Roma 10

1Edohuji, didif dudou os eteb jeskaseda Allah oskotu rusnok Yahudi nomnaga jeska rerin mar ongga oska. Noba didif dum diteij gu Allah rot mar insa koma ojgomuja. 2Didif dijginaga rot tenten oida rua rugif gu Allah rot rudou ongkasmos ojgomu. Tina rudou enebriyi gij rot teinefa rusnok rugif gu Allah erek tenten enesi. 3Rua runororu moroju ongga Allah ensejah nou rusnok jeskaseda risma rudou ongga ebsi komowa guru. Tina rua rudou os ruroru risinsa rerin moroju ojgomu. Rua runougif gu Allah rot Ofa efen moroju insa koma ongga eita rusnok rudou