TOBLEISIA TI WIEHINDEISIA 1

1Nya liimamɔi Tiofilɔs. Nya gɔlɛi yeehaalayei na ngi nyɛini bi gama, ngi ngengei na kpɛlɛɛ wuilɔ hu Yesu i pieni kɛɛ kaai na i yɛ nungaa gaa la i hiye watii na ma i ngi yengei lɔtoni, 2i to foloi na ma Ngewɔ pieni i lɛ ngelegoohu. Pɛiŋ i yaa lɛ ngelegoohu i pieilɔ Ngewɔ Yafei i sawangaa ve nungei nasia wɛ i ti wɔyɔni yɛva a Tobleisia. 3Njii numu fele gbɔyɔngɔ goohu ngi haangɔi wooma, i gɛilɔ a tie kpoto, a kɛ a tie kengelee kɛ kia i vulunga i hiyenga hee hu, ngi vulungɔe keya. Ti yɛlɔ a ngi lɔ leeŋ, a yɛpɛ ti gama kɔlooni Ngewɔ Mahayɛi ma. 4Watii yila kia tia tieni ti yɛ hinda yila, i vɛlilɔ ti ma yɛ, “Waa gbua Jelusalɛm waa li hinda gbi, a mawaa-hani na mawulo nya Kɛkɛ i Lahei wumbuni faa, na ngi yɛ yɛpɛi wu gama kɔlooni ma. 5Jɔn i yɛ nungaa wua a njɛi lɔ kɛɛ lɔwɔ sɛkɛngɔ goohu Ngewɔ a ngi Yafei yeilɔ wu ma i wu wua.” 6Watii weka yila ma kia Yesu i gɛni a tie, ti ngi mɔlilɔ tɛɛ, “Ndemɔi, bi piemaa Isrɛlbleisia ti gbɔma hei tia yekpe va kiahuna?” 7Yesu i ndeilɔ ti ma yɛ, “Nya Kɛkɛ yakpe mia kpaya i ngi wɛ kiti lava hindei jisia ti wielei ma tawao maa ii houni wu kɔɔ migbe lɔ ta wie. 8Kɛɛ ji Ngewɔ Yafei a yei wu ma, Ngewɔ a wu lavelɔ a kpaya yɛva a Selingaa nya va nungaa gbi gama ti Jelusalɛm kɛɛ Judia lɔlei hu gbi kɛɛ Samelia kɛɛ dunyei yeesɔkui hu gbi.” 9Kia i kpɔyɔni a ji lela, i wumbuilɔ ndɔma i lɛ ngelei ma, ti lo ngi gbema a lɛ haaŋ i lohu njagbili hu. 10Ti yaamɛi gbakpangɔ yɛla Yesu ma a lɛ ngelei ma kɛ hindo fele, ndoma goweisia ti ti ma, ti longa ti lia 11tɛɛ, “Wua wu Galiliblɛi jisia, gbɛe wu looni mbei wu yaamɛi gbakpangɔ lekee ngelei ma? Yesu yakpei ji Ngewɔ i ngi hounga wu yeya i pienga i lɛnga ngelegoohu, a walɔ gbɔma kia lɔɔ wu tɔnga i lɛnga ngelegoohu.” 12Hindei jisia ti wieni Ɔlivi Yiyei wumba lɔ. Na wooma tobleisia ti ngiyei yeilɔ ti yaama Jelusalɛm, yeenduahui yɛngɔ lekee a mɛli yeekɛkɛlɛ. 13Ti wuailɔ taa wai hu, ti lɛ ngeleya lomui na hu ti yɛ yii na. Nasia ti yɛ yee komɛi hu tia mia a Pita, Jɔn, Jemisi, Andru, Filip, Tɔmɔsi, Batɔlɔmiu, Matiu, Jemisi (Afiɔs loi) kɛɛ Saimɔn (na ti yɛ toli a ndɔlɔ hinda madi houmɔi) kɛɛ Judas (Jemisi loi). 14Ti kpɛlɛɛ ti yɛlɔ a gomɛ pɛɛpɛ ta Ngewɔ vɛli tuuŋ a ngoyila folo gboto va tia Yesu ndeehingeisia kɛɛ nyaha gboto tia Yesu ngi nje Meri-ni. 15Lɔwɔ lɛɛngaa wooma komɛ i yɛlɔ na nasia va ti langɔ yɛla a Yesu tawao ti guilɔ a numu hɔndɔɔ yila kaalɛ numu gbɔyɔngɔ. Kɛ Pita i hiyenga i yɛpɛ ti gama yɛ, 16“Nya ndeengɛisia, mahoungɔ yɛla Ngewɔ laayie na i ngi Gɔlɛi hu la i hou, na Ngewɔ i puni Devidi laa kɔlooni Judas na ma i loni nungei nasia gulɔ ti lini ti Yesu houni. 17Judas i yɛni wɔɔ a mu yilayee lɔ, Ndemɔi i ngi wumbu yɛva a tomɔɔ kia lɔɔ i mu wumbuni la.” 18(Kɛɛ navoo va lɔ i nyamui na gani, i ndɔlɔma yeya a yeenavoei, kɛ i gulanga gbeleiŋ a wumba wee yeendɔlɔmɛi na, ngi goi i bla fa, ngi wulii gbi i gbua. 19Nungaa gbi ti yɛ Jelusalɛm ti ngi haalei ji humɛnilɔ, famia ti yeendɔlɔmɛi na lolini ti layie hu a Akɛldama, yeembui a “Ŋama Lɔlɔmɛi.”) 20Kɛ Pita i ndenga yɛ, “Ajifa nyɛingɔe Juuisia ti Wule Gɔlɛi hu tɛɛ, ‘Ngi heimi a lombolɔ, numu gbi ɛɛ hei na.’ yɛ gbɔma ‘Numu weka a ngi yengei wumbulɔ.’ 21“Faale mahoungɔe mu numu yila wumbu, a gu a selilaa, kia mu na, kɛ Ndemɔi i hiyeilɔ hee hu. Yeenumui na a gbua nungei nasia lɔ lia mua tieni mu yɛ lewe watii na hu kpɛlɛɛ mua Ndemɔi Yesu-ni mu yɛ lɛ ma yei, i lɔto watii na ma Jɔn i yɛ nungaa wua i to watii na ma Ngewɔ i ngi houni mu yeya i pie i lɛ ngelegoohu.” 23Kɛ ti numu fele laa gɛnga, Josɛf na ti yɛ toli a Basabas (ta gbɔma toli a Jɔstɔs) kɛɛ Matayas. 24Faale ti Ngewɔ vɛlilɔ tɛɛ, “Ndemɔi, bi numu gbi lii huvaa gɔɔlɔ, faale numui na gɛ a mue numu felei jisia lia bi loko longa ngi ma 25tomɔɔ yengei na wieva Judas i wounveni ma liva mia ngi bɛngɔ na.” 26Faale ti tɔtɔ gbɛilɔ kɛ tɔtɔi i Matayas gɛnga, kɛ ti ngi gbɛɛnga toblaa puu maahu yileisia ma.

will be added

X\