Roma 8

1Erek koma jefeda erek rusnok rerin rudou ongga eja erek egens jera Yesus Kristus fob, beda Allah onoga ojga rot oida rua rimagos guru. 2Erek koma jeska mar ongga oska insa koma ongga angh gij mudou efesi fob bera efen owesa efek jeskaseda orotunggom mimif fogora mimagos rot. Tina oisouska mudou ongga eja erek egens jera Yesus Kristus fob bera owesa efek jeska Efena Ebsi osuwa mimif jeska mifmin mar ongga oska. Beda mimif misma eiteij ah ongga efeinah. 3Hukum Musa efen owesa efek jeskaseda ofij mimif bera enah guru. Jeska mimif mudou os mutunggom mar ongga hukum insa koma eyahehir joug ojgomu. Tina Allah bera ongga omfij mimif fob. Jeska Ofa ombk efen efesa Yesus gu mebif. Ofa en gu mebif rot efen efaga jera efen odou efesi ongga erek rusnok giskini. Ofa en jeskaseda agos nou mifmin mar ongga oska. Beda Allah odou onokum skoita mimif deika guru. Jeska oisouska mar ongga Yesus ontunggom fob bera mifmin mar ongga oska enah gu mimif deika guru. 4Allah otunggom mar insa koma jeskaseda mar nomnaga ongga hukum Musa anggot rot bera angh gij efera fob. Jeska ebeibeyaif mimif mineker gij miteij ah kef oisouska mudou efesi ongga efen mar ongga oska deika guru. Tina mimif miker oisouska Efena Ebsi Allah efen owesa efek ojgomu. 5- 6Rusnok ongga riker gij rerin riteij ah kef oisouska mar ongga angh gij rudou efesi ros bera ruroru mar insa koma ojgomu. Jefeda rua rimeja eseiseifa rot ojgomu si. Tina rusnok ongga riker gij rerin riteij ah kef oisouska mar ongga Efena Ebsi oncunc gu rua fob bera ruroru mar insa koma ojgomu. Jefeda rua risma eiteij ongga efeinah noba ongga eskeira tein si. 7Noba erek rusnok ruroru mar ongga angh gij rudou efesi ojgomu ros, beda enadaij nou rua ruroru hukum Allah rot tenten guru. Jeska rudou efesi bera okoja rot hukum insa koma ojgomuja. 8Noba erek rusnok ruroru mar ongga angh gij rudou efesi ojgomu beda enadaij nou rua rita mar ongga orotunggom Allah odou eskeiramera rot rua jinaga guru. 9Erek koma tina iwa inerek rusnok ongga ruroru mar ongga oska ongga ah gij rudou efesi ojgomu guru. Jeska Efena Ebsi Allah bera engker gij idou efesi fob, noba iwa iroru mar ongga Ofa oncunc gu iwa ojgomu. Erek koma tina erek Efena Ebsi jeska Yesus Kristus eneker gij rusnok rudou efesi guru, beda rua rinerek Ofa efen rusnok tein guru. 10Mimif nomnaga muntunggom mar ongga oska fob, jefeda mifaga emagos rot si. Tina oisouska Yesus Kristus bera Efena Ebsi engker gij mudou efesi fob. Jefeda mimif mimesma eiteij ongga efeinah. Jeska Allah bera oncunc mimif erek rusnok ongga rerin mar ongga oska oskiyai tein guru. 11Oisouska Efena Ebsi Allah bera Ofa omfra Yesus Kristus jeska agos fogora Ofa esma eiteij ongga efeinah deika fob. Noba jeska Efena Ebsi insa koma engker gij idou efesi tein, beda Allah omofra iwa tein jeska yanggos fogora imesma eiteij ah ongga efeinah sons morototuma jera Yesus Kristus. 12Erek koma jefeda, edohuji, ongga oufa bera mimif mineker gij miteij ah kef oisouska mar ongga angh gij mudou efesi deika guru. 13Jeska erek mimif miker oisouska mar ongga angh gij mudou efesi ojgomu, beda mimif mimeja eseiseifa rot si. Tina oisouska owesa efek jeska Efena Ebsi Allah bera mimif maha mar ongga oska insa koma jah ojgomu. Beda mimif mimesma eiteij ah ongga efeinah si. 14Erek rusnok ruitij rot oida Efena Ebsi encira rot rua ojgomu, beda rua bera erek Allah efen rusnok rot tenten. 