Roma 11

1Erek koma jefeda rusnok rineya rumosujohu rot oida Allah bera okoja efen rusnok Yahudi fob. Tina erek koma guru. Jeska didif disinsa bera direk Yahudi egens jeska rua ongga Israel tein. Noba didif bera dunjuj jeska Abraham jera ebic Yahudi ongga ofoka Benyamin tein. 2Allah onokoja efen rusnok Yahudi guru. Ofa bera enjeka rua gij mona ongga sismeni jeskaseda ocunc efen odou ongga oufamofa skoita rua. Iwa idou ah keingg rot mar ongga runggu gij Mar Efeyi Ebsi sis fob. Jeska gij mar insa koma bera nabi Elia oga erahah skoita Allah rot efen rusnok Israel fob. 3Ofa agot oida, "Tuhan, bebin rusnok Israel bera ranggob bebin nabi-nabi fob. Noba rua tein runghoda rot bebin mod ongga rusnok rugif gu Bua gij tein fob. Noba ebeibeyaif rua rudou os ragob didif tein." 4Tina gij mona insa koma Allah oroun mar gu nabi Elia erek kef oida, "Didif duncunc rusnok rufok ribu cinja erfeka jeska rua ongga Israel ongga rugif gu dedin duga morototuma erek bua fob. Rua tein runougif gu mar ongga oska koma ongga ofoka Baal jinaga guru." 5Jefeda gij mona ebeibeyaif tein, oisouska Allah odou ongga oufamofa bera Ofa oncunc rusnok rineya jeska rua ongga Yahudi fob. 6Noba Ofa oncunc rua oisouska odou ongga oufamofa eteb ojgomu. Ofa onocunc rua oisouska mar ongga rua risinsa runtunggom rot guru. Jeska erek Ofa oncunc rua oisouska mar ongga rua risinsa runtunggom fob, beda koma erek rua runoisum gij Ofa rot efen odou ongga oufamofa skoita rua deika guru. 7Jefeda erek rusnok Yahudi risinsa rireni rot ahais jeskaseda rita rudou ongga efen mar ongga oska guru ahah Allah eiteij, beda rua rinesma guru. Tina rusnok Yahudi rineya ongga Allah oncunc fob bera risma rudou ongga ebsi komowa jeska Ofa ojgomu. Erek koma tina, rua ongga Yahudi rineya bera rita rudou ongga oska skoita Allah. 8Erek koma jeska runggu gij Mar Efeyi Ebsi erek kef oida, "Allah otunggom rua fogora rudou eskes noba osumsumu rot mar ojgomu. Jefeda onjoros deisef tein bera rua rudou enebriyi gij mar ongga rua rik gu riteij guru. Noba rudou osumsumu rot mar ongga rua rig tein." 9Noba raja Daud tein onggu gij Mar Efeyi Ebsi oida, "Tuhan, didif duis gu bua jeskaseda mar nomnaga ongga rua rerin ongga erek ongkoska omorotunggom rua fogora rija eseiseifa rot ojgomu. 10Beda mar insa koma bera erek bua bisesa mar okum sons skoita rua rot rerin mar ongga oska si." 11Jefeda rusnok Yahudi rufoukou rija eseiseifa fob. Tina enadaij nou iwa isujohu rot oida rua nomnaga rimeja eseiseifa ojgomuja guru. Jeska oisouska rudou ongga okoja rot Allah oga fob bera rusnok ongga Yahudi guru rinsma Allah oga ongga oufamofa insa koma fob. Noba rusnok ongga Yahudi guru bera ruroru Allah oga insa koma fob, jefeda rusnok ongga Yahudi rudou ejisei rot rua ongga Yahudi guru. 12Noba jeska rusnok Yahudi rukoja Allah oga fob, jefeda rusnok enjgineg bera rinsma oufamofa eteb jeska Allah fob. Noba mar ongga oufamofa ongga enseiseifa jeska rua bera orofij rusnok ongga Yahudi guru jeskaseda rua risma oufamofa eteb jeska Allah. Jefeda gij mona ongga rusnok Yahudi ruroru Allah oga rot tenten fob, beda rua rimesma oufamofa jeska Allah ongga erek eteb ekirsa tein. 13Ebeibeyaif didif dudou os difesij mar skoita iwa ongga erek Yahudi guru. Didif bera erek rasul egens ongga duftuftu mar rot Allah efen oga gu rusnok ongga Yahudi guru. Noba didif dudou erirei eteb rot mar insa koma ojgomu. 