JUDI 1

1Nya Judi, Yesu Kristi yengemɔ a nge kɛɛ Jemisi ndewe wuloi, nya mia ngi kɔlɛi ji nyɛinga wua wu gama Ngewɔ wu lolini, mu Kɛkɛ Ngewɔ longɔ a wue, Yesu Kristi a wu mahugbe: 2Ngewɔ i manu wu ma kpele gbi, i wu gɔ a ndiilɛli, i lo a wue waa. 3Nya liima ndiamɔisia, mani waa yɛlɔ nya ma kɔlɔ nyɛiva wu gama kɔlooni mbawoyɛi na ma mu Kristimableisia gbi mu majɔnga. Kɛɛ kiahuna ngi tɔnga kɛ mahoungɔe ngi kɔlɔ nyɛi kaakaa aako ngi wu lii vulu lapiva a wu sɛmbɛi gbi Ngowili Yekpei na magaova Ngewɔ i fenga ngi nungeisia wɛ, Ngowili Yekpei na mumu gbi ɛɛ gu a maluvela. 4Nungɛi nasia tii Ngewɔ gɔɔ ti lɛɛnga ti wilinga wu lia yɛlɛŋ muii kɔɔni. I Ionga wɔɔ kulɔma lɔ Ngewɔ Gɔlɛi i kpaalɛi na hinda hugɛnga Ngewɔ i wama ndama ti ma. Yeenungɛi jisia ta Ngewɔ yauwandei yeengowili maluvelɔ aako ti numu nɔhɔ hindei nasia malɔwu ta pie tawao ta gbelelɔ Yesu Kristi ma tɛɛ ii yɛni a mu Kaamɔ yakpei kɛɛ mu Lemɔi. 5Gbamaile kia bɛɛ wu ji kpɛlɛɛ hugɔɔngɔ, nya longɔ ngi hitɛ wu wɛ kia wɔɔ Ndemɔi Ngewɔ i Isrɛelblɛisia gbuani nduwɔyɛi hu Ijipt lɔlei hu kɛɛ na wooma i nasia waa tii lani a ngie. 6A gili a malikei nasia wɔɔ kpayei na Ngewɔ i feni ti wɛ ii ti liilɛlini, ti gbuani ti heimɛi, ti yilingɔe a jɔwɔi nasia tɛɛ nyani kunafɔ, ti laani kpindi hu ndɔubleisia ti yɛmɛi, mia Ngewɔ i ti wunga na folo wai na mawulova i ti lɛɛ ma. 7A gili a Sɔdɔm kɛɛ Gomɔra kɛɛ tei nasia ti yɛ ti gblanga, yeenungeisia ti luveilɔ kia malikei nasia ti pieni, ta gbɔma puegbua gɛwɛgɛwɛisia wie. Ngewɔ i yeetei nasia tia yeehublɛisia gbi nyanilɔ a ngɔmbui na ɛɛ lufe kunafɔ va, kɔɔ ji i yɛ a ndahii kengelee jumbu hinda wieblɛisia kpɛlɛɛ gama. 8Hii lɔɔ ndɛɛ kaamɔi jisia bɛɛ ta hengangaa wielɔ, yeehengɛisia ta pie ta manɔhɔ hindangaa wie a ti luwuisia; ta lɛɛlɔ Ngewɔ lemayɛi hu, ta malika bɛɛheingɔ wai nasia vulii bɛɛ bɛlɛnyani ti ngelegoohu. 9Malikeisia ti gulɔmɔi Maikɛl vulii bɛɛ ii ji wieni. Ji taa Seitana ti yiani Mojisi woomɛi va, ta mawali hou ina a lo ye lɔ yeya, Maikɛl ii Seitana yɛlini ji i yɛ ngi lɛɛma, i ndeilɔ lekee yɛ, “Ndemɔi i kpaalɛ la bi ma!” 10Kɛɛ hinda gbi lekee ndɛɛ kaamɔi jisia tii yeembui gɔɔ, ta magbualɔ, kɛɛ hindei nasia ta gula ti wui hu pieva kia ndɔgbɔ-huangaa, yeehindeisia mia ti wama ti jukuluma. 11I nyamuni kpa ti va! Ti hinda yakpei na wienga Ken i pieni wɔɔ. Ti kpulangei na wienga Belam i pieni aako ti navoo majɔɔ. Ti ganganga a temayɛi kia Kenɛi Kora i gangani la, tawao Ngewɔ a ti waalɔ kia i Kora waani. 