3 JƆN 1

1Nya Kpakolei a nge, nya mia ngi kɔlɛi ji nyɛima nya liimamɔi Gayɔs gama na nya longɔ la vulii a tɔnya. 2Nya liima ndiamɔi, nyaa Ngewɔ vɛlima aako hindei gbi hu i gbatɛ bi gama, tawao bi yɛ kaahugbua hu, kia ngi kɔɔngɔ bi yafei gaahu gbuangɔ la. 3Nya goohu i nɛɛilɔ waa ji mu ndeengɛisia lɛɛngaa ti wani mbei ti hugɛ tɛɛ bi hɛlɛngɔ waa le a tɔnyɛi, kia lɔɔ tɔnyɛi gungɔ bi hu watii gbi. 4Hinda gbi ɛɛ nya goohu nɛɛ aa lewe ji nga mɛni tɛɛ nya leengeisia ti hɛlɛngɔe a tɔnyɛi. 5Nya liima ndiamɔi, na mahoungɔ bi pie tamia bi piema ji ba ngenge gbi wie mu ndeengɛisia wɛ, ti yɛ bɛɛ a hotangaa. 6Ti bi lomɛi hugɛnga a Kristimablei nasia ti mbei. Kɔnɛɛ gbɔ ti ma ti jiei hu a pelei na a nɛɛ la Ngewɔ wɛ. 7Ajifa ta ti jiei wumbulɔ Kristi yengei wieva tɛɛ loko hei hani gbi bu nasia tii lani a Ngewɔ ta fe. 8Mahoungɔe hɔɔ, mua Kristimableisia a mue, mu gbɔ ti ma aako mu gbɛɛ ti ma ngengei na hu ti piema tɔnyɛi va. 9Ngi kɔlɔ gutu nyɛilɔ Sɔsiibleisia gama, kɛɛ Dayotɛfis na ndongɔ a tokulɔyei, ɛɛ woolo kulo bɛɛ na ma nga nde. 10Ngi wangaa, yeewatii na mia nga ngi wiehindei kpɛlɛɛ wu ngitiya; njɛpɛ maluwangɔi nasia a nde mu va kɛɛ ndɛi nasia a kuala! Kɛɛ na lekee ii guni a ngie; ɛɛ loko hei mu ndeengɛisia bu ji ta wa, tawao a nasia mabalilɔ ti longɔ a yɛla ti loko hei ti bu, a lapi yɛ i ti gbɛ sɔsii hu. 11Nya liima ndiamɔi, baa hinda nyamu wokɔɔ, kɛɛ na wokɔɔ kpekpengɔ. Numu gbi lekee a kpekpe wie Ngewɔ woo lɔ a ngie. Numu gbi lekee a na wie nyamungɔ, ii yaa Ngewɔ lɔni. 12Numui kpɛlɛɛ lɔ Dɛmitɔs yɛpɛ yekpe lema; tawao tɔnyɛi vui bɛɛ lɔ ngi jeli wua ma. Mua seli wuaama i gbɛɛ ti ndɛisia ma, tawao bi kɔɔlɔ kɛ na ma nde tɔnya le. 13Hinda gboto lɔ na ndeva bi ma kɔlɛi ji hu kɛɛ maa ii houni ngi nyɛi kɔlɔ hu; 14nya lii lɔ bi lɔla ma hugutungɔ tawao ma gulɔ mu hei yaama mu yɛpɛ. 15Ndiilɛli i yɛ bi ma. Bi ndiamɔisia gbi ta va bi ma. Va mu ndiamɔisia kpɛlɛɛ ma a ngila-ngila.

will be added

X\