14Didif dudou os oida mar ongga didif dutunggom bera ereita rusnok Yahudi rineya rudou ejisei rot fogora rineya jeska rua rumororu Yesus Kristus tein. Beda Ofa omoskotu rua tein jeska rerin mar ongga oska. 15Jeska sis fob, gij mona ongga Allah okoja rusnok ongga Yahudi, beda koma erek ohoda moroju egens nou rusnok ebic enjgineg tein jeskaseda risma oufamofa eteb jeska Allah. Jefeda gij mona ongga Ofa omoroun rusnok ongga Yahudi deika, beda koma erek rusnok ongga ranggos tina risma riteij ah sons. 16Erek rusnok rikeba rerin roti egema gu Allah erek mar ongga rurougif gu Ofa rot, beda rerin roti efaga egens insa koma nomnaga erek ebsi komowa tein. Noba erek mega ofom bera ebsi komowa, beda mega efaga efen efetma nomnaga bera erek ebsi komowa tein. Erek koma tein, rusnok Yahudi ongga ensis bera erek Allah efen rusnok. Jefeda rusnok Yahudi ongga deisef tein bera erek Ofa efen rusnok ros. 17Erek koma noba, rua ongga runjuj jeska Abraham bera erek mega zaitun egens ongga Allah erefa fob. Mega insa koma efen efetma eneya ongga eyah jeska efaga mosu fob. Noba iwa, ongga erek Yahudi guru, bera erek mega efetma jeska mega mosu enjgineg ongga Allah erebiedi jera mega efaga mosu egens insa koma ongga Ofa efen fob. Noba mega efetma insa koma esma efeyi jeska mega efaga mosu insa koma tein. Erek koma tein iwa isma oufamofa eteb jeska Allah morototuma erek Ofa eita gu rusnok Yahudi sis fob tein. 18Tina enadaij nou iwa isujohu rot oida yeyin ifoka bera erek aksa ekirsa jeska rusnok Yahudi rufoka guru. Jeska iwa bera erek mega efetma insa koma ongga esma efeyi jeska mega efaga mosu insa koma ojgomu. Mega efaga mosu insa koma enesma efeyi jeska mega efetma insa koma guru. 19Erek koma beda rineya jeska iwa rimesitit risinsa rifaga rot oida, "Mimif miferwei Allah efen rusnok Yahudi erek mega zaitun efetma insa koma eferwei mega efetma ongga eyah jeska fob." 20Koma erek tenten, tina Allah okoja rua ongga Yahudi insa koma erek mega efetma ongga eyah jeska fob, jeska rudou onororu Ofa efen oga rot tenten deika guru. Noba iwa ongga Yahudi guru bera erek mega efetma ongga ebiedi jera mega efaga mosu, jeska iwa iroru Allah efen oga rot tenten ros. Jefeda iwa inesitit isinsa ifaga rot guru, tina yut joug idou efesi rot ahais ojgomuja. 21Jeska erek Allah okoja efen rusnok Yahudi ongga runororu efen oga rot tenten guru, beda Ofa omokoja iwa tein rot si. 22Iwa isujohu rot teinefa Allah otunggom mar gu rusnok rot odou ongga eskeiramera era rot odou ongga okum tein. Ofa oncunc odou ongga okum skoita rusnok Yahudi ongga runororu efen oga rot tenten guru. Noba Ofa tein oncunc odou ongga eskeiramera skoita iwa ongga erek Yahudi guru deika. Koma jeska iwa iroru Ofa efen oga rot tenten fob. Tina guru, beda Ofa omokoja iwa tein erek mega efetma insa koma ongga eyah jeska mega efaga mosu fob. 23Noba erek rua ongga Yahudi rikikif fogora ruroru Allah efen oga rot tenten sons deika, beda Ofa omoroun rua sons si. Koma erek mega efetma ongga eyah insa koma ebiedi mega efaga mosu insa koma sons fob. 24Iwa ongga Yahudi guru bera erek mega efetma jeska mega efaga mosu ongga er erek ebireira ojgomu. Noba Allah ebiedi iwa jera mega efaga mosu egens ongga Ofa esinsa erefa fob. Tina rusnok Yahudi bera erek mega efetma egens ongga eyah jeska mega efaga mosu ongga Allah enrefa fob, jefeda adaij nou Ofa ebiedi rua sons jera mega efaga mosu insa koma tein ojgomu. 