TOBLEISIA TI WIEHINDEISIA 20

1Ji sɔlɛ wai na i gɔlɛni, Pɔɔl i Yesu mableisia lɛilɔ ma a lenga i ndii vulu yɛpɛnga le ti ma, kɛ i vɛlinga ti ma. Na wooma, i gbuɛilɔ i li Masidonia lɔlei hu. 2I liilɔ a yeetatei nasia hu wee i gu na nungeisia ma ti nɛpɔva a ngowili yia gbotongaa. Na wooma, i wailɔ Glis, 3i ngawu sawa gbɔyɔu na. I yɛ kinɛiŋ ngi magbatɛmaa liva Siira lɔɔɛi hu kɛ i humɛninga kɛ Juublaa lɔ hinda hula ma ngi va; faale i ngi lii huyiilɔ i gahɛi i yama Masidonia. 4Sopeta, Pairɔs hindoloi, na gbuani Beria, i toilɔ Pɔɔl ma ti li. Hii mia Aristakɔs tia Sekɔndɔs-ni ti pieni, nasia ti gbuani Tɛsalonika; Gayɔs, na gbuani Daabi, kɛɛ Timoti bɛɛ; kpɛingɔ Taikikɔsi ma taa Trofimɔs, ti gbuani Esia plɔvinsi hu. 5Ti gbuɛilɔ kulɔ ti ti mu mawulo Toasi. 6Mua mu gbuɛilɔ Filipai ji bledii gbama mɛ gomɛi leweni, jii lɔɔlu woma kɛ mu hukpɔnga a tie Toasi, mia mu yɛ na hoki yila va. 7Haala voloi ma hoki hu, mu yandɔɛilɔ a lenga kayema mɛhɛɛ mɛva. Pɔɔl i yɛpɛilɔ nungeisia gama, i lo yɛpɛma kpindi i fo gundia, gbɛva ngi longɔ yɛla i lewe na ma i li folo wekei ma. 8Lambo gbotongaa ti yɛlɔ a vo ngeleya wɛlei yeelomui hu mu gomɛngɔ yɛla na. 9Foninge lakpao yila ngi laa a Utikɔs yɛ heilɔ a wundela we jii i lewenga a ngie ji Pɔɔl yɛ yɛpɛma. Kia jii i ngi houni pandawanda, i gbendɛilɔ ngeleya wɛlei yeesawei hu kɛ i gbanjinga ndɔma, aa yɛ ti mbumbu, ngi haangɔ. 10Kɛɛ Pɔɔl i yeilɔ ndɔmɛi i vombo ngi maahu i ngi gulu yakahu, kɛ i ndenga yɛ, “Wu lii aa hɛlɛ, ndɛvui lɔ lɛ ngi hu!” 11Kɛ i yamanga i lɛ ngeleya wɛlei hu i bledii yali kɛ i mɛnga. I loilɔ yɛpɛma ti gama haaŋ gele i wo, kɛ i gbuanga na i li. 12Nungeisia ti yee foninge wumbuilɔ ti li a ngie ngi vulungɔ, tawao ji ti lii nɛpɔilɔ wa. 13Mu liilɔ gulɔ ndɛndɛi hu mu li Asɔs, mia mu yɛ Pɔɔl wumbuma na. I yɛ ndenga mu ma ji wieva jifa i yɛ lima na a gɔɔma welɔ. 14Ji i mu maleni Asɔs, mu ngi wumbuilɔ ndɛndɛi hu kɛ mu ya Mitileen. 15Folo wekei ma mu gbuɛilɔ na kɛ mu fonga Siɔs yalengahu. Jii yila woma mu wɛilɔ Samas, yee ngele wongɔ wekei ma kɛ mu fonga Mailetɔsi. 16Pɔɔl i yɛ kiliya wienga leweva Ɛfisɔs ma kɔwɔi aa ndɛmbihu wie Esia plɔvinsi hu, jifa ngi magbɛlingɔ yɛla fova Jelusalɛm Pɛntikɔsti volei ma, ina i guilɔ a bɛla ma. 17Pɔɔl i loni Mailetɔsi lɔ i ngowili yoyoo Sɔsii gbakoloisia gama Ɛfisɔs kɔɔ ti wa ti ngi male. 18Ji ti wani, i ndeilɔ ti ma yɛ, “Wu kɔɔlɔ ngi yɛ yeeluvala watii ngi yɛ wu gama, i hiye haala voloi ma ngi wani Esia yakei ma. 19Ngi nya mayeilɔ tawao ngaya gboto i wu nya