Roma 3

1Erek koma jefeda, erek rusnok riris rerin rufom mareij ofos jeska, beda koma onorocunc rot oida rua bera erek ongkoska ekirsa jeska rusnok enjgineg guru. Jefeda rineya rijeka oida, "Erek mimif miris mufom mareij ofos jeska, beda koma ofij mimif erek teinefa? Noba mar meidu ongga orocunc rot oida mimif ongga Yahudi bera mifmin mufoka ongga ekirsa jeska rusnok ongga Yahudi guru?" 2Didif dumoroun gu rua insa koma oida, tenten mimif bera erek Yahudi. Noba koma bera ofij mimif ojgomu. Jeska gij mona ongga sismeni bera Allah eita efen oga ongga oufamofa skoita mifmin mimower ongga Yahudi ojgomu. 3Tina rineya jeska iwa rijeka oida, "Mifmin mimower rineya runororu Allah efen oga insa koma rot tenten guru. Jefeda Allah eneita mar gu mimif jeni erek Ofa anggen rot sis fob gurei?" 4Erek koma guru, jeska rusnok nomnaga rucuwei mar moguma, tina mar nomnaga ongga Allah anggen rot bera erek tentenmen ojgomu. Koma erek mar ongga raja Daud onggu gij Mar Efeyi Ebsi sis eteb fob. Ofa onggu oida, "Erek rusnok ruhurmei mar rot bebin buga, tina buga nomnaga bera erek tentenmen. Noba rusnok nomnaga rudou emebriyi gij mar insa koma si." 5Rusnok rineya ongga rudou osumsumu eteb rot bera ragot erek kef oida, "Skoidu, mimif mita mar ongga oska ojgomu. Jeska erek rusnok enjgineg rik mifmin mar ongga oska insa koma, beda koma bera orofij rua. Jeska oisouska mifmin mar ongga oska rua rimejginaga rot oida mar insa koma ongga Allah eyahehir joug bera erek tentenmen ojgomu. Noba koma erek mimif mufij Allah oisouska mifmin mita mar ongga oska insa koma. Jefeda enadaij nou Allah ofra mar okum keingg mimif rot guru." Yo, rusnok rineya ragot mar rourou erek koma fob. 6Tina mimif mijginaga rot oida mar ongga rua rusujohu rot insa koma bera enerek tenten guru. Jeska Allah oga ojga rot rusnok erek edamokuma ojgomu. Jefeda Ofa omoga ojga rot rusnok mebif nomnaga rot rerin rita mar erek edamokuma tein si. 7Noba rusnok ongga rudou osumsumu eteb ragot oida, "Erek rusnok riremenima jeni mimif ongga mucuwei mar jera Allah ongga onocuwei mar guru, beda rua rumofra Allah ofoka erek aksa eteb ojgomu. Noba koma erek mifmin mita mar ongga oska insa koma orofij Allah jeskaseda esma efen ofoka ongga aksa. Jefeda enadaij nou Allah ofra mar okum keingg mimif rot mifmin mar ongga oska insa koma guru." 8Erek mar ongga rua ragot rourou insa koma bera tenten ei, beda ongga oufa bera mimif nomnaga mita mar ongga oska ojgomuja jeskaseda Allah esma ofoka ongga aksa eteb deika ojgomu ei. Tina erek koma guru. Noba rusnok rineya ruhurmei mar rot didif tein. Jeska rua ragot oida didif bera duftuftu mar rourou erek insa koma gu rusnok enjgineg, tina guru. Allah omofra mar okum keingg rua rot si. Noba koma bera erek tenten ojgomu. 9Jefeda mimif musujohu rot mar insa koma nomnaga erek teinefa? Enadaij nou mimif musujohu rot oida Allah omocunc odou ongga oufamofa skoita mimif ongga Yahudi, tina Ofa ocunc odou ongga oska rot rusnok ongga Yahudi guru, erek koma guru. Jeska didif dimfesij gu iwa fob rot oida Allah omofra mar okum eteb keingg rusnok nomnaga ongga rerin mar ongga oska si. Koma tenten rot rusnok ongga Yahudi morototuma jera rusnok ongga Yahudi guru. 10Erek koma jeska, sis fob runggu gij Mar Efeyi Ebsi erek kef oida, "Osnok egens tein ongga efen odou ongga ebsi komowa bera enofoguma jinaga guru ni. 11Osnok egens tein ongga odou ebriyi gij Allah oga bera enofoguma jinaga guru ni. Osnok egens tein ongga ereneni rot ahais jeskaseda eita odou egens jera Allah bera enofoguma jinaga guru ni. 12Rusnok nomnaga bera ringkikif jeska Allah noba rungkoja Ofa ojgomu ni. Rusnok nomnaga bera onofoufem skoita Allah guru ni. Osnok egens tein eneita mar rot odou ongga ebsi komowa jinaga guru ni. 13Mar ongga rusnok nomnaga ranggot rot bera oska eteb erek mar agos efen emba ongga oska eteb ni. Rua rurokrusa rusnok enjgineg oisouska mar ongga ranggot ni. Noba mar ongga rua ranggot bera orotunggom rusnok enjgineg fogora rifera okora rot, erek magosu ongga eska rusnok fogora rita efera