TOBLEISIA TI WIEHINDEISIA 7

1Saagbuablɛisia ti gulɔmɔ wai i Stivin mɔlilɔ yɛ, “Tɔnya vulii lɔ a hindei ji kpɛlɛɛ ti tɛnga bi wumba?” 2Stivin i kpɛmboilɔ yɛ, “Nya ndeengɛisia kɛɛ kɛkɛ-ni! A wolo nya ma! Mahɛi Ngewɔ Waa i gɛilɔ a mu maada Ebraham watii lɛ i yɛ heini Mesɔpɔtemia pɛiŋ i yaa gule i li Heran, 3i nde ngi ma yɛ, ‘Bi bondeisia lo kɛɛ bi lɔlei, bi li ndɔlei na hu nga kɛ a bie.’ 4Faale i guleilɔ Kaldia lɔlei hu i li i hei Heran. Kia ngi kɛkɛ i haani, Ngewɔ pieilɔ i gule i wa ndɔlei ji hu wu heini na na. 5A watii na Ngewɔ ii yeendɔlɛi ji yeehinda gbi veni Ebraham wɛ a ngi woo, numu gɔwɔ-loma bɛɛ; kɛɛ Ngewɔ i Lahei wumbuilɔ yɛ a felɔ ngi wɛ, tawao a yɛlɔ a ngi woo kɛɛ ngi leengeisia ngi haangɔi wooma. Watii na Ngewɔ i Lahei ji wumbuni, ndo gbi ii yɛ Ebraham yeya. 6Ngewɔ i ji lɔ leni ngi ma yɛ, ‘Bi bɔɔsɔɛisia ta hotaya mɛlɔ ndɔlɔ weka hu, ti wote na a nduwɔngaa, yeendɔlɔblei nasia ti nyamu waa a tie foo hɔndɔɔ naani va. 7Kɛɛ nga kpalɛ lalɔ ti luwɔkɛisia ma, tawao na wooma ta gbualɔ yeendɔlei na hu ti hɛɛ nya ma hindei ji.’ 8Kɛ Ngewɔ i bili heilɛi venga Ebraham wɛ a ngi hinda yangilingɔi yeetɔmaseli. Faale Ebraham i Aisaki heiilɔ biliya ji ti ngi leni i gu a njii wayakpa; Aisaki i Jekɔpi hei biliya, Jekɔpi i mu maada puu maahu feleisia hei biliya. 9“Kɛɛ mu maadani ti loleilɔ a ti ndewei Josɛfi, ti ngi majia, ngi yeyablɛisia ti li a ngie Ijipt ti ngi yɛ a nduwɔ. Kɛɛ Ngewɔ i yɛ ngi wooma lɔ, 10i kpundɛi kpɛlɛɛ huvo a ngie. Ji Ijipt Mahɛi Fɛɛro i yaama wɛlɛni Josɛfi ma, Ngewɔ i ngi gɔilɔ a nɛmahulewe, i pie ngi hinda i nɛɛ waa Fɛɛro wɛ. Fɛɛro i Josɛfi yɛilɔ a maha Ijipt lɔlei kpɛlɛɛ maahu kɛɛ ngi wɛlɛbubleisia gbi. 11Kɛ ndɔlɛ waa i gulanga Ijipt lɔlei hu gbi kɛɛ Kenaan, i nungaa liima vɔɔni waa. Mɛhɛɛ jɔma gbi ii yɛ mu maadani yeya. 12Faale kia Jekɔpi i mɛnini kɛ mɛhɛɛ lɔ Ijipt, i ngi hingaleengeisia loilɔ na, mu maadani, ti haala jia ga ti li na. 13Kia ti yamani na jiei yeefelei hu, kɛ Josɛfi i ta yekpe hinda hugɛnga a ngi ndeengɛisia, kɛ Fɛɛro i Josɛfi ngi bondeisia hinda hugɔɔnga. 14Faale Josɛfi i ngowili wiliilɔ ngi kɛkɛ Jekɔpi gama yɛ tia ngi bondeisia gbi ti wa Ijipt lɔlei hu: ti kpɛlɛɛ ti yɛ numu sawa gbɔyɔngɔ maahu puu maahu lɔɔlu. 15Na wooma Jekɔpi i liilɔ Ijipt, tawao ta kɛɛ mu maadani ti haani na lɔ. 16Ti yamɛilɔ a ti womɛisia Sɛkɛm ti ti gbɔwu kambɛi na hu Ebraham i ngeyani wɔɔ Hemɔ bondeisia ma a navoo. 17“Lahei wɔɔ Ngewɔ i mbumbuni Ebraham gama, kia yeehindei wie-gbelei i lukpeni kpla, mu bondeisia ti gbotoilɔ waa Ijipt. 18Kɛlɛmɛi numu weka, na ii yɛ Josɛf hinda hugɔɔ i mahayɛi mɛilɔ Ijipt. 