TOBLEISIA TI WIEHINDEISIA 11

1Tobleisia tia Yesu mableisia nasia ti yɛ Judia lɔlei hu gbi ti humɛniilɔ kɛ nasia Juu yaa tiaa bɛɛ ti langa a Ngewɔ layie. 2Kia Pita i lini Jelusalɛm, nasia ti yɛ nde tɛɛ mahoungɔ ti nasia Juublaa yaa tie hei biliya ti ngi magbuɛilɔ tɛɛ, 3“Bi hotaya mɛilɔ nasia gɔɔma Juublaa yaa tie tawao wua tieni wu yɛlɔ a loko hitɛ vulii mɛhɛɛ hu!” 4Faale Pita i tɔtoilɔ i na gbi hugɛ i wieni yɛ, 5“Ngi yɛ Ngewɔ vɛlima taa wai na hu ta toli a Jɔpa kɛ ngi henganga. Ngi hani lɔilɔ a gbua ngelegoohu a yei kia kula waa i na, bi tɔaa bɛɛ tiaa houni yeetɔɔhui naani ma ta njei, tawao i gɛlɛni nya gblanga lɔ. 6Ngi kohu gbeilɔ tiŋ kɛ ngi fuuhanisia lɔnga: gɔwɔnaaningaa kɛɛ ndalahaningaa kɛɛ ngelema ŋɔningɛisia. 7Kɛ ngi ngoo mɛninga a nde nya ma yɛ, ‘Hiye, Pita, bi ti waa bi ti mɛ!’ 8Kɛɛ ngi ndeilɔ ngɛɛ, ‘Ngɛi na wie, Ndemɔi! Mɛhɛɛ gbi lekee mu jawei ndeni yɛ nɔhɔngɔe ɔɔ numu ɛɛ mɛ, ii yaa wɔɔ gba wuaani nya lɛi ji hu.’ 9Ngoi i yɛpɛilɔ gbɔma a gbua ngelegoohu yɛ, ‘Hani na Ngewɔ ndenga yɛ sɛwɛsɛwɛngɔe, bia baa nde baa yɛma nɔhɔngɔe.’ 10Ngewɔ i ji leni nya ma heima sawa kɛ ti kulei laalanga ti yaama la ngelegoohu. 11Ngaamɛi na yakpe, kɛ hindo sawa ti ti loni nya gama ta gbua Siisaria, ti longa pɛlei na laa ngi yɛ na. 12Ngewɔ Yafei i ndeilɔ nya ma yɛ mua tieni mu li, ngaa ganga. Mu ndeengaa wɛitei jisia bɛɛ ti gbuɛilɔ Jɔpa mua tieni mu li Siisaria tawao mu gbi mu wuaani Kɔniiliɔs yeepɛlɛbu lɔ. 13I hugɛilɔ a mue kia malikei i gbuani la ngi yaama pɛlei bu, i nde ngi ma yɛ, ‘Numu lo Jɔpa i taamɔ yila loli, ngi laa yakpangɔi mia a Saimɔn Pita. 14A njɛpɛngaa hugɛlɔ a bie na a pie wua bi bondeisia wu bawo.’ 15Tawao kia ngi lini na ngi tɔtoo a yɛpɛla, Ngewɔ Yafei i yeilɔ ti ma kia lɔɔ i yeini wɔɔ mu ma. 16Kɛ Ndemɔi layia yila i hitɛnga nya wɛ, ji i ndeni yɛ, ‘Jɔn i yɛ nungaa wua a njɛi lɔ kɛɛ wua, ta wu wua a Ngewɔ Yafei lɔ.’ 17I lailɔ ke kɛ Ngewɔ lɔ i mawaa hani yakpei na veni nasia wɛ Juublaa yaa tie i feni wɔɔ mu wɛ ji mu lani a Ndemɔi Yesu Kristi; gbɔɔ a nge nga gbekpa Ngewɔ gulɔ!” 18Kia ti ji mɛnini, ti gbeilɔ a ngi magbuala ti Ngewɔ lato tɛɛ, “Kɛ Ngewɔ i pele venga nasia bɛɛ wɛ Juublaa yaa tie wounveva ti jumbuisia ma ti bawo!” 19Ngagbalɛma hindei nasia ti hitɛni la Yesu mableisia wooma Stivin waangɔi wooma i ti huvayailɔ. Ti lɛɛngaa ti liilɔ haaŋ ti foo Fonisia kɛɛ Saipɔs kɛɛ Antiɔk ta Ngowili Yekpei le Juuisia lekee ma. 20Kɛɛ Yesu mablaa yeehingaa lɛɛngaa ti hiyeni Saipɔs kɛɛ Sairini ti liilɔ Antiɔk ti Ngowili Yekpei hugɛ a nasia bɛɛ Juublaa yaa tie kɔlooni Ndemɔi Yesu ma. 21Ndemɔi i yɛ ti wooma lɔ gbɔva ti ma tawao faha waa ti lɛilɔ a Ndemɔi ti wote ngi gama. 22Yee hindei ji yee njɛpɛwo i foilɔ Yesu mablei nasia ma ti yɛ Jelusalɛm, kɛ ti Banabasi loonga Antiɔk. 23Kia i foni na, i kpekpei na lɔ Ngewɔ i pienga a nungei nasia, ngi goohu i nɛɛlɔ waa; tawao i nɔɔilɔ ti ma yɛ ti la a Ndemɔi, ti lɔnya a ngie a ti lii gbi. 24Numu yekpe mia wɔɔ a Banabasi, ngi langɔ a Ndemɔi tawao Ngewɔ Yafei i ngi hu. I pielɔ numu gboto ti wa Ndemɔi gama. 25Na wooma Banabasi i liilɔ Taasɔs Sɔɔl gɔkɔlima. 26Kia i ngi lɔni, i pieilɔ taa ta ti wa Antiɔk. Foo yila ndavengɔ kpauŋ va numu felei jisia ti yɛlɔ Yesu mableisia gama ta faha waa gaa. Antiɔk yese mia wɔɔ ti Yesu mableisia lolini na a Kristimableisia. 27Yee watii na ma Ngewɔ lutu lɛɛngaa ti gbuailɔ Jelusalɛm ti li Antiɔk. 28Ngewɔ Yafei i pieilɔ numu yila, ngi laa a Agabɔs, i hiye i lo, i kulɔmayia le yɛ ndɔlɛ waa yɛkɛ i gula dunyei hu gbi. (Yee ndɔlei i gulani a watii na lɔ Klɔdiɔs i yɛni a Rom Maha Wai.) 29Yesu mableisia ti hugbatɛilɔ tɛɛ numu gbi i na yoyo a gu ma gbɔva ti ndeengɛi nasia ma ti yɛ Judia. 30Ti yeenavoi lɛilɔma, ti njooyo a Banabasi taa Sɔɔl Yesu mablaa yee kpakoleisia gama.

will be added

X\