Titus 1

1Surat egens kef jeska didif Paulus. Didif direk osnok egens ongga omfij Allah. Noba Yesus Kristus oncunc didif erek efen rasul egens ongga omfij Ofa fob. Allah tein enjeka didif erek koma fogora obk didif jeskaseda dija skoita efen rusnok ongga Ofa oncunc fob. Beda didif dufij rua jeskaseda rumororu Ofa efen oga rot ahais noba jeskaseda ruroun rua skoita Ofa ongga efen oga ongga tenten. Koma bera oisouska mar ongga didif duftuftu rot efen oga insa koma gu rua. 2Noba oisouska efen oga insa koma bera mimif muisum gij Ofa nou eiteij ah ongga ah aibin ojgomuja. Allah onocuwei mar jinaga guru, noba gij mona ongga sis dojunmeni bera Ofa anggen rot oida Ofa emeita eiteij ah insa koma gu rusnok si. 3Noba gij mona ongga Ofa esinsa anggot rot fob bera Ofa ocunc rot eiteij ah insa koma oisouska efen oga ongga oufamofa. Noba Ofa oncunc didif jeskaseda dijefesij rot efen oga insa koma gu rusnok enjgineg. Jefeda didif dita mar insa koma oisouska Ofa efen owesa efek ojgomuja. 4Didif disa surat egens kef gu bua Titus, ongga dudou okora rot erek dedin edesa egens tein. Jeska bua tein bunroru Yesus Kristus morototuma erek didif fob. Didif duis gu mifmin mika Allah jera Yesus Kristus, ongga onskotu mimif jeska mifmin mar ongga oska fob, jeskaseda Ofa ocunc efen odou ongga oufamofa skoita bua noba eita eiteij ah ongga eskeiramera gu bua tein ojgomuja. 5Sis fob didif dubk bua jeskaseda biker gij motowohu Kreta fogora buftuftu osok gij mar nomnaga rot omoisa gu rusnok jah suma. Noba didif dubk bua jeskaseda bucunc rusnok rineya erek ebirfager Mod Ari gij orofosut kota egens egens tein. 6Gij mona insa koma didif duftuftu bua rot mar erek kef oida: Rua ongga rijerek ebirfager Mod Ari bera rerin rita mar ongga oufamofa ojgomu. Rua ruskotu ruhoner egensmes ojgomu. Noba rerin riser tein ruroru Yesus Kristus rot tenten, noba rua rinerek ruforoker ongga rutunggom mar ongga oska guru, era ongga rukoja rot mar ongga riker ruftuftu gu rua guru. 7Rua ongga rijerek ebirfager Mod Ari bera rutunggom mar ongga Allah odou os rot ojgomu. Jefeda rusnok ongga rimejerek ebirfager Mod Ari bera rerin rita mar ongga ongkoskamoka ojgomu. Rua rinerek rusnok ongga risitit risinsa rerin rufoka guru, noba runotkonu oska ebeirens skoita rusnok enjgineg tein guru. Rua ribirfaga enerebibei rot mofut efei tein guru. Rua rineita mar ongga ofogog skoita rusnok enjgineg guru, noba rua rudou eneftirir keingg fifi ojgomuja guru. 8Ongga oufamofa bera rua ruroun rusnok gij rerin mod rot rudou ongga oufamofa ojgomu ni, rudou ot rot mar ongga ongkoskamoka ojgomuja ni, rut joug rudou efesi rot ahais osok gij mar ongga oska tein ni, rita mar rot rudou ongga aharukamoka ojgomu ni, ricira gij mar nomnaga ongga rua ranggen rot ojgomuja ni. 9Rua ruroru oga ongga oufamofa ongga mimif mumftuftu gu rua rot ahais ojgomu. Jeska oga insa koma bera tenten noba ororu jeni mar ongga mimif nomnaga muftuftu rot fob. Beda rua tein rimeita owesa efek jeskaseda risisi joug rusnok enjgineg rot Yesus oga insa koma ongga erek tenten. Beda oisouska oga ongga oufamofa insa koma bera rua rumocunc oida rusnok ongga riretei rot rerin ruga insa koma bera runsujohu rot mar ongga tenten guru. 10Erek koma jeska rusnok rufoukou bera rungkoja rot mar ongga mimif mumftuftu rot fob. Noba rua rurokrusa rusnok enjgineg rot mar ongga rua runsujohu rot tein. Noba rua ongga Yahudi ongga ruroru Yesus fob bera runtunggom mar erek koma ekirsa jeska rusnok enjgineg. 11Bagot joug rusnok insa koma, jeska mar insa koma ongga rua ruftuftu rot bera orotunggom rusnok enjgineg rudou eineina gij mar ongga tenten jera mar ongga oska ojgomu. Noba rua ruftuftu rot mar insa koma jeskaseda risma fifi ofoukou ojgomu. Noba koma bera erek oska ekirsa ojgomu. 12Rusnok jeska motowohu Kreta insa koma risinsa rerin nabi egens ongga anggot sis fob oida, "Rua ongga motowohu Kreta bera rucuwei mar ofoukou. Rua rirek mar ongga oska ojgomu, noba rua rudou ot rot jeskaseda rit maat ofoukou doska ojgomu, tina rudou eskes rot mar enjgineg." 13Erek koma jefeda bua buftuftu rua rot buga ahais jeskaseda rua rumororu Allah oga rot tenten ojgomu. 14Butunggom erek koma jeskaseda rua runororu rusnok Yahudi rerin erebent ongga erek rourou ojgomuja guru. 15Rusnok ongga rerin rudou ongga ebsi komowa bera ruroru mar ongga erek oufamofa ojgomu. Tina rusnok ongga rudou ahtaboku rot rerin mar ongga oska noba ongga runororu Yesus Kristus guru bera ruhca mar ongga oska ojgomuja. Jeska mar ongga angh gij rudou efesi fob jera mar ongga rua runsujohu rot bera erek oska ojgomu. 16Rua ragot oida rua bera ruroru Allah oga rot tenten fob. Tina gij mona ongga mimif mik mar ongga oska ongga rua runtunggom fob, beda mimif mijginaga rot oida rua runororu Allah oga rot tenten jinaga guru. Rua rudou oska rot rusnok enjgineg ojgomuja, noba rerin owesa efek jeskaseda rita mar ongga oufamofa jinaga guru.

will be added

X\