19I kava gulɛilɔ mu bondeisia ma, i nyamu waa wie a mu maadani, a kpɔnda ti ma ta ti loolaaisia gbua pɛleisia bu ta ti wili aako ti haa. 20Yeewatii ji mia ti Mojisi leni, ngi nyandengɔ waa. Ngi lebleisia ti liilɔ a ngie ti yeepɛlɛbu ti ngi makɛ ngalu sawa va, 21kɛɛ kia ti ngi gbuani pɛlei bu ti ngi wilini, Fɛɛro nyahaloi lɔ i ngi woteni a ngi loi, i ngi gbuahu. 22Ti ngi gaailɔ a Ijiptblɛisia ti nɛmahulewei gbi, i wote a numu waa ngi layie hu kɛɛ ngi wiehindei. 23“Kia Mojisi voo i guni a numu fele gbɔyɔngɔ, i wuilɔ ngi lii hu liva i ngi ndeengɛisia, Isrɛlbleisia, ti yɛyii hulɔ. 24I yeengila lɔilɔ Ijiptmɔ yila a ngi liima be, kɛ i gbɔnga Isrɛlmɔi ma, i Ijiptmɔi waa. 25(I yɛlɔ ngi nɛmahu kɛ ngi nda nungeisia ta liiheilɔ ma kɛ ta lɔ Ngewɔ i piema i ti gbua nduwɔyɛi hu, kɛɛ tii liiheini ma.) 26Folo wekei ma i Isrɛlblaa fele lɔilɔ ta lapi kɛ i lapinga ti luahu gɔlɛva. I ndeilɔ ti ma yɛ, ‘Ndakpeisia, a wolo lɛɛ, ndeengaa lɔ a wue; gbɛe wu nyamuma a wu nyɔunyɔ?’ 27Kɛ yeena i nyamui gani a ngi mbaa i Mojisi lukpenga, i ngi mɔli yɛ, ‘Ye lɔ i bi yɛni a maha kɛɛ kitilewemɔ mu maahu? 28Bi longɔe bi nya waa kia bi Ijiptmɔi na waani la gbengi?’ 29Kia Mojisi i ji mɛnini, i wilɛilɔ i gbua Ijipt i li i hei Midian lɔlei hu. Na lɔ i hindolo fele leni na. 30“Kia foo numu fele gbɔyɔngɔ i gbɔyɔni, malika yila i gɛilɔ a ngie ngɔmbuvoi hu i houni ndawɛisia ma ndɔgbɔ lambɛi ma Sainai Yɛyei gblanga. 31Ji Mojisi i ngɔmbuvoi lɔni kpɔvɔi hu, ngi wuhu wuilɔ, kɛ i lukpenga yeendɔgbɔi gbla hubɛɛva pandawanda. Kɛɛ i Ndemɔi woi mɛnilɔ yɛ: 32‘Bi maadani ti Yewɔɛi mia a nge, Ebraham kɛɛ Aisaki kɛɛ Jekɔpi ti Yewɔɛi.’ Mojisi i luwɛilɔ ngi maa a gbɛli tawao ii yaa liiloni na gbeva. 33Ndemɔi ndeilɔ ngi ma yɛ, ‘Kɔɔwɛi na gbua bi gɔwɔhu ajifa nya woo mia gba a hindei na bi looni na. 34Ngi ndiimavɔɔni nasia lɔnga i lama nya nungeisia ma Ijipt lɔlei hu tawao ngi yeinga ti bawova. Faale wa na, nyaa bi loma Ijipt.’ 35“Mojisi lɔ wɔɔ Isrɛlbleisia ti gbeeleni ma. Ti ngi mɔlilɔ tɛɛ, ‘Ye lɔ i bi yɛni a Maha kɛɛ nyama mu maahu?’ Ta lɔ Ngewɔ i ngi yoyoni a maha kɛɛ mbawomɔ, Malikei na i gɛni a ngie ngɔmbuvoi hu a gbɔ ngi ma. 36Ta lɔ i gbuani a Isrɛlbleisia Ijipt lɔlei hu, i kabande hinda waawangaa wie yeendɔlei na hu kɛɛ njɛi na laa ti yɛ toli a Rɛd Sii (Nja Gbɔlii) kɛɛ ndɔgbɔ lambɛi ma foo numu fele gbɔyɔngɔ va. 37Mojisi mia ndeni Isrɛlbleisia ma yɛ, ‘Ngewɔ a tutu yoyolɔ wu wɛ, kia lɔɔ i nya yooyoni, yeetutui na a gbua wu nda nungeisia hu lɔ.’ 38Mojisi lɔ Isrɛlbleisia ti yɛ ngi lokoya ji ti yandɔni ndɔgbɔ lambɛi ma: i yɛ na lɔ tia maadani Malikei na i yɛpɛni ngi gama ngiyei na hu ta toli a Sainai; ta lɔ i Ngewɔ woowili vulungɔi majɔɔni teweva mu gama. 39“Kɛɛ mu maadani tii lumani taa golo ngi wɛ; ti ngi lukpeilɔ mia, ti wɔɔ yamava gbɔma ijipt. 