Roma 4

1Ebeibeyaif mimif musujohu rot mifmin mimowa Abraham. Idou ah keingg rot mar ongga Allah ontunggom jeskaseda ocunc Abraham erek osnok egens ongga efen mar ongga oska oskiyai tein guru. 2Jeska erek mar ongga Abraham esinsiyai ontunggom bera ereita odou ongga efen mar ongga oska guru ahah Allah eiteij, beda adaij nou ofa esitit esinsa efaga rot ojgomu. Tina enadaij nou ofa esitit rot esinsa erek koma jah Allah odou guru. 3Jeska iwa idou ah keingg rot mar ongga runggu gij Mar Efeyi Ebsi osok gij Abraham sis fob. Mar egens insa koma agot oida, "Abraham ororu Allah rot tenten, jefeda Allah oncunc ofa erek osnok egens ongga efen mar ongga oska oskiyai tein guru." 4Iwa tein isujohu rot mar ongga orocunc rot erek kef oida, erek osnok egens ongga emfarur, beda ofa emesma efen ofons rot. Noba efen ofons insa koma bera enerek oubji guru, tina ofa esma ofons insa koma jeska emfarur rot ojgomu fob. 5Erek koma, tina erek osnok egens onotunggom mar jeskaseda esma odou ongga efen mar ongga oska guru, noba ofa ororu rot oida Allah osuna rot rusnok rerin mar ongga oska, beda Allah omocunc ofa erek osnok egens ongga efen mar ongga oska oskiyai tein guru. 6Erek koma tein, raja Daud onggu gij Mar Efeyi Ebsi sis fob rot oida rusnok rudou erirei eteb, jeska Allah ocunc rerin rudou erek ebsi komowa fob. Noba rua runotunggom mar ongga oufamofa jeskaseda risma rudou ebsi komowa erek insa koma guru. Tina Allah eita rudou ongga erek insa koma rot oubji ojgomu. 7Raja Daud agot oida, "Oufamofa eteb nou rusnok, jeska Allah onsuna rot rerin mar ongga oska fob. Noba Ofa onofra mar okum keingg rua rot deika guru. 8Rua rudou efaga ouka ojgomu, jeska Allah odou enah keingg rot rerin mar ongga oska insa koma deika guru." 9Allah onocunc rusnok Yahudi risinsiyai erek rerin rudou ongga ebsi komowa ojgomu guru. Tina Ofa ocunc rusnok ongga Yahudi guru tein erek rusnok ongga rerin mar ongga oska oskiyai tein guru. Allah ocunc Abraham erek osnok egens ongga efen mar ongga oska oskiyai tein guru, jeska ofa ororu Allah oga rot tenten fob. 10Tina iwa isujohu rot koisoisa osok gij mona kenefo fogora Allah oncunc ofa erek osnok egens ongga efen odou ebsi komowa erek insa koma. Jeska Allah oncunc Abraham efen odou erek insa koma gij mona ongga ofa eneris efen ofom mareij ofos jeska enesi. 11Noba gij mona kahma deika, beda ofa ororu mar ongga Allah anggot rot fogora eris ofom mareij ofos jeska. Noba koma erek mar ongga orocunc rot oida, oisouska odou ongga ororu Allah rot tenten fob bera Allah oncunc Abraham erek osnok egens ongga odou ebsi komowa. Jefeda ofa erek osumbohka rot rusnok nomnaga ongga rineris rufom mareij ofos jeska enesi, tina ruroru Allah oga rot tenten ojgomuja jeskaseda risma rudou efesi ongga ebsi komowa. 12Abraham bera erek osumbohka tein rot rusnok Yahudi ongga riris rufom mareij ofos jeska erek ofa tein. Tina rua tein ruroru Allah oga ongga tenten morototuma erek ofa sis fob. Jeska Ofa ororu Allah oga rot tenten gij mona ongga ofa eneris efen ofom mareij ofos jeska enesi. 