2 TIMOTI 4

1Nyaa bi laahima kpɔtukpɔtu Ngewɔ yaama kɛɛ Yesu Kristi, na i wama fuublaa gbɛmbova kɛɛ haablaa, tawao jifa taa wama yɛva a Mahɛi, 2ngɛɛ bi yɛ a Ngewɔ wowili le nungaa ma, bi nɔɔ ndela ma; nde-gbelei i nyande nungaa wɛ ɔɔ ii nyandeni, pie ti kɔɔ gbɔɔ mahoungɔ pieva, kɛɛ ti kɔɔ ji ta hinda gbulanga tawao bi ti lii nɛpɔ, ya pie a ndiihou ji ba yɛ ti gama. 3Watii a hitilɔ nungaa tɛɛ wolo kaa wɔnangɔ ma, tawao ta to ti liima hindeisia lɔ ma, ta kaamɔisia mato lɛma tuuŋ, yeekaamɔɛisia tɛɛ kaa weka gɛ kɛlee na yeenungeisia ti wolii hu i yangema mɛniva. 4Ta gbelɔ a wolola Ngewɔ wowili lɔnyangɔi ma, ti wolo dɔmi gbamɛisia ma. 5Kɛɛ mahoungɔ bi gu bi lii ma hinda gbi hu; gu hinda gbɔugbɔu bu, Ngowili Yekpei lela yengei wie, bi bi mahindei gbi wie kia mahoungɔ Ngewɔ yengemɔɔ i pie. 6Nya nya va, watii i hitinga nya gbuava a saa; watii i hitinga nya va ngi gbua dunyei ji hu. 7Ngi nya sɔbɛi gbi wienga piimɛi hu ngi piema wɔɔ, ngi wiimɛnga ngi fonga famia mahoungɔ ngi gɛlɛ na, tawao ngii gbeni a lala a Ngewɔ. 8Kiahuna na kɔi ngi fayani yeemawai na Ngewɔ a fe pɔɔnablaa wɛ taa nya mawuloma, mawali na Ndemɔi, Njialemɔ wɔnangɔi, a fe nya wɛ Folei na ma tawao ɛɛ fe nya yaangɔ wɛ, a fe nungei nasia gbi lɔ wɛ ti longɔ a ngie, ti ngi mawuloma gbuava nga. 9Lapi a bi sɛmbɛi yii gbi bi wa nya gama kaakaa. 10Diimas i longa a dunyɛi ji hu-haniisia, i vayanga nya ma i ya Tɛsalonika. Klisɛnsi i ya Galesia, tawao Taitɔs i ya Dalmesia. 11Luki yakpe lɔ mua ta mu mbei. Bi yaa wama wua Maaki wu wa ajifa a gulɔ a gbɔla nya ma nya yengei hu. 12Ngi Taikikɔsi longa Ɛfisɔs. 13Bi yaa wama bi wa a nya lomawai ngi ndoni Toasi a Kaapɔs; wa a bukuisia bɛɛ, kakayee yeenasia ti nyɛingɔ hua-kɔlɛisia ma. 14Ngaimɔi Alɛksanda i nyamu waa wieilɔ a nge; na i pienga Ngewɔ a ngi pawalɔ a yeepawei. 15Bia vulii bi mahugbe a ngie ajifa ngi lolongɔe a mu wowili hulewengɔ. 16Numu yakpe bɛɛ ii loni nya wooma haala watii na ngi yɛ nya yekpe magaoma Kotii hu; ti gbi ti vayɛilɔ nya ma. Ngewɔ aa yeekpalɛ gbua ti ma! 17Kɛɛ Ndemɔi i yɛlɔ nya wooma tuuŋ tawao i kpaya wuailɔ nya hu nahi ngi gu ngi ngowili gbi hugɛ gbalauŋ aako nasia Juublaa yaa tie ti kpɛlɛɛ ti mɛni; tawao i nya bawoilɔ tii nya lɛɛni nya waava. 18Tawao Ndemɔi a nya gbualɔ hinda nyamu gbi hu, i li a nge panda ngi Mahayɛi hu ngelegoohu. Ngɔɔlɔya i yɛ ngi ma kunafɔ kɛɛ kunafɔ ! Amiina. 19Nga va kaka Plisila taa Akuila ma kɛɛ Onɛsiforɔs mawɛlɛbublɛisia. 20Irastɔs i longa poma Kɔlinti tawao ngi Trofimɔs loni Mailetɔsi lɔ jifa ngi heegbɛngɔ yɛla. 21Lapi a bi sɛmbɛ yii gbi wava nya gama pɛiŋ kɔlɛ watii i yaa lɔto. Yubiulɔs, kɛɛ Piudɛns, kɛɛ Lainɔs kɛɛ Klɔdia ta va kaka bi ma tia Kristimablaa wekɛisia gbi. 22Ndemɔi i yɛ tuuŋ a bi mahugbe. Ngewɔ i ngauwanda gɛ a wu kpɛlɛɛ.

will be added

X\