1 Korɛnt Kristo-yab 10

1N naataani, n bua n tiɛd’i g tawalgbaɔnŋ n bo ŋaag t yaajanm kul po, k b kul puod mɔgl. 2Nnyan, b kul bo taan yen Moyis g wul nyum n nyan tawalgbaɔnŋ n ninŋ yen mɔgl n ninŋ. 3B kul bo taan g dii jied nba bo nyiɛ Yendu buol i, 4g biɛ taan g nyuu nyum nba bo nyiɛ Yendu buol. Yen mɔni nyum nba k b bo nyu nyan bo buni Yendu tangbaɔnŋ nba bo ŋua’b nyan ninŋ i. L tangbaɔnŋ n bo tie Kristo. 5Ama yen l kul, b ninŋ bonciɛnn bo tien yal nba g manŋ Yendu pal. Lann n te k b bo kpe g yad g dua dua tinkuonŋ n ninŋ. 6L bona kul ne bo tien k lan te’ti cegli i, k tinm ń ji daa tug maalbiid g kuan t pala n ninŋ nyan ban bo tien nand nyan. 7Daa ŋua man pada nyan b ninŋ siɛb n bo tien nand nyan. L kon diɛn g maad: « Niib bo kal g dii, g nyuu, g ji fiil g jeln. » 8T daa suun cuncontuona nyan b ninŋ siɛb n bo tien nand, g diyenn kua niib tuda piinle yen tuda ŋantaa kpe nyan. 9T daa bignd Yonmdaan nyan b ninŋ siɛb n bo tien nand, g wai jun’m k b kpe nyan. 10Daa buln buln man nyan b ninŋ siɛb n bo tien nand, g kuum malɛg baal g pua g kpii’b nyan. 11L bona kul bo tien k lan te lieb cegli i. L diɛn Yendu Kadaaɔg n ninŋ k lan fand tinm nba ji be youg nba g fag yen ŋanduna juodu ne i. 12Lann yua nba mali k u sie k l paa ń ŋanm g suol u kua g daa baa. 13Bigna nba baal’i tie yal nba bu fid g baal nifosaal kul i. Yendu gii puon k u bu tien yal nba u tu tien i, u kan ŋaa bigna nba cie i paalu ń baal’i. Bignn biɛ gii baal’i mɔ, u bu ŋɔn sɔnu nba k i bu tɔgn g nya l n ninŋ, g te’i paalu nba k i bu fid g juun. 14Lann, n dɔnn‑nba lɔgl man pada canyiin. 15N maad yinm nba tie yanfodanm ne i, yinm mɔno ń mali n maam ne po. 16Tin tu di Yonmdaan jied, g nyu diŋmanŋ nba ninŋ, g tiend Yendu balg l po nyan, l g taand’ti yen Kristo sɔm kaa aa ? G kpanu nba k t jend g ŋman nyan i, l g taand’ti yen Kristo gbannand kaa aa ? 17G dugn kpanu yenn kukua n be, yen tin l yab nand kul, t taan g tie gbannanyend i, k l maa t kul taan g biid l kpanu yenn i. 18Diid man Israyɛl buolu, yab nba tu ŋman bonkobd nba k b kod g yid salg nyan, banm yen Yendu tu taan lieb gii tie bonyenn n nyan. 19N maam ne niimn ii ? N bua n maad g padnand, lann i kaa g padl mɔno tie siɛl yaa aa ? 20Palb. Ban tu pad padl nyan, sanpola n tu gaal, b g pad g tien Yendu kaa. L po n te k n g bua k yinm yen sanpola ń gii taa siɛl. 21I kan fid gii nyu Yonmdaan diŋmanŋ n g biɛ nyu sanpola mɔ yaa diŋmanŋ n. I kan fid gii di Yonmdaan saaŋmanŋ n g biɛ di sanpola mɔ yaa saaŋmanŋ n. 22Bii t kpaan k t fiin Yonmdaan mutuol yaa aa ? Tinm n paa g cie’og uu ? 23« Siɛl g be g tie kual », ama bonn kul kaa tie bonmɔnn. « Siɛl g be g tie kual », ama bonn kul kaa tod’ti k t kped dindann n ninŋ. 24Sua ń daa kpaan u yal kua, i kpaan man i lieb todl. 25Ban kuad nand nba daag n ninŋ kul, i bu fid g daa g ŋman g daa mali munle-le l po g bual siɛl yaa buali. 26G dugn l diɛn Yendu Kadaaɔg n g maad g « Yonmdaan n yen tinŋ yen yal nba be tinŋ po kul ». 27Yua nba g tie Kristo‑yua gii yiin’i jedinu, k i tuo g gad, yin di wan tie’i jied nba kul, g daa mali munle-le l po g bual’o siɛl yaa buali. 28Ama nil gii maad’i: « Ne tie padnand i », yin ji daa ŋman l nand g dugn yua nba maad’i nyan po, yen lan mɔg maalm munle-le nba l po nyan. 29N maad wan mɔg maalm munle-le nba i, n g maad i yaa yal kaa. G dugn bɛ po i g lua maalm bu pan’n k n kan tien min bua yal nba i ? 30Bɛ po i k n bu tien Yendu balg g di jied o, nil ń biɛ gii jalg’n l jied po i ? 31Lann, i gii di ii, i gii nyu ii, yin l tie yal nba kul, yin mɔnd k lan kpiɛg Yendu sann. 32Daa ŋaa man k i bontitied ń tuln Suif‑nba lann i kaa yab nba g tie Suif‑nba, lann i kaa Yendu tintaanu niib. 33I tie man nyan min nyan. Bonn kul n ninŋ, n kpaan k b kul pala ń gii man n po i. N g kpaan n yul po nyuad kaa, n kpaan niib bonciɛnn yal i, k ban la fielu.

will be added

X\