TOBLEISIA TI WIEHINDEISIA 21

1Kia mu kpɔyɔni a vɛlila ti ma mu heilɔ ndɛndɛ hu mu njei lewe yakpe kɛ mu fonga Kɔs; folo wekei ma mu liilɔ Rodis, kɛ mu gbuanga na mu lii Patara. 2Nalɔ mu ndɛndɛi maleni na i lima Fonisia, kɛ mu wilinga hu liva. 3Mu foni hinda lɔ kɛ mu Saipɔs lɔnga, kɛ mu sagbaama a yee kpundɔhu wee mu wa Siira. Mu hitɛilɔ Taaya gakpɔima miando ti yɛ haŋkeisia gbuama na ndɛndɛi hu. 4Mu lanayableisia lɛnga male nalɔ mu hei ti gɔɔma hoki yila va. A Ngewɔ Yafei gbɔmi hu wee ti ndeilɔ Pɔɔl ma tɛ aa li Jelusalɛm. 5Kɛɛ ji mu lɔwɔi yɛva ti gɔɔma i gbɔyɔni, mu gbuailɔ na mu lii a jiei gulɔma. Ti kpɛlɛɛ, tia ti nyahangɛisia kɛɛ ti lengeisia, ti liilɔ mu laaloma mu gbua tei hu mu li gboya ŋanyɛi ma, kɛ mu wombi gbakpanga na mu Ngewɔ vɛli. 6Na wooma mu vɛlilɔ mu nyɔunyɔ ma mu lɛ ndɛndɛi hu, kɛ tia ti yamanga ti yetaahu. 7Mu liilɔ a jiei gulɔ mu gbua Taaya mu fo Tolɛmaisi, mia mu fama laaloni na Kristimableisia ma mu jii yila wie ti gɔɔma. 8Folo wekei ma mu gbuailɔ mu wa Siisaria kɛ mu ya mu hei na Filipi gɔɔma mia ngi yɛpɛlaa. Numu yila mia wɔɔ a ngie kɔɔnga wɔfla lia ti loko looni ti ma Jelusalɛm. 9Nyaha leengaa naani ti yɛlɔ ngi yeya ta Ngewɔ layie le, kɛɛ hinga tii ti yeya. 10Mu yɛ nalɔ lɔwɔ gboto va kɛ tutu yila ngi laa a Agabɔs i wanga a gbua Judia. 11I wailɔ mu gama, i Pɔɔl liayili yeyei wumbu, i ngi gɔwɛi venjɔ tia ngi lokoisia ti yili, kɛ i ndenga yɛ, “Ji mia Ngewɔ Yafei ndenga: Numui ngi womia a ngeyei ji a ngili hulɔlɔ kia ji na Juubleisia ta ngi yilila Jelusalɛm, tawao ta ngi wuaalɔ nasia yeya Juublaa yaa tie.” 12Kia ji gulani mu wolihu, mua kɛɛ nungaa wekei nasia ti yɛ na mu nɔɔɛilɔ Pɔɔl ma mu ngi lemu muɛɛ aa lii Jelusalɛm. 13Kɛɛ i poteilɔ i nde mu ma yɛ, “Gbɛe wa wɔlɔ nya lii nyani va? Nya magbɛntɛngɔ ii le lekee ngili hulɔva Jelusalɛm kɛɛ nya longɔ vuii bɛɛ ngi haa na Ndemɔi Yesu va.” 14Muii guni ma ngi lii wote, faale mu gbeilɔ ngi ma muɛɛ, “Ndemɔi liima hinde i wie dae.” 15Ji mu lɛmbini na lɔwɔ lɛnga va, mu mu hakeisia hugbatɛilɔ kɛ mu lɛnga Jelusalɛm. 16Yesu woomableisia lɛnga ti gbuani Siisaria ti toilɔ mu ma ti li ti mu laalo Nesɔn yepɛlaa, mia mu yɛ lima yɛma na. Saipɔs yeendendoo yɛla a ngie tawaa Yesu womableisia yeehaalablaa itaa mia wɔɔ a ngie. 17Ji mu foni Jelusalɛm, Kristimableisia ti gahugbuailɔ waa mu ma. 18Kia ngele woni, Pɔɔl i toilɔ mu ma kɔɔ i li i Jemisi lɔ; tawao Sɔsii gbakoloisia kpɛlɛɛ ti gomɛngɔ yɛla gaama. 19Pɔɔl i vailɔ ti ma i konɛi gbi wie kɔloongɔ ngengei ma i pienga a Ngewɔ gbɔma hu wee nasia lia Juublaa yaa tie. 20Ngi yɛpɛ gbɔyɔngɔi woma, nungaa kpɛlɛɛ ti Ngewɔ latoilɔ. Na wooma ti ndeilɔ Pɔɔl ma tɛɛ, “Mu ndewei, bi tɔnga kia Juublaa yeetauji gbotongaa ti wotenga a lanayablaa, tawao ti kpɛlɛɛ sawei hinda lɔ wa ti lii hu. 21Ti yɛpɛnga a bie ti gama tɛɛ biaa Juubleisa kpɛlɛɛ gaama ti heini nasia lia Juublaa yaa tie kɔɔ ti wounve Mojisi Jawei ma ti kula, bɛ ta ti leengeisia hei biliya tawao taa hitɛ Juublaa ti gɔwuihu. 