15Jeska Efena Ebsi ongga Allah ombk skoita iwa fob bera onotunggom iwa fogora imeesa rot Allah erek rusnok ongga rimeesa rot rerin ebirfaga egens guru. Tina oisouska Efena Ebsi insa koma bera mimif minja erek Allah efen efeser fob. Noba oisouska owesa efek jeska Efena Ebsi bera mimif magot oida, "Allah, Bua bera erek mifmin Mika." 16Jeska oisouska mar ongga Efena Ebsi oncunc gu mimif gij mudou efesi fob bera mimif mijginaga rot tenten oida mimif mirek Allah efen efeser fob. 17Noba, jeska mimif mirek Allah efen efeser fob, beda mimif mimesma mar ongga oufamofa eteb ongga ah aibin jeska Ofa si. Noba mar nomnaga ongga Allah ensejah nou Yesus Kristus fob bera mimif tein mimesma morototuma jera Ofa si. Jeska erek mimif mita mifera okora morototuma erek Yesus Kristus eita efera okora sis fob, beda mimif mimesma mar ongga ongkoskamoka morototuma jera Ofa tein si. 18Gij mona ebeibeyaif bera mar okum ereneni mimif ojgomuja. Tina erek mimif miremenima jeni mar okum insa koma jera mar ongga ongkoska eteb ongga Allah emeita gu mimif, beda mar okum insa koma bera erek ai osufou nou mimif ojgomu. 19Mar nomnaga ongga Allah ontunggom fob bera omom odou nou mona kahma ojgomu. Jeska gij mona insa koma bera Ofa omocunc oufamofa eteb skoita mimif ongga erek efen efeser. 20Mar nomnaga ongga Allah ontunggom bera rudou os rita mar jeni erek Ofa odou os rot ojgomu. Noba rua rireni rot ahais, tina rineita guru. Tina koma bera ororu Allah odou ejginaga rot ojgomu fob. 21Ofa ontunggom mar erek koma jeskaseda rua ruisum gij Ofa rot oida gij mona kahma beda rua rineker gij rifaga ongga etefa ojgomu guru, tina rua rumosuwa jeska rerin mar ongga oska noba rimesma oufamofa eteb jeska Ofa erek efen efeser si. 22Koma erek ojaga egens ongga efaga okum rot efesa. Ofa odou eriyema nou mona ongga engker rot efesa insa koma fob. Beda erek koma tein ebeibeyaif mar nomnaga ongga Allah ontunggom fob bera erek rudou eriyema rot nou mona ongga rimesma mar ongga oufamofa insa koma ongga Ofa emeita tein si. 23Tina mimif tein bera mudou eriyema askesi mimif mumom mudou nou mona ongga Allah osuwa mimif jeska mifaga ongga etefa insa kef. Noba mimif minsma Efena Ebsi jeska Allah erek mar ongga osumbohka fob. Jeska gij mona kahma bera Allah emeita mar nomnaga ongga ongkoskamoka noba ongga orocunc rot oida mimif bera erek efen efeser rot fob. 24Noba, jeska mimif muisum gij Allah rot mar insa koma, beda Ofa onskotu mimif fob. Tina erek rusnok rinsma mar ongga rua ruisum gij fob, beda rua runoisum gij rot mar insa koma deika guru. Jeska rua risma mar insa koma fob. 25Tina mimif muisum gij mar ongga minek gu miteij enesi ojgomu. Jefeda mimif muin keingg mudou efesi rot ahais noba miker nou mar insa koma ojgomu. 26Erek koma tein, Efena Ebsi bera ofij mimif gij mona ongga mudou efesi eja erek ofonskos rot fob. Beda mimif minejginaga rot mar meidu ongga mimif mum miteij gu Allah rot koisoisa enesi. Tina askesi mimif mum miteij gu Allah ros, beda ainsa koma tein Efena Ebsi omofij mimif fogora Ofa emera efen oga ongga ekirsa jeska mar ongga mimif manggot gu Allah tein si. 27Noba Allah, ongga eyajga joug gij rusnok rudou efesi, bera ejginaga rot mar ongga Efena Ebsi osujohu rot tein. Jeska Efena Ebsi erejgei mar nou mimif gu Allah ororu jeni Allah odou ejginaga rot. 28Allah enjeka mimif jeskaseda mutunggom mar ororu jeni Ofa odou ejginaga rot. Noba mimif mijginaga rot oida Ofa omofij mimif gij mar nomnaga ongga mimif mutunggom jeskaseda mimif misma oufamofa eteb jeska Ofa ojgomu. Ofa eita mar erek koma nou rusnok nomnaga ongga rudou okora rot Ofa. 29Jeska gij mona ongga sismeni fob bera Allah ejginaga rot idu ongga emeja erek efen efeser. Noba Ofa ensejah gij odou efesi jeskaseda rua insa koma rimeja morototuma erek efen efesa Yesus Kristus. Ofa otunggom mar erek koma jeskaseda Yesus bera erek osumbohka rot efen mokoser jera meyerer rufoukou tein. 30Noba rua insa koma ongga Ofa ensejah rot sis fob bera Ofa ejeka erek efen efeser fob. Rua ongga Ofa ejeka erek efen efeser fob bera Ofa oncunc rua erek rusnok ongga rudou ebsi komowa tein fob. Noba rua ongga Ofa oncunc erek rudou ebsi komowa insa koma fob bera Ofa eita ofoka ongga aksa eteb gu rua tein fob. 31Allah bera ongga ofij mimif gij mar insa koma nomnaga. Jefeda enadaij nou rusnok egema tein riragou joug rot mar insa koma jinaga guru. 32Ofa enejgi joug efen efesa gu mebaga guru, tina Ofa obk efen efesa insa koma skoita mimif jeskaseda agos nou mifmin mar ongga oska ojgomu. Noba, erek Ofa oh efen efesa nou mimif erek koma fob, jefeda Ofa emeita mar enjgineg tein ongga oufamofa eteb gu mimif rot odou ongga eskeiramera tein si. 33Mimif bera ongga Allah oncunc erek efen rusnok fob. Noba Ofa oncunc mimif tein erek rusnok ongga rudou ebsi komowa fob. Jefeda enadaij nou rusnok egema tein rucunc mimif erek oska deika guru. 34Enadaij nou rusnok egema tein ragot oida mifmin mar ongga oska enahuma ros jinaga guru. Jeska Yesus Kristus esinsa bera ongga onot deismos nou mimif skoita Allah ojgomuja. Ofa bera ongga anggos nou mimif fob, tina Ofa tein bera ongga endebecki jeska anggos fogora ensma eiteij ongga efeinah fob. Noba ebeibeyaif bera Ofa eker desi Allah gij mebaga fob. 35Jefeda enadaij nou mar egema tein ekeba mimif jeska Yesus Kristus ongga odou okora rot mimif jinaga guru. Erek rusnok rufra mar okum keingg mimif ni, erek rusnok rita efera okora gu mimif ni, erek mosona ongk mimif eteb ni, erek micira rot meisoufa ongga ebgebga ni, erek mar ongga ofogog en skoita mimif ni, erek rusnok rudou os ragob mimif ni, beda enadaij nou mar insa koma nomnaga ekeba mimif jeska Yesus Kristus ongga odou okora rot mimif jinaga guru. 36Koma erek mar ongga runggu gij Mar Efeyi Ebsi sis eteb fob. Rua runggu rot oida, "Allah, rusnok ongga rufogog rudou os ragob mimif jeska mimif bera erek bebin rusnok. Rua rusujohu rot oida mimif bera erek mar ongga ragob ojgomu morototuma erek rua ragob domba-domba tein." 37Erek koma tina askesi mar okum insa koma ah keingg mimif ros, beda mimif miker rot ahais ojgomuja oisouska Yesus Kristus ongga odou okora rot mimif. 38Didif dusujohu rot oida enadaij nou mar egema tein ekeba mimif jeska Allah, ongga odou okora rot mimif jinaga guru. Erek mimif manggos ni, era mifena ebah ros ni, era malaikat ni, era efena ofogog ni, era mar ongga angh gij mona deisef ni, era mar ongga angh gij mona kahma ni, era mar ongga efen owesa efek eteb ni, 39era mar ongga angh gu mebaga ni, era mar ongga angh gu mebif ni, era mar egema tein ongga Allah ontunggom ni, enadaij nou mar insa koma nomnaga ekeba mimif jeska Allah ongga odou okora rot mimif jinaga guru. Noba Ofa oncunc efen odou ongga okora rot mimif insa koma oisouska mifmin Tuhan Yesus Kristus fob.

will be added

X\