25Edohuji ongga erek Yahudi guru, didif dudou os difesij rot mar egens ongga ah jejema jeska rusnok riteij sis fob jeskaseda iwa inesitit isinsa ifoka erek aksa ekirsa jeska rusnok ongga Yahudi guru. Jeska ebeibeyaif rusnok rineya jeska rua ongga Yahudi bera rufos ombrera rot Allah oga ojgomuja. Rua rimeker erek koma ojgomuja onjoros rusnok Yahudi nomnaga ongga Allah oncunc rot bera rin skoita Ofa fob. 26Beda Allah omoskotu rusnok Yahudi rufoukou insa koma jeska rerin mar ongga oska. Jeska runggu gij Mar Efeyi Ebsi sis fob rot oida, "Ofa ongga omoskotu rusnok bera emen jeska rusnok Yahudi. Beda Ofa omosuwa rua ongga Yahudi jeska rerin mar ongga oska si." 27Noba gij mar enjgineg tein bera Allah agot gu rusnok ongga Yahudi rot oida, "Didif dimagen mar morototuma jera rua. Noba Didif dumosuwa rua jeska rerin mar ongga oska si." 28Erek koma jeska rusnok Yahudi bera rukoja Allah efen oga osok gij Yesus Kristus fob. Jefeda Ofa oncunc rua erek Ofa rusnok ongga rudou ofogog skoita Ofa fob. Jefeda ebeibeyaif iwa ongga Yahudi guru bera ongga isma oufamofa eteb jeska Ofa. Tina jeska Ofa anggen rot mar gu Yahudi rerin rimower sis eteb fob, jefeda Ofa odou okora rot rua ongga Yahudi ros. 29Jeska Allah onosuna rot mar ongga Ofa anggen rot sis fob gu rusnok ongga Ofa oncunc fob jinaga guru. 30Sis fob iwa ongga Yahudi guru bera ongga yungkoja rot Allah oga. Tina ebeibeyaif bera Allah oncunc efen odou ongga oufamofa eteb skoita iwa. Koma jeska rua ongga Yahudi rungkoja Allah efen oga fob. 31Rua insa koma rungkoja Ofa efen oga jeska Ofa oncunc efen odou ongga oufamofa skoita iwa ongga Yahudi guru fob. Tina gij mona kahma deika beda Ofa omocunc efen odou ongga oufamofa skoita rusnok ongga Yahudi tein si. Jeska Ofa oncunc efen odou ongga oufamofa skoita iwa tein fob. 32Erek koma jeska Allah oncunc rot oida rusnok nomnaga bera runororu efen oga rot tenten guru fob. Beda oisouska mar insa koma bera Ofa tein orocunc rot efen odou ongga oufamofa skoita rusnok nomnaga. 33Wah! Allah efen odou ongga ebriyi gij mar erek eteb doska. Ofa efen odou ongga ejginaga rot mar nomnaga erek eteb tein. Rusnok egema tein rudou enebriyi gij mar nomnaga ongga Allah oga eris rot jinaga guru. Noba rusnok egema tein rudou enebriyi gij Ofa efen eita mar skoita rusnok jinaga guru. 34Runggu gij Mar Efeyi Ebsi oida, "Rusnok egema tein rinejginaga rot mar ongga angh gij Allah odou efesi jinaga guru. Noba rusnok egema tein runoftuftu Ofa rot mar ongga Ofa omotunggom jinaga guru. 35Enadaij nou rusnok rita mar egema tein skoita Allah fogora rerin mar okowu ongga ah gu Ofa tein jinaga guru." 36Koma tenten, jeska Allah bera ongga ontunggom mar nomnaga. Noba mar nomnaga bera enah oisouska Ofa ojgomu. Jefeda rusnok nomnaga rufra Ofa efen ofoka erek aksa eteb rot ah aibin ojgomuja. Ainsoma.

will be added

X\