22Ti humɛninga kɛ bi wanga. Faale gbɔɔ ma pie? 23Na wie ma nde bi ma. Kɔɔnga naani tia mbei ti jondunga kpo. 24Li bi gula ti ma wa tieni wu wuaa komɛ sɛsɛɛ hu bi ti wɔyɛi wie; na mia a wie ta gu ti ti wuisia wole. Ji i wiengaa numu gbi ta kɔɔlɔ kɛ ndɛɛ mia a na kpɛlɛɛ ti ndenga ti ma kɔloongɔ bi ma, tawao kɛ bia vuuli bi loko heingɔi Mojisi jawei bu. 25Kɛɛ nasia Juublaa yaa tie ti gunga lanaya ma, mu kɔlɔ yoyonga ti gama hugɛva a tie kɛ mu heinga woto gɔɔ yila ma mu ndenga kɛ maa ii houni ti mɛhɛɛ gbii mɛ kpuangɔ a saa fengɔ nɔmɔlisia wɛ, kɛɛ ta ŋama gbi mɛ ɔɔ fuuhani na ta lo ngi bolei liigbama i haa tawao jowii sɔɔ nyamu ma.” 26Faale Pɔɔl i kɔɔngɛisia wumbuilɔ folo wekei ma i li a tie taa tieni ti wuaa komɛ sɛsɛɛ hu. Na wooma kɛ i ya Ngewɔ wɛleibu i lɔwɔi gɛ komɛ sɛsɛɛ yeewatii a gbɔyɔ ta saa gbua ti gbi va a ngilangila. 27Ji i loni kulo jii wɔflei i gbɔyɔ, Juungaa lɛnga ti gbuani Esia yeekaka yila ma, ti Pɔɔl lɔilɔ Ngewɔ wɛleibu. Ti faha waa lolilɔ ngi ma ti ngi hou, 28kɛ ti yele gulanga tɛɛ, “Isrɛlbleisa, a wa wu gbɔ mu ma! Taamɔi ji mia a lewe a numu gbi gaa hinda gbi lee loova mu bondeisia baahu, kɛɛ mu jawei, kɛɛ Ngewɔ wɛlei ji!” 29(Ti ji leilɔ jifa ti Trofimɔs lɔilɔ gɛ na a gbua Ɛfisɔs tia Pɔɔl ti tei hu, tawao ti gililɔ la yakpe kɛ Pɔɔl i wuaalilɔ a ngie Ngewɔ wɛlei bu.) 30Tei gbi gɔwɔ gbɛlilɔ, kɛ nungaa lɔ gbuama a sɔkuisia hu gbi wee ta wa a piimɛi, ti Pɔɔl hou ti lo kɛndɛma ti kpua Ngewɔ wɛlei bu. Ngaama kɛ ti yeenɛtɛ laamɛisia gbɔwunga. 31Ti loni lapimaa Pɔɔl waava kɛ ngo i gbuanga i li Rom yee kɔmahɛi gama kɛ ndapi waa yɛ kɛ a gula Jelusalɛm. 32Ngaama kɛ kɔmahɛi i ngi gblangablɛisia lɛnga wumbunga kɛɛ ngi sojeisia ti gindɛ ti yei mia fahii yɛ na. Ji nungaa ti ngi lɔni tia ngi sojeisia, ti gbeilɔ a Pɔɔl lewela. 33Kɛ kugbei i ya Pɔɔl gama, i ngi hou, i pie ti ngi yili a jɔwɔ fele. Na wooma i ngi mɔlilɔ ina yemia a ngie kɛɛ gbɔɔ i pienga. 34Fahii yeekaka lɛnga tɛ i jilɔ wienga, pekeisia tɛ na. Njiɛ hu yɛyaa pitika nahi kɔmahɛi ii guni gbi a pele jɔɔ ndama ma; faale i ndeilɔ yɛ ti wuaa a Pɔɔl gɔlɛi goohu. 35Ti wuailɔ a ngie, kia ti foni fakei gɔɔbu kɛ sojeisia ti ngi wumbunga jifa fahii gbegbangɔ waa yɛla. 36Ti kpɛlɛɛ ti toilɔ ngi woma ta kpoo gula tɛ, “A kpɔyɔ la!” 37Sojeisia ti yɛ kinɛiŋ Pɔɔl wuaama gɔlɛi goohu, kɛ i kɔmahɛi mɔlinga yɛ, “Kɔnɛ ba lumalɔ ngi njɛpɛ hugɛ a bie?” Kɛ kugbei i potenga yɛ, “Ba Glikiyiɛi lelɔ? 38Kɛɛ Ijipt-mɔi yaa gɛ a bie na hiyeni i ndapi nina gulɔ i li a ndapi gɔblaa tauji naani kɔhanisia ti ti yeya mia ŋanya lɔlei hu?” 39Pɔɔl i kpɛmboilɔ yɛ, “Juumɔ mia a nge; ti nya leni Taasɔs lɔ Silisia lɔlei hu, taali mia a nge ngi gbuani taawa goohu. Kɔnɛ pie ngi yɛpɛ nungaa gama.” 40Kɔmahɛi i lumailɔ ngi wɛ, kɛ Pɔɔl loonga fakei yeekpakpawuli hu i ngi lokoi yɛ miamia nungeisia gama. Ji ti mayɛloŋ, Pɔɔl i ndeilɔ ti ma Hibu yiɛi hu yɛ:

will be added

X\