Roma 14

1Iwa icunc idou ongga eriaga skoita rusnok enjgineg ongga rudou eineina gij rot mar ongga erek oska jera mar ongga oufamofa ojgomu. Yuga onomosokuma jera rua osok gij mar ongga rua rusujohu rot guru. Noba iwa inagot oida mar ongga rua rutunggom bera erek oska tein guru. 2Erek koma jeska rusnok rineya rusujohu rot oida adaij nou rua rit maat ebireira ongga rudou os rot ojgomu. Tina rusnok rineya bera rudou eineina gij rot mar ongga oufamofa jera mar ongga oska ros. Jeska rua rusujohu rot oida rusnok rit marfok ojgomu, noba maat enjgineg bera guru. Rua rusujohu rot oida maat enjgineg bera erek oska ojgomu. 3Noba rusnok enjgineg bera rusujohu rot oida maat nomnaga bera erek oufa ojgomu. Tina enadaij nou rua rucunc rusnok ongga rit marfok ojgomu erek rusnok ongga rudou osumsumu rot guru. Noba rusnok enjgineg rusujohu rot oida rimet marfok bera oufa ojgomu. Tina enadaij nou rua rucunc rusnok ongga rit maat ebireira erek oska tein guru. Jeska Allah oroun rusnok ebic egeka koma tein erek efen rusnok fob. 4Rusnok ongga rit maat ongga erek toga jeska iwa bera rufij Allah erek efen rusnok tein. Jefeda enadaij nou iwa icunc Allah efen rusnok insa koma ongga rumfij Ofa erek oska guru. Jeska rua insa koma bera ongga rusujohu rot oida mar ongga rua rutunggom bera erek oufa era erek oska ahah Allah eiteij ojgomu. Noba mar ongga rua rutunggom nou Tuhan bera erek oufa ojgomu, jeska Tuhan bera ongga ofij rua rot ojgomuja. 5Rusnok rineya rufra mona egens jeskaseda rugif gu Allah erek ekirsa jeska mona enjgineg. Noba rineya rusujohu rot oida gij mona nomnaga bera adaij nou rugif gu Allah ojgomu. Ongga ofoufem bera mimif muroru jeni mar ongga mimif musujohu bera erek tenten ojgomu. 6Jeska rusnok enjgineg rusujohu rot oida rua rufra mona egens erek ekirsa jeskaseda rugif gu Tuhan gij mona egens koma. Noba rua bera rutunggom mar insa koma nou Tuhan ojgomu. Noba rusnok enjgineg rusujohu rot oida adaij nou rua rit maat ebireira. Noba rua rutunggom mar koma nou Tuhan ojgomu. Noba rua ruis oufamofa eteb gu Allah rot maat insa koma tein. Erek koma tein, rineya ongga rit maat erek marfok ojgomu bera rutunggom mar koma nou Tuhan. Noba rua ruis oufamofa eteb gu Allah rot tein. 7Erek koma jeska mimif mineker gij miteij ah kef jeskaseda mita mar ongga orotunggom misinsa erek eskeira rot ojgomu guru. Noba mimif minagos jeskaseda mudou eskeira rot misinsa guru. 8Tina mimif miker jeskaseda mutunggom mar ongga ereita Tuhan odou eskeira rot ojgomu. Noba gij mona ongga mimif manggos, beda mimif mudou os jeskaseda Tuhan odou eskeira rot koma tein. Jefeda gij mar egeka insa koma bera mimif musujohu rot mar ongga ereita Tuhan odou eskeira rot ojgomu. Jeska mimif nomnaga bera erek Ofa efen rusnok. 9Yesus Kristus agos noba esma eiteij ah sons gij mona ongga Ofa edebecki jeska agos fob. Noba Ofa otunggom mar koma jeskaseda eja erek Tuhan nou efen rusnok nomnaga ongga rifena ebah ros, jera rusnok nomnaga ongga ranggos fob tein. 10Jefeda enadaij nou iwa icunc yeyin ihujir ongga ruroru Yesus Kristus fob tein erek oska guru. Noba enadaij nou iwa isujohu rot oida yeyin ifoka ongga aksa ekirsa jeska rua guru. Jeska mimif nomnaga mumojot jah Allah odou noba Ofa emagot rot mar nomnaga ongga mimif muntunggom sis fob si. 11Koma tenten, jeska runggu gij Mar Efeyi Ebsi rot mar ongga Tuhan agot erek kef oida, "Kef bera erek tenten ojgomu oida, rusnok nomnaga rumougif gu Didif si. Rua nomnaga rimagot rot tenten oida Didif bera Allah." 