Roma 9

1- 3Didif dudou oubsaha ojgomuja rot dedin rusnok Israel, jeska rua rukoja Yesus fob. Didif dudou os eteb rot oida dedin rusnok Israel ruroru Yesus Kristus fogora Allah oskotu rua tein jeska rerin mar ongga oska. Noba erek Allah ofra mar okum keingg didif noba ekeba Didif jeska Yesus Kristus jeskaseda dedin rusnok Israel ruroru Yesus ojgomu, beda didif duitij rot mar insa koma tein. Mar ongga danggot ainsa kef bera erek tenten ojgomu. Jeska didif dudou egens jera Yesus Kristus fob. Noba Efena Ebsi Allah ongga engker gij dudou efesi fob bera ocunc rot mar ongga tenten jera mar ongga erek tenten guru. 4Sis fob eteb bera Allah ocunc rua ongga Israel noba ejeka rua erek Ofa efen efeser. Beda Ofa ocunc rot efen eskeiramera eteb gu rua ni. Ofa agot eimofoj rot mar ofoukou gu rua ni. Ofa eita efen hukum oisouska Musa gu rua ni. Ofa oftuftu rua rot teinefa rua rugif gu Ofa gij efen mod ni. Ofa anggen rot mar ofoukou gu rua ni. 5Rua bera ongga runjuj jeska Abraham jera Ishak jera Yakub. Noba Yesus Kristus bera onjuj jeska rua rerin rimower tein. Ofa bera ongga ofoka ereij keingg mar nomnaga erek Allah tein. Mimif muis oufamofa eteb gu Ofa ojgomuja, Ainsoma. 6Koma onorocunc rot oida Allah eneita rusnok rufoukou gu Abraham ongga erek efen rusnok ongga runjuj Jeska ofa guru. Jeska ahah Allah eiteij bera rusnok ebic nomnaga ongga runjuj jeska Israel rineja erek Ofa efen rusnok rot tenten guru. 7Noba erek rusnok rufoukou runjuj jeska Abraham, tina ahah Allah eiteij bera rua nomnaga rineja erek Abraham efen rusnok tein guru. Jeska sis fob Allah anggot gu Abraham oida, "Didif dumocunc dudou ongga oufamofa skoita rusnok ongga runjuj jeska bebin ebesa Ishak ojgomu." 8Jefeda mimif mik rot oida Allah enejeka rusnok nomnaga ongga runjuj jeska Abraham erek efen efeser guru. Tina rusnok ongga runjuj jeska Abraham oisouska Ishak ongga Ofa anggen rot gu Abraham sismeni fob bera erek efen efeser ongga tenten ojgomu. 9Erek koma jeska Allah anggen mar erek kef oida, "Gij ari mega ofoj egens deika beda Didif dumoksons, noba bebin obhona Sara omok efen efesa orna egens si." 10Erek koma tein, Ishak efen mahona Ribka bera eker rot efen efeserga. 11- 12Tina gij mona ongga ofa onojuj rot efen efeserga insa koma enesi, beda Allah agot gu Sara oida, "Bebin ebesa ongga osumbohka bera omougif gu efen mokosa si." Allah anggot mar insa koma sismeni fob jeskaseda orocunc rot oida Ofa eita mar ororu jeni efen odou ejginaga rot ojgomu. Noba mar insa koma bera enen jeska mar ongga rusnok runtunggom guru. 13Erek koma jeska runggu gij Mar Efeyi Ebsi rot mar ongga Allah anggot oida, "Didif dudou okora rot Yakub, tina dudou oska rot efen mokora Esau." 14Jefeda rineya jeska iwa isujohu rot oida Allah ontunggom mar ongga oska fob, jeska Ofa odou oska rot Esau insa koma. Tina iwa inosujohu rot mar erek koma guru. 15Jeska idou ah keingg rot mar ongga Allah anggot gu Musa sis fob. Ofa agot oida, "Didif duga bera eris rot idu ongga dudou okora rot jera idu ongga ducunc dudou ongga oufamofa skoita ojgomu." 16Jefeda Allah onocunc rot idu bera erek efen rusnok ongga tenten oisouska mar ongga rua risinsa rudou os rot era rutunggom guru. Tina Ofa ocunc rot idu ongga erek efen rusnok oisouska efen odou ongga oufamofa skoita rua ojgomu. 17Koma bera erek mar ongga Musa onggu keingg osok gij mar ongga Allah anggot gu raja Mesir sis eteb fob. Allah agot gu ofa oida, "Didif dufra bufoka erek aksa eteb jeskaseda gij mona ongga bua bukoja dedin duga beda Didif dumorocunc rot dedin owesa efek ongga eteb ekirsa skoita rusnok nomnaga. Beda rusnok gij monuh ofoukou bera rimeg rot dedin dufoka ongga aksa ekirsa jeska mar nomnaga." 