12Jifa ta ndɔ-gbɔle gomɛisia gula ta ngufebaa hindeisia wie na; ti hinda mawufengɔ waa le ji ta wili wu lia ngooyila mɛhɛɛ mɛmɛisia. Ti gbewengɔ a yɛla tia yekpe lekee ti goovela lɔ va. Ti wiengɔe kia njagbili na i na viivii a lewe la kɛɛ ɛɛ pie nja aa wua. Ti wiengɔe kia ngulii nasia na tɛɛ wua a ti wua-gbelei bɛɛ, ngulii nasia ti wukpuangɔ, ti haangɔ fɔ. 13Ndɛɛ kaamɔi jisia ti wiengɔe kia gboyɛi yeenjagate waawaisia ti na, ti wiehinda mawufengɔisia ti maa a gɛ kia fuulei a yɛ njɛi ya. Ti wiengɔe kia tumbekei nasia ti na ta gbula ti jiawelei ma, nasia Ngewɔ i ti heima gbatɛnga kunafɔ va kpindi yeenilinilii hu. 14Adam laalohu laaloi yeewɔflei Inɔk mia wɔɔ i kulɔmayia leni kɔlooni ji ma yɛ, “Ndemɔi a walɔ tia ngi malika tauji gboto, 15numui kpɛlɛɛ gbɛmbova, nasia tii Ngewɔ gɔɔ kpɛlɛɛ lɛɛva jumbui nasia va ti pienga kɛɛ mbɛlɛnyani yɛpɛi nasia kpɛlɛɛ jumbubleisia ti ndenga ngi ma.” 16Yeenungɛi jisia ta gbonyɛlɔ kpele gbi, ta nungaa wekɛisia lɔwa nyani; hinda nyamui nasia mani a ti lɔ pieva, ta lekee lɔ ti gbewengɔ pieva; ta lawolɔ waa a ti hinda wɔlɔyii, ta nungaa wekɛisia wuhuba a njɛpɛ nɛnɛɛisia aako ti liima hindei i wie. 17Kɛɛ, nya liima ndiamɔisia, waa lema na mu Lemɔi Yesu Kristi looblɛisia ti ndeni wɔɔ wu ma. 18Ti ndeilɔ wu ma tɛɛ, “Dunyei gbɔyɔ gbelei i hitingaa, nungaa ta gbualɔ nga ta wu gbafa, ti gbewengɔ lekee hinda nyamui nasia lɔ wieva yeemani a ti lɔ.” 19Yeenungɛi jisia lɔ ta wa a ngo-ya-vayei wu luahu, ta ti liima hinda nyamui nasia wie a gula ti wui hu, Ngewɔ Yafei ii ti hu. 20Kɛɛ wua, nya liima ndiamɔisia, a yɛ a wua yekpe madihou lɛva gulɔma lanaya magayemangɔi hu. A yɛ a Ngewɔ vɛli a pelei na ngi Gayema Yafei a wu lo ma. 21A pie, Ngewɔ i lo loma a wue, wu kunafɔ lɛɛvui na mawulo mu Lemɔi Yesu Kristi a fe jifa ngi manumangɔ. 22A manuma gɛ a wu mbaa Kristimablei nasia ti sekangɔ Ngowili Yekpei hu; 23ti lɛɛnga gbua jahama jie yeekpundei hu; a ti yama pele wɔnɛi ma wu pie ti bawo. Pekeisia lɔ na gbɔma ti ti liima hinda nyamuisia wiela yeenduwɔyei hu: a ti mamamau lɔ, kɛɛ a wu mahugbe waa luma ti luvayii nyamuisia taa wu nɔhɔ Ngewɔ yama. 24A mu Ngewɔ yakpei na lato mu bawomɔi a ngie! A gulɔ a piela wuɛɛ gbe wu lalei ma a Kristi, i wa a wue ngi nda mahaya wai gulɔ jumbu gbi ii wu ma tawao wu goohu nɛngɔ. 25Mu gbi a mu Ngewɔ lato mu Lemɔi Yesu Kristi sabui hu ngi wɔlɔyɛi va kɛɛ ngi mahayɛi kɛɛ ngi lemayɛi kɛɛ ngi gbayei na i yɛ hu pɛiŋ wɔɔ i yɛ a dunyei gbatɛ tawao ti yɛni a ngi woo kiahuna bɛɛ kɛɛ kunafɔ va! Amiina.

will be added

X\