Titus 3

1Titus, bua bisisi joug rusnok jah suma juens deika jeskaseda rua rugif gu rerin ebirfager monuh nomnaga fogora ruroru mar nomnaga ongga rerin ebirfager runcunc gu rua fob ojgomu. Rua risejah rudou efesi jeskaseda rita mar nomnaga ongga erek oufamofa tein. 2Enadaij nou rua ruhurmei mar gij rusnok egema tein guru. Tina rua rita rudou ongga eriagamaga jera rusnok nomnaga noba rufij rua tein. Noba rua ruin keingg risinsa rufoka rot tenten skoita rusnok nomnaga ojgomu. 3Sis fob mifmin mudou efesi ongga osumsumu rot mar insa koma nomnaga tein. Gij mona insa koma bera mimif mugif gu mar ongga oska nomnaga ongga oroku mudou efesi rot ojgomuja. Mifmin mudou ongga ejisei rot mar ongga rusnok enjgineg rerin ojgomuja, jefeda mudou ofogog rot rua. Noba mudou oska moguma ojgomuja. 4Erek koma tina gij mona ongga Allah ocunc efen odou ongga oufamofa skoita mimif, beda Ofa oskotu mimif jeska mifmin mar ongga oska. 5Noba Allah onoskotu mimif oisouska mar ongga oufamofa ongga misinsa muntunggom fob jinaga guru. Tina Ofa oskotu mimif oisouska Ofa esinsa efen odou ongga eriaga rot mimif ojgomu. Ofa onskotu mimif oisouska Efena Ebsi ongga engker gij mudou efesi fogora eita eiteij ah ongga efeinah gu mimif. Jefeda mimif minja erek rusnok ongga efeinah deika. 6Noba Ofa eita Efena Ebsi insa koma gu mimif rot odou ongga oufamofa oisouska Yesus Kristus ongga onskotu mimif jeska mifmin mar ongga oska fob. 7Ofa ontunggom mar insa koma jeskaseda mimif misma mudou ongga ebsi komowa oisouska efen odou ongga oufamofa rot mimif ojgomu. Beda mimif muisum gij Ofa rot oida mimif mimesma eiteij ah ongga ah aibin fogora Ofa emeita mar ongga oufamofa eteb gu mimif erek efen efeser. 8Mar ongga didif danggot insa koma bera erek tentenmen ojgomu. Noba bua buftuftu mar insa koma rot ahais gu rusnok jah suma jeskaseda rua ongga rudou eredi rot Allah fob bera rumoh rudou efesi ahais rot mar ongga oufamofa ojgomu. Jeska mar ongga oufamofa insa koma bera erek ongkoska eteb nou rusnok nomnaga. Noba mar koma omofij rua si. 9Bua bibes bifaga jeska rusnok ongga ruga emesedema rot mar ongga erek rourou ni, jera mar ongga rusnok rimfesij osok gij rerin rufou ebiedi ni, era mar ongga rua ruga omosokuma rot ojgomuja ni. Jeska mar insa koma bera onofij rusnok egema tein jinaga guru. 10Erek osnok egens oftuftu mar ongga orotunggom rusnok fogora rimekeinggma rot, beda biyahehir joug ofa rot ojgomu. Tina erek ofa onororu buga insa koma guru, beda biyahehir joug ofa juens deika. Tina erek ofa onororu buga insa koma tein guru, beda bibes bifaga jeska osnok egens koma ojgomu. 11Jeska osnok egens koma bera efen odou ongga ofogog ojgomu. Ofa odou os ororu mar ongga oska ojgomuja. Jefeda oisouska esinsa efen eita mar ongga oska bera ofa emesma okum eteb jeska Allah si. 12Didif dumobk Artemas era Tikhikus skoita bua si. Jefeda gij mona ongga gegema gen skoita bua fob, beda bireni rot ahais jeskaseda bin skoita didif jah kota Nikopolis. Jeska didif dimeker gij kota egens koma onjoros mona ongga mof meifeni oisa fob. 13Noba bua bufij Zenas, ongga ot deismos rot rusnok skoita Hakim jera Apolos tein gij mona ongga goga genja jeskaseda gegan maat jera mar enjgineg tein ongga adaij fogora gefarur gij Allah oga ojgomu. 14Bua buftuftu mifmin muhujir nomnaga jeskaseda rua ruh rudou efesi ahais rot mar ongga rimfarur gij ojgomuja. Beda orofosut mona bera rerin mar ongga ofoufem nou rua fogora rineker gij riteij ah kef erek rourou guru. 15Rusnok nomnaga ongga ringker jah sif ruisu gu bua. Noba bua tein buisu gu mefmen mohujir nomnaga ongga rudou okora rot memef. Didif duis gu Allah jeskaseda Ofa ocunc efen odou ongga oufamofa eteb skoita bua ojgomuja. Ainsoma.

will be added

X\