18Jefeda oisouska mar insa koma bera mimif mijginaga rot oida Allah esinsa oga eris rot oida Ofa omocunc efen odou ongga oufamofa skoita rusnok si. Noba Ofa esinsa tein bera ongga oga eris rot idu ongga Ofa omotunggom erek ombrera ojgomu erek raja Mesir insa koma. 19Erek koma beda rineya jeska iwa rijeka rot oida, "Erek Allah otunggom rusnok fogora rita mar oisouska Ofa odou ejginaga rot, beda teinefa fogora Ofa ocunc mimif erek rusnok ongga rerin mar ongga oska erek komo?" 20Tina edohuji, enadaij nou rusnok ragot mar erek insa koma sons skoita Allah guru. Jeska Allah bera ongga ontunggom mimif nomnaga. Koma erek debeji ongga osnok egens ontunggom fob. Debeji koma enagot gu osnok egens ongga ontunggom debeji insa koma oida, "Teinefa fogora bua butunggom didif erek kefo," erek koma guru. 21Jeska osnok egens insa koma oga eris rot oida ofa emera mebi ekeni fogora omorotunggom debeji egens ongga efen eirirbi noba efera osok eteb. Noba ofa eita mebi ekeni egema fogora omorotunggom debeji ongga efen efera ojuj tein. 22Erek koma tein, Allah bera ongga oga eris rot mar ongga Ofa omotunggom rot rusnok nomnaga ojgomu. Noba ongga tenten bera, Ofa ensejah nou ofra mar okum eteb keingg rusnok fogora orocunc rot efen owesa efek eteb. Jeska sis fob Ofa ensejah nou eita mar okum eteb gu rusnok ojgomu. Tina Ofa oin keingg odou efesi rot rua noba eneita mar okum gu rua enesi. 23Ofa eita mar erek koma jeskaseda orocunc rot teinefa Ofa efen odou ongga okora eteb rot mimif fogora emeita oufamofa eteb gu mimif si. Jeska sis fob bera Ofa ensejah nou eita mar ongga oufamofa eteb gu mimif tein. 24Ofa enjeka rusnok rineya jeska rua ongga Yahudi jera rineya jeska rua ongga Yahudi guru jeskaseda rija erek Ofa efen rusnok. 25Koma tenten jeska runggu gij Mar Efeyi Ebsi rot mar ongga Allah anggot erek kef oida, "Ebeibeyaif rusnok ongga dudou onokora rot enesi bera gij mona kahma beda Didif dumocunc rua erek dedin rusnok. Noba Didif dudou omokora rot rua tein si." 26Noba runggu tein oida, "Sis fob Allah agot gu rusnok gij rerin monuh rot oida rua bera enerek Ofa efen rusnok guru. Tina gij mona kahma beda Ofa emejeka rua gij rerin monuh insa koma erek Allah, ongga efena ebah, efen efeser." 27Noba gij Mar Efeyi Ebsi bera nabi Yesaya tein agot mar osok gij rua ongga Yahudi. Ofa agot oida, "Rua ongga Israel bera erek riskemba doska. Rua bera erek mebsta ongga angh gu mei mojumu efembra. Tina rusnok oskiyai jeska rua bera rimesma eiteij ongga efeinah ojgomu. 28Jeska Tuhan omofra mar okum eteb keingg rusnok mebif rot ebeirens jeni erek Ofa anggot rot sis fob si." 29Noba nabi Yesaya agot rot rusnok ongga angh gij mona kahma ros oida, "Sis fob Allah onghoda rot mifmin mimowa Yahudi. Tina Ofa odou os rot jeskaseda Yahudi ebic egensmes ojgomu rifena ebah ros. Jeska erek Ofa onodou os rot koma guru, beda rusnok Yahudi nomnaga bera rimeseiseifa si. Koma erek rusnok gij kota Sodom jera rusnok gij kota Gomora tein ongga Allah onghoda rot fogora rusnok insa koma nomnaga riseiseifa ojgomu fob." 30Erek koma jefeda, mimif mijginaga rot oida rusnok ongga Yahudi guru bera runohca moroju jeskaseda Allah omocunc rua erek efen rusnok ongga rudou efesi komowa guru. Tina rua rik rot oida oisouska rudou ongga ororu Yesus Kristus bera Allah omocunc rua erek efen rusnok ongga rerin mar ongga oska oskiyai tein guru. 31Rusnok ongga Yahudi bera ruroru hukum Musa jeskaseda risma rudou ongga ongga efen mar ongga oska oskiyai tein guru. Tina rua rinesma rudou ongga ebsi komowa erek koma guru. 32Rua rineita mar insa koma oisouska rudou ongga ororu Allah rot tenten guru. Tina oisouska mar ongga rua risinsa runtunggom fob bera rua rusujohu rot oida rimesma rudou ongga ebsi komowa si, tina guru. Jeska rua rukoja Kristus egens koma ongga Allah ombk jeskaseda oskotu rusnok. Koma erek rusnok ongga rukockereta mamu ongga ahais jefeda risiri ojgomu. 33Noba sis eteb fob bera nabi Yesaya onggu rot mar insa koma ongga omorogna gij mona kahma. Gij mar insa koma Allah agot oida, "Iwa ig kef rot iskusk fog, jeska gij mona kahma beda Didif dumobk osnok egens jah Yerusalem ongga erek mamu egens ongga ahais. Rusnok rudou omoska rot Ofa fogora rua rimesiri erek rusnok ongga rukockereta mamu ongga ahais fogora risiri. Tina rusnok ongga ruroru Ofa bera mojen rua rot jinaga guru."

will be added

X\