40Faale ti ndeilɔ Eerɔn ma tɛɛ, ‘Ngewɔ wekangaa gbatɛ mu wɛ ti lo mu gulɔ. Muii kɔɔ gbɔɔ i Mojisi na wienga i gbuani a mue Ijipt lɔlei hu.’ 41Yeewatii na mia ti nɔmɔlii gbatɛni kia nika na, ti saangaa gbua yee nɔmɔli ma, ti komɛ waa ga tia yekpe ti gbatɛ-hani na va. 42Kɛɛ Ngewɔ i wounveilɔ ti ma, i pie ti wote hɛɛla ma tumbekeisia ma ti ngelei ma, kia nyɛingɔ la Ngewɔ lutuisia ti gɔlɛi hu tɛɛ, ‘Isrɛlbleisia! Nya va ii le wu yɛ tohanisia waa wa kpua a saa foo numu fele gbɔyɔngɔ va ndɔgbɔ lambɛi ma. 43Wu yewɔɛi Molɔk ngi gula-welei mia wu yɛ li la, kɛɛ wu yewɔɛi Rifan ngi lumbekei gbuayei; ti yɛni a nɔmɔlingaa lɔ wu kpatɛni hɛɛva ma. Faale, nga pielɔ ti li a wue Babilɔn yeepoma.’ 44“Kula-wɛlei na wɔɔ Ngewɔ a yɛ mbu tamia a yɛ wɔɔ mu maadani yeya ndɔgbɔ lambɛi ma. Mojisi i kpateilɔ kia Ngewɔ i hugɛni a ngie kpatɛva. 45Na wooma mu maada nasia ti Ngewɔ gula-wɛlei majɔɔni a ti kɛkɛ-ni ti yɛlɔ a li la ji tia Jɔsua-ni ti lini ti ndɔlei hou kɛnyɛi nasia yeya Ngewɔ i ti gbɛni ti gulɔ. Tawao i loilɔ na haaŋ i to Devidi watii ma. 46Devidi hinda i nɛɛlɔ Ngewɔ wɛ tawao i ndeilɔ yɛ Ngewɔ i luma ngi wɛ i pɛlɛ lo Jekɔpi Yewɔɛi wɛ. 47Kɛɛ Sɔlɔmɔn lɔ i pɛlɛ loni ta ngi Ngewɔ wɛ. 48“Kɛɛ Ngewɔ Yalɛngɔ Wai ii heini pɛlɛ bu nuuvungaa ta to, kia Ngewɔ i puni ngi lutui laa yɛ, 49‘Ngelegoohu lɔ nya Maha heimi le, tawao dunyei lɔ nya gɔwɔ-lomɛi le. Pɛlei yeegbɛ nyɔkɔ lɔ bi longɔ bi too nya wɛ? Mindo lɔ nga lɛɛvu na? 50Nya vulii ii le ngaa hani jisia kpɛlɛɛ gbatɛ?’ 51“Wu woohu i gbɔndani kpa! Wu liisia ti yakani kpa Ngewɔ ma, wu wolihu i lutuni kpa Ngewɔ woowili va! Wu gbuangɔ lɔɔ a wu maadani lɔ: wua bɛɛ wu gangangɔe a wolola Ngewɔ Yafei ma! 52Ngewɔ lutu i yɛlɔ na wɔɔ na wu maadani tii ngi yakpɛni a nyamu? Ti Ngewɔ lutui nasia waalɔ ti Ngewɔ Bɔilopo wɔnangɔi walei hugɛni wɔɔ. Kiahuna na wu ngi venga, wu ngi waanga. 53Wua lɔ Ngewɔ i sawei na veni wu wɛ malikeisia ti feni Mojisi wɛ -- na hu gbi wuii yeesawei houni!” 54Kia Kotii lebleisia ti woloni na gbi ma Stivin i ndeni, ti lii i leweilɔ waa ngi ma, ti yaamɛi gbi gbunyɛngɔ. 55Kɛɛ Ngewɔ Yafei i Stivin hu, i ngelema gbeilɔ tiŋ kɛ i Ngewɔ mahayɛi hulɔnga kɛɛ Yesu i looni Ngewɔ yejei hu. 56Kɛ i ndenga yɛ, “A tɔ lɛɛ! Nyaa ngelegoohu lɔma ndawongɔ kɛɛ Nuuvu Hindoloi i looni Ngewɔ yeja gakei ma!” 57Numui gbi ti yele waa gulɛilɔ, ti loko wuaa ti wolisia hu, ti wa Stivin maahu a leenga, 58ti ngi gbua tei hu, ti ngi hɔwɔhɔwɔ. Selisia ti yɛ ti magulɛisia loko wuaa taamɔ yila lɔ yeya ngi laa a Sɔɔl. 59Ti loni ngi hɔwɔhɔwɔmaa i Ndemɔi loli yɛ, “Ndemɔi Yesu, nya yafei wumbu!” 60Kɛ i wombi gbakpanga, i yele gula a ngoo waa yɛ, “Ndemɔi, manu ti ma jumbui ji va!” Kia i ji leni kɛ ngi lii i wuaanga.

will be added

X\