12Jefeda mimif nomnaga mimagot jeni rot mar ongga mimif muntunggom sis fob gu Allah si. 13Erek koma jefeda ongga oufa bera mimif munocunc mifmin muhujir rineya erek oska rot mar ongga rua runtunggom guru. Tina mimif misisi joug misinsa mudou efesi jeskaseda mineita mar egema tein ongga orotunggom rua fogora risiri gij mar ongga rua rusujohu bera erek oska guru. 14Didif bera duroru Yesus Kristus rot tenten fob. Noba didif dijginaga rot tenten oida maat egema tein ongga didif dit bera enerek oska guru. Tina erek osnok egens osujohu rot oida maat eneya bera erek oska, beda mar ongga ofa onsujohu bera erek tenten nou ofa ojgomu. Jefeda ofa enet maat insa koma guru. 15Yesus bera anggos tumu mega salib nou osnok egens insa koma tein. Tina erek maat ongga iwa int bera orotunggom yeyin ihujir rudou efesi okumkum rot, beda koma orocunc rot oida idou onokora rot rua erek tenten enesi. Jefeda iwa inet maat ongga orotunggom yeyin ihujir rudou okumkum rot guru. Erek iwa it maat insa koma jah ihujir rudou, beda rua rimek iwa fogora rimet maat insa koma tein. Noba koma erek rua rinsiri gij mar ongga rua risinsa rusujohu bera erek oska. 16Jefeda iwa inet maat ongga iwa isujohu bera erek oufa tina yeyin ihujir rusujohu bera erek oska guru. Jeska erek rua rik mar insa koma, beda rua rimesiri gij mar ongga rua rusujohu bera erek oska. Beda rusnok enjgineg rumohurmei mar rot iwa ongga Kristen nomnaga tein si. 17Erek mimif mudou os jeskaseda Allah ofoka ereij keingg mimif, beda mar ongga mimif mint jera minj bera onofoufem guru. Tina mar ongga ofoufem nou mimif bera oida mimif mita mar ongga oufamofa ojgomu noba miker rot mudou ongga eskeiramera moguma ojgomuja, noba mita mudou ongga efaga ouka morototuma rot Efena Ebsi Allah ongga engker gij mudou efesi. 18Rusnok ongga rufij Yesus rita mar ongga oufamofa, noba ongga ereita Allah odou eskeiramera rot rua ojgomu. Noba rusnok enjgineg rumougif gu rua rot tein si. 19Jefeda ongga oufa bera mimif mita mar ongga ereita mifmin muhujir rudou efesi erek eskeiramera rot ojgomu. Noba mimif tein mumofijma ojgomuja. 20Maat nomnaga bera erek oufa. Tina erek iwa int maat ongga orotunggom yeyin ihujir fogora rinsiri gij mar ongga rua runsujohu bera erek oska, beda mar ongga Allah oncunc gu rua gij rudou efesi bera emeja eseiseifa rot ojgomu. Noba koma enadaij guru. 21Jefeda erek yeyin ihujir rineya ongga rusujohu rot oida mar erek marska era anggur efei bera erek mar ongga oska, beda iwa inet era inej mar insa koma guru. Iwa inet mar insa koma era mar egema tein ongga orotunggom rua fogora risiri gij mar ongga rua runsujohu bera oska guru. 22Erek iwa isujohu oida maat ongga iwa int era mar ongga iwa inj bera enerek oska guru, beda idemdemi mar insa koma gij idou efesi ojgomu. Beda iwa jera Allah ojgomu bera ejginaga rot fob, tina rusnok enjgineg guru. Beda yeyin idou emeskeira rot maat insa koma ongga iwa isujohu bera erek oufa ojgomu. Noba iwa isujohu rot oida mar ongga iwa intunggom koma bera enerek oska guru. 23Rusnok rineya rijekjeka rudou efesi rot mar ongga rua rint era rinj, jeska rua rusujohu oida mar insa koma bera erek mar ongga oska. Tina erek rua rint mar insa koma ojgomu, beda Allah omocunc rua erek oska rot si. Erek mimif mita mar ongga misinsa musujohu bera erek oska, beda mimif muntunggom mar ongga oska rot tenten fob.

will be added

X\