okora gu rua ni. 14Rua ragot mar ofogog jera mar ongga oska eteb skoita rusnok enjgineg ni. 15Rusnok rudou ot ebeirens jeskaseda ragob rusnok enjgineg ni. 16Noba orofosut monuh ongga rua ruira gij bera eja erek oska. Beda rusnok jah suma tein rita efera okora jeska rua ni. 17Rusnok rinejginaga rot teinefa rua rufij rusnok jeskaseda riker morototuma erek eskeira moguma guru ni. 18Rua runougif gu Allah jinaga guru ni." 19Erek koma noba mimif mijginaga rot oida hukum nomnaga ongga Allah eita oisouska Musa bera nou rusnok Yahudi. Noba rua rumororu hukum insa koma nomnaga ojgomu. Jefeda enadaij nou rusnok egema tein ruga erahah rot mar skoita Allah osok gij mar okum ongga Ofa omfra keingg rua rot jinaga guru. Noba Allah oncunc rusnok nomnaga erek rerin rita mar ongga oska fob. 20Jefeda rusnok egema tein rinesma rudou ongga ebsi komowa ahah Allah eiteij oisouska hukum Musa ongga rua ruroru jeni jinaga guru. Ongga tenten bera hukum Allah insa koma orocunc gu mimif rot oida rusnok nomnaga rerin mar ongga oska fob. 21Erek koma tina, ebeibeyaif bera Allah oncunc gu mimif fob rot teinefa mimif misma mudou ongga ebsi komowa ahah Ofa eiteij. Koma enen jeska mudou ongga ororu jeni hukum Musa nomnaga guru. Noba mar insa koma bera runggu rot gij hukum Musa tein fob. Noba nabi-nabi jeska mona ongga ensis bera runggu gij Mar Efeyi Ebsi osok gij mar insa koma tein fob. 22Allah ocunc rot oida mimif bera erek rusnok ongga rerin mar ongga oska deika guru. Noba koma bera oisouska mudou ongga ororu Yesus Kristus rot tenten fob. Noba Allah eita mar erek koma nou rusnok Yahudi jera rusnok ongga Yahudi guru, nomnaga ongga ruroru Yesus Kristus fob. 23Jeska rusnok nomnaga runtunggom mar ongga oska fob. Noba rusnok nomnaga rineita mar ongga ongkoska jeni erek Allah odou os rot guru. 24Noba oisouska Allah odou ongga oufamofa eteb bera Ofa oga ojga rot oida Ofa omocunc rusnok rudou erek ebsi komowa. Ofa omotunggom mar koma jeskaseda osuna rot rusnok rerin mar ongga oska jeska rudou efesi. Noba mimif misma mar insa koma oisouska Yesus Kristus ogufu ongga eya nou mimif fob. 25Allah oncunc Ofa erek osnok egens ongga emagos nou rusnok nomnaga rerin mar ongga oska. Noba mimif misma mudou ongga ebsi komowa oisouska mudou ongga ororu rot tenten oida Yesus ogufu eya jeska efaga tumu mega salib nou mimif fob. Noba Allah ontunggom mar insa koma jeskaseda orocunc rot oida Ofa bera eita mar ongga tenten rot rusnok nomnaga. Jeska gij mona ongga dektek fob bera Ofa oin keingg odou efesi noba onofra mar okum keingg rusnok rot rerin mar ongga oska enesi. 26Ofa otunggom mar insa koma jeskaseda orocunc gu rusnok gij mona ebeibeyaif rot oida Ofa eita mar nomnaga rot tenten ojgomu. Noba Ofa oncunc oisouska odou ongga tenten oida rusnok nomnaga ongga ruroru Yesus fob bera erek rusnok ongga rerin rudou ebsi komowa rot tenten fob. 27Erek koma jefeda enadaij nou mimif misitit misinsa mifaga rot oida mimif misma mudou ongga ebsi komowa oisouska hukum Musa ongga muroru jeni guru. Tina rusnok risma rudou ongga ebsi komowa ahah Allah eiteij oisouska rudou ongga ororu Yesus Kristus rot tenten ojgomu. 28Jeska mimif mijginaga rot oida Allah bera ongga ocunc rusnok rudou efesi erek ebsi komowa. Noba Ofa eita mar erek koma oisouska mudou ongga ororu Yesus Kristus ojgomu. Ofa eneita mar koma oisouska hukum Musa ongga mimif muroru jeni guru. 29Enadaij nou iwa ongga Yahudi isujohu rot oida Allah omoroun iwa erek efen rusnok ojgomu guru. Jeska Allah omoroun rusnok ongga Yahudi guru ongga ruroru Yesus fob erek efen rusnok tein. 30Ofa esinsiyai ojgomu bera ongga ocunc rusnok ongga Yahudi erek ebsi komowa oisouska rudou ongga ororu Ofa rot tenten. Noba Ofa bera ongga ocunc rusnok ongga Yahudi guru tein erek ebsi komowa oisouska rudou ongga ororu Ofa rot tenten. 31Jefeda erek rusnok rusujohu rot oida hukum Musa onofoufem deika guru, beda koma enerek tenten guru. Jeska oisouska mudou ongga ororu Allah rot tenten bera mimif mucunc rot oida hukum Musa bera erek tenten ojgomu.

will be added

X\