ma hinda gbɔugbɔisia hu Juubleisia ti yɛ hula ta nda nya ma Ndemɔi magbeei gbuala hu. 20Wu kɔɔlɔ kɛ kpemɛi ngi yɛ ngowili yie le wu ma wu yeekuwuhungaa kɛɛ nga wu gaala, ngii gbɛogbɛ hulɔwuni wu ma aa yɛ a kpɔma wu va. 21Ngi ndahii kpɔtu wuailɔ Juublaa yeya kɛɛ nasia yeya Juublaa yaa tie ngɛ ti wounve ti jumbuisia ma ti wote Ngewɔ gama ti la a mu Lemɔi Yesu. 22Faale na, a koloya hu wee Ngewɔ Yafei gama, nya liileilɔ Jelusalɛm, tao ngii kɔɔ gbɔɔ i ma nya malema na. 23Ngi kɔɔlɔ lekee kɛ taawa gbi hu ngi ma na Ngewɔ Yafei i nya lahiinga kpɔtu kɛ kpindiwɛleibu yiila kɛɛ kpundɛngaa lɔ nya mawulo ma. 24Kɛɛ ngii nya lɛɛvui wumbuni a gbɛ o gbɛ la, aako ngi tɔ lekee ngi fo nya jiei yeekɛlɛmɛi ngi kpɔyɔ a ngengei Ndemɔi Yesu i feni nya wɛ pieva, na yɛni a Ngewɔ yauwandei yee Ngowili Yekpe lelalɔ. 25“Ngi jianga wu kpɛlɛɛ mahu, nga lewea ngoowili yie le kɔloongɔ Ngewɔ Mahayɛi ma. Tawao kiahuna ngi kɔɔlɔ kɛ wu yilayee gbi ɛɛ yaa gbɔma nya lɔ. 26Faale ngi nde haa wu ma kpɔtu a foloi ji kɛ, wu yilayee gbi i longaa hu, ɛɛ lɛ kulo bɛɛ nya wumba. 27Ajifa Ngewɔ liima hinde kpɛlɛɛ ngi koohu lɔwuni wu ma. 28Waa yɛ ngandeemahu wua yekpe va kɛɛ mbalangɛisia kpɛlɛɛ va Ngewɔ Yafei i ti wuaanga wu lokohu. A yɛ a mbaala mahugbeblaa Ngewɔbleisia maahu, nasia Ngewɔ ti wumawoni a ngi Hindoloi haalei hu wee. 29Ngi kɔɔlɔ kɛ nya lingɔi woma fula haningaa ta wuaalɔ wu lia, tawao tɛɛ ndohu kulo bɛɛ va mbalangɛisia wɛ. 30Watii lɔ hitima wama nungaa lɛnga ta gbuaa wu lia ta ndɛɛ gula nasia wɛ ti langɔ a Yesu aako ti ti yaka tova ti woma. 31Faale waa lema, kɛɛ a nda wu nɛmahu kɛ foo sawa lɔ, a folo kɛɛ kpindi, nga wu gaa tao ngaya gboto a wu nya ma. 32“Kiahuna na, ngi wu wuaanga Ngewɔ lokohu kɛɛ ngi woowili yeengauwandei, na a gu i wu loo la wu poohani jɔɔ nasia lia ti sɛnɛya majɔnga. 33Ngii yaa mani wieni numu gani-gole va, ngi gani-gbɔu ɔɔ ngi magula bɛɛ va. 34Wua vuuli bɛɛ wu kɔɔlɔ kɛ ngi yengeni a nya gbɔgbɔ lokoisia lɔ nga gu na gbi lee ma nya kɛɛ nya mbaangɛisia yeemagbewe mu houngɔ. 35Ngi kɛnga a wue kɛ hinda gbi lee hu ngenge kpaukpau ji nyɔkɔ hu wee mia mahoungɔ mu kpɔma gbuana ma pie fɛliblaa ma, ma ya gili a njɛpɛ woisia Ndemɔi Yesu Ndeni, yɛ, ‘baayi waa lɔ numu gɔla ma i lewe tokohu gokola ma.’ ” 36Ji Pɔɔl i kpɔyɔni, i wombi gbakpailɔ tia tieni kpɛlɛɛ ti hɛɛ. 37Ti kpɛlɛɛ ngaya wuilɔ ti ma ta ngi mahouhou kɛɛ ta ngi laagɔmi, 38ndii nyani va i ti hou ji i ndeni yɛ tɛɛ yaa gbɔma ngi lɔ. Na wooma, ti liilɔ ti ngi laalo ndɛndɛi ma.

will be added

X\