13Gij mona ongga sismeni fob bera Allah anggen gu Abraham rot oida ofa jera efen rusnok ongga runjuj jeska ofa bera rimesma oufamofa eteb jeska Ofa. Tina Abraham enesma oufamofa insa koma oisouska hukum Musa ongga ofa omororu guru. Ofa esma oufamofa insa koma jeska ofa ororu mar ongga Allah anggen insa koma rot tenten. Noba Allah oncunc ofa erek osnok egens ongga efen mar ongga oska oskiyai tein guru. 14Tina erek rusnok risma rudou ongga ebsi komowa jeska rua ruroru jeni hukum Musa ojgomu, beda rudou ongga ororu Allah oga rot tenten bera onofij rua jinaga guru. Noba mar ongga Allah anggen rot gu Abraham bera onofij rua tein jinaga tein guru. 15Jeska hukum Musa agot oida rusnok rimesma okum eteb jeska Allah rot rerin mar ongga oska. Noba erek hukum egens enahuma guru, beda enadaij nou rusnok rikirsa rot hukum egens guru. 16Jefeda oisouska rusnok rudou ongga ororu Allah oga rot tenten fob bera rua risma rudou ongga ebsi komowa jeni erek Ofa anggen rot sismeni fob. Allah odou os erek koma jeskaseda rusnok risma rudou ongga ebsi komowa erek insa koma oisouska Ofa odou ongga oufamofa rot rua ojgomu. Jefeda rusnok nomnaga ongga ruroru Allah rot tenten erek Abraham ororu Ofa sis fob bera rimesma mar ongga Ofa anggen rot si. Koma nou rusnok Yahudi ongga ruroru hukum Musa ojgomu guru. Tina koma tein nou rusnok nomnaga ongga ruroru Allah oga rot tenten ojgomu erek Abraham. Ofa bera ongga ororu Allah oga rot tenten fogora esma odou ongga efen mar ongga oska guru rot sismeni. 17Mar insa kef bera erek tenten ojgomu. Jeska runggu gij Mar Efeyi Ebsi rot oida, "Didif duncunc bua Abraham jeskaseda bija erek dedin rusnok ebic ofoukou rerin rika." Erek koma noba ahah Allah eiteij bera Abraham erek mifmin mika jeska ofa bera ongga ororu Allah oga rot tenten sismeni fogora esma mar ongga Allah anggen rot fob. Jeska efen odou ororu rot tenten oida Allah efen owesa efek nou ofra rusnok jeska ranggos. Noba ofa ororu rot tenten oida mar ongga Allah anggot rot nou mona kahma bera omorogna si. 18Gij mona insa koma bera mar egema tein onocunc gu Abraham rot oida ofa emesma efen efesa egens ongga Allah anggen rot gu ofa sis fob guru. Erek koma tina ofa oisum gij Allah rot tenten ojgomu. Jefeda Allah ocunc ofa erek osumbohka rot rusnok ebic ofoukou ongga rimesma rudou ongga ebsi komowa oisouska rudou ongga ororu Ofa rot tenten. Jeska Allah agot gu ofa erek kef oida, "Gij mona kahma beda rusnok ongga rumororu Didif morototuma erek bua buroru Didif bera rumofoukou doska si." 19Allah agot mar erek insa koma gu ofa fob, tina gij mona insa koma bera ofa erek onokona eteb fob. (Ofa efen ari mega ofoj erek wuntin egens fob). Noba efen mohona tein ojonokona noba ebsei ojgomu. Erek koma tina ofa efena enesiri rot mar ongga Allah anggen rot gu ofa guru, tina ofa ororu efen oga insa koma ojgomuja. 20Erek ofa odou efeneinei rot, tina ofa ororu mar ongga Allah anggen rot insa koma erek ahais ekirsa ojgomuja. Noba ofa ois oufamofa eteb gu Allah rot mar ongga Ofa emeita gu ofa gij mona kahma si. 21Erek koma jeska ofa ororu rot tenten oida Allah efen owesa efek adaij nou otunggom mar ongga Ofa anggen rot si. 22Jefeda runggu gij Mar Efeyi Ebsi sis fob osok gij Abraham oida, "Ofa ororu Allah rot tenten fob, jefeda Allah ocunc ofa erek osnok egens ongga efen mar ongga oska oskiyai tein guru." 23Noba mar ongga runggu gij Mar Efeyi Ebsi insa koma bera onosok gij Abraham ojgomu guru. 24Tina mar insa koma ongga runggu rot fob bera osok gij mimif tein. Jeska ebeibeyaif bera Allah oncunc mimif tein erek efen rusnok ongga rerin mar ongga oska oskiyai tein guru. Koma jeska mifmin mudou ororu Allah oga rot tenten fob. Noba Ofa bera ongga omfra Yesus Kristus jeska anggos fob. 25Yesus bera ongga aha esinsa jeskaseda agos nou mifmin mar ongga oska. Beda Allah omfra Ofa jeska anggos jeskaseda mimif tein misma mudou ongga ebsi komowa ahah Ofa eiteij.

will be added

X\