? K i ji yed k n maad’i bɛ ? K n pag’i l po ii ? Palb, n kan fid g pag’i l yaa po. 23Min n gaal tundl nba Yonmdaan buol g luan’i n ne: Nyiɛɔg nba k b bo kuad Yonmdaan Yiesu, u bo tug kpanu, 24g tien Yendu balg, g jend jend g maad: « Ne tie n gbannand i k n tien’i. I tie man nnyan gii tiɛd n po. » 25Ban dii g gbenn, k u tug dimɔunŋ mɔ yen ŋmanŋ g tien nnyan g maad: « Dimɔunŋ ne tie n sɔm i, sɔm nba baal yen dɔnnpaanu. Yaa youg nba kul k i nyu, yin tiɛd n po. » 26G dugn yaa youg nba k i ŋman kpanu ne, g nyu dimɔunŋ ne, i muand Yonmdaan kuum i saa yen youg nba k u bu guan. 27L po n te g yua nba ŋman Yonmdaan kpanu, g nyu u dimɔunŋ, g cɔlunŋ g be l n, u tunŋ u kua biid n nyan yal nyuan Yonmdaan gbannand yen u sɔm po. 28Yua kul ń ŋanm g diid u pal n wan tie yua nba o, g fid g ŋman l kpanu, g nyu l dimɔunŋ, 29k l maa yua ŋman g nyu, g g nyuan k l tie [Yonmdaan] gbannand nyan, wano mɔno n bu ŋaa buud ń di’ug g dugn wan ŋman g nyu nyan po. 30L po n te k i siign ninŋ niib bonciɛnn yiɛl, g yenm‑nba dinŋ, g lieb mɔ kpe. 31T yen bo gii tuod g diid t pala n ninŋ tin tie yab nba, buud bo kan di’ti. 32Ama Yonmdaan bu’ti k wan tund’ti nii, k u tan gii jiɛl ŋanduna buud yaa youg, buud ń ji daa di tinm. 33Lann, n naataani, i tu gii taan g bu di jied, yin guul i lieb. 34Kom gii mɔg yua nba wan di u ŋaapo o gii baad, k i tintaann ń tan daa baad yen Yendu buud i po. Maam nba tenn g be, n bu baal i buol yo, g gbenn l maam.

will be added

X\