Roma 6

1Erek koma jefeda, rineya jeska iwa rusujohu rot oida, "Skoidu, mimif nomnaga mutoiru gij mifmin mar ongga oska ojgomu jeskaseda Allah omocunc efen odou ongga oufamofa skoita mimif erek ogun dokun deika si." 2Tina erek koma jinaga guru. Jeska mimif manggos jeska mifmin mar ongga oska morototuma jera Yesus Kristus gij mona ongga Ofa anggos fob. Jefeda enadaij nou mimif mutoiru gij mar insa koma deika jinaga guru. 3Jeska iwa ijginaga rot oida mimif misma baptis erek orocunc rot oida mimif manggos morototuma jera Yesus Kristus fob. Beda koma tein orocunc rot oida mifmin mudou eja erek egens jera Ofa fob. 4Jefeda gij mona ongga mimif mita baptis insa koma beda koma erek mimif manggos fob, noba rusnok risah mimif gij moksu morototuma erek rusnok rinsah Yesus gij moksu tein sis fob. Mimif mita mar insa koma jeskaseda murocunc gu rusnok enjgineg rot oida mimif mita mar rot mifmin riteij ah ongga efeinah fob. Koma morototuma erek Yesus Kristus ongga esma eiteij ongga efeinah gij mona ongga efen meka Allah ofra Ofa jeska anggos oisouska efen owesa efek ongga eteb doska. 5Jefeda erek mimif mita mudou egens jera Yesus Kristus ongga anggos fob, beda mimif tein mimedebecki jeska manggos morototuma erek Ofa endebecki jeska anggos sis fob. 6Jeska gij mona ongga Yesus Kristus anggos tumu mega salib fob, beda erek koma tein mimif ongga mifmin mar ongga oska, bera manggos morototuma jera Ofa. Ofa otunggom mar insa koma nou mimif jeskaseda mifmin mar ongga oska insa koma efen owesa efek onoin keingg mimif deika guru. Jefeda ebeibeyaif mimif munougif gu mar ongga oska ongga ah gij mudou efesi deika guru. 7Erek koma jeska gij mona ongga osnok egens agos fob, beda ofa onsuwa jeska mar ongga oska efen owesa efek fob. 8Noba erek mimif manggos morototuma jera Yesus Kristus fob, beda mimif mijginaga rot oida mimesma eiteij ah ongga efeinah morototuma jera Ofa tein. 9Mimif mijginaga rot oida Yesus Kristus endebecki jeska anggos fob. Jefeda Ofa enagos deika jinaga guru. Mar egema tein onotunggom Ofa fogora agos deika jinaga guru. 10Ofa anggos rot ofosma egens ojgomu jefeda mar egema tein onorotunggom Ofa fogora agos deika guru. Ebeibeyaif Ofa ensma eiteij ah ongga efeinah deika fob, noba Ofa eker morototuma jera Allah ojgomuja. 11Erek koma tein, iwa bera irek rusnok ongga ranggos fob, jeska yeyin mar ongga oska efen owesa efek onoin keingg iwa deika guru. Tina ebeibeyaif bera iwa insma eiteij ah ongga efeinah fob, noba yeyin idou enja erek egens jera Allah oisouska Yesus Kristus tein fob. 12Iwa inorons rot yeyin mar ongga oska ah gij idou efesi ojgomuja guru. Jeska mar insa koma bera oroku idou efesi fogora imesiri gu mar insa koma deika sons ojgomu. 13Allah eneita yeyin ifaga jeskaseda irotunggom mar ongga oska rot guru. Tina ongga oufamofa bera iwa yaha isinsa skoita Allah erek rusnok ongga ranggos noba ongga rinsma eiteij ongga efeinah fob. Yufra Ofa efen ofoka erek aksa oisouska yeyin ita mar ongga oufamofa ojgomu. 14Jeska ebeibeyaif bera yeyin mar ongga oska efen owesa efek onoin keingg iwa deika guru. Noba koma enen jeska iwa yuisum gij hukum Musa rot idou ongga ebsi komowa deika guru. Tina koma en jeska Allah ongga oncunc efen odou ongga oufamofa skoita iwa fob. 15Erek koma jefeda rineya jeska iwa bera rusujohu rot oida rua ruroru mar ongga oska ojgomu, jeska hukum Musa enah gu rua deika guru. Noba rua rusujohu rot oida Allah omocunc odou ongga oufamofa skoita rua ojgomuja. Tina erek koma jinaga guru. 16Jeska erek iwa yaha isinsa skoita rusnok enjgineg jeskaseda rufij rua, beda iwa yugif gu mar ongga rua ranggot rot ogjomu. Erek koma tein, erek iwa iroru mar ongga oska ojgomuja, beda koma erek iwa yugif gu mar insa koma ojgomuja ros fogora iteij ah emeseiseifa rot si. Tina erek iwa iroru Allah oga noba yugif gu Ofa ojgomu, beda iwa isma idou ongga efen mar ongga oska oskiyai tein guru ahah Allah eiteij. 17Erek koma noba mimif muis oufamofa eteb gu Allah, jeska sis fob iwa yugif gu yeyin mar ongga oska erek osnok egens ougif gu efen ebirfaga ojgomuja. Tina ebeibeyaif bera iwa yugif gu Allah oga ongga tenten rot idou ongga ongkasmos ojgomu. Erek koma jeska sis fob rusnok ruftuftu iwa rot oga insa koma. 18Koma erek iwa insuwa isinsa jeska yeyin mar ongga oska ongga oin keingg iwa sis fob. Noba ebeibeyaif iwa yugif gu mar ongga ongkoskamoka ojgomu. 19Mar ongga didif dimfesij rot insa kef bera erek mar ongga orocunc gu iwa jeskaseda idou ebriyi rot koisoisa osok gij efen ofou. Jeska idou efesi erek enahais joug mar ongga oska enesi. Sis fob iwa yugif gu mar ongga oska jera mar ongga ofogog ongga angh gij idou efesi odudu deika ojgomuja erek osnok egens ougif gu efen ebirfaga ojgomuja. Jefeda ebeibeyaif didif duis gu iwa jeskaseda iwa yugif gu mar ongga erek oufamofa ojgomu erek osnok egens ongga ougif gu efen ebirfaga. Jeska mar koma bera ongga orocunc iwa erek rusnok ongga rudou ebsi komowa. 20Sis fob iwa bera erek rusnok ongga rugif gu rerin ebirfaga ojgomuja, jeska iwa yugif gu yeyin mar ongga oska ojgomuja. Gij mona insa koma iwa inougif gu mar ongga oufamofa ongga Allah odou os rot guru. 21Tina mar insa koma bera onofij iwa oskiyai tein jinaga guru. Noba ebeibeyaif mar koma bera mojen iwa erek eteb ojgomu. Jeska rusnok ongga rutunggom mar ongga oska erek insa koma bera rija eseiseifa rot. 22Erek koma tina ebeibeyaif Allah onsuwa iwa jeska yeyin mar ongga oska fob. Noba iwa inja erek rusnok ongga rugif gu Allah rot tenten ojgomuja fob. Noba koma bera orofij iwa, jeska mar insa koma bera ongga eita idou ongga ebsi komowa fogora iwa imesma eiteij ah ongga ah aibin tein. 23Rusnok nomnaga ongga runtunggom mar ongga oska bera rimeja eseiseifa rot si. Koma bera erek rerin rufons rot. Tina eiteij ah ongga ah aibin bera en jeska Allah oisouska mifmin Tuhan Yesus Kristus ojgomu. Noba koma bera erek mar ongga oubji jeska Ofa.

will be added

X\