FAILIMƆN 1

1Nya Pɔɔl, ngi kpindi-wɛlei bu Yesu Kristi wooma, mua mu ndewei Timoti mia mu kɔlɛi ji yoyoma bi gama, mu ndiamɔi kɛɛ mu mbaa ngengemɔi Failimɔn, 2kɛɛ Kristimablei nasia ta gomɛ bi yeepɛlɛbu, kɛɛ mu ndewenyahaloi Afia kɛɛ mu mbaa ndapimɔi Akipɔs: 3Mu Kɛkɛ Ngewɔ taa mu Lemɔi Yesu Kristi ti ngauwanda ve wu wɛ kɛɛ ndiilɛli. 4Nya ndewei Failimɔn, watii gbi ngi yaa Ngewɔ vɛlima, nga bi laa gɛlɔ ngi siɛgbua Ngewɔ na ma nga ngi vɛli. 5Ajifa ndomɛi na bi piengɔ a Ngewɔmableisia kɛɛ bi layii a mu Lemɔi Yesu yeetɔwɔi lɔ foma nya ma. 6Nyaa Ngewɔ vɛlima aako mbaayɛi na mua wueni mu hu jifa mu langɔ a Kristi i pie mu kpekpeyei na kpɛlɛɛ gɔɔ pandawanda mu majɔɔnga ji mua Kristi-ni mu wilingɔ hu. 7Nya liima ndewei, ndomɛi na bi piengɔ a mu mbaa Kristimableisia, i koohunɛɛ waa venga nya wɛ kɛɛ ndiigba! Bi Ngewɔ nungeisia gbi ti lii nɛnga. 8Sabui ji va lɔ, jifa bi ndewei a nge mua Kristi-ni mu wilingɔ hu, nga gu ngi liilo ngi nde bi ma a ngaulewe ngɛɛ bi na wie mahoungɔ i wie. 9Kɛɛ jifa mu longɔ ma hinda mia ngi bi manɛnɛma fa. Ngi ji wiemaa kia bɛɛ Pɔɔl a nge, Yesu Kristi yaamɛi kɛɛ gbɔma kpindiwɛlɛbumɔ kiahuna Kristi wooma. 10Faale nyaa bi manɛnɛma Onɛsimɔsi va, na bi tɔaa bɛɛ i yɛnga a nya loi vulii ji i langa a Kristi; ajifa ngi longa kpindi-wɛlei bu lɔ ngi yɛnga a ngi kɛkɛ. 11Watii yila ma wɔɔ ii yɛni a nafayahumɔ bi gama, kɛɛ kiahuna na nafayahumɔ mia bi gama kɛɛ nya bɛɛ. 12Nyaa ngi yamama na bi gama, tawao taa nya lii mia ti lima. 13Nga lolɔ i yɛ nya gbla kia lɛ ngi kpindiwɛlei bu Ngowili Yekpei wooma, aako i yɛ a gbɔ nya ma a bi jɔngɔ. 14Na hu gbi, ngii loni ngi kpɔnda bi ma gbɔva nya ma; kia na aa wie, nga lolɔ bi pie a bi nyɛkɛ. Famia ngɛɛ gbɛogbɛ wie kɛlee bi luma pɛiŋ. 15Tɛnga Onɛsimɔsi i gbuailɔ bi ma watii wulo va aako i yama bi gama kunafɔ va. 16Faale na, ii yɛni a nduwɔ lekee, i leweni polouŋ nduwɔ ma: i langa a Kristi i wotenga a bi liima ndewei. Ngi hinda i wɔlɔni kpa nya yaama! Tawao ngi hinda a wɔlɔ kpa tewengɔ na ma bi gama jifa bi luwɔi a ngie kɛɛ bi ndewei jifa ngi langɔ a mu Lemɔi! 17Faale, bi gilingaa kɛ bi mbaa mia a nge, loko hei ngi bu bi tɔaa bɛɛ nya mia bi loko heima nya bu. 18Ina i hinda nyamu wienga gɛ a bie ɔɔ ina bi gbaa gbi lɔ ngi ma, loko hei nya wɛ fa. 19Mbei kɔlɛi ji i gɛlɛnga na, nyaa yeeji ta nyɛima a nya vulii nya lokoi: Nya Pɔɔl nga yeekpɛi gbualɔ lɔɔ. (Maa ii houni ngi hitɛ bi wɛ kɛ nya nda gbɛi lɔ bi ma ndɛvu ninɛi va bi majɔɔnga Kristi sabui hu.) 20Faale, nya ndewei, kɔnɛɛ le kpekpei ji wie a nge Ndemɔi va; kia nya ndewei a bie jifa mu langɔ a Kristi, nya lii i nɛɛ a na wiela. 21Nya langɔe la kɛ kia ngi kɔlɛi ji nyɛima, ba na wielɔ ngi ndema bi ma; a tɔnya ngi kɔɔlɔ kɛ ba malema vulii wielɔ. 22Nya longɔ gbɔma bi lomu yila hugbatɛ nya va, ajifa nya lii lɔ ma kɛ Ngewɔ a lumalɔ wu gbi wu hɛɛwoisia ma, a ji a nya yama wu ma. 23Ipafras ji mua ta mu kpindiwɛlei bu Yesu Kristi wooma, yɛ a va kaka wu ma, 24tawao nya mbaa ngengeblɛisia Maaki, Aristakɔs, Diimas kɛɛ Luki bɛɛ tɛɛ ta va kaka wu ma. 25Mu Lemɔi Yesu Kristi yauwandei i yɛ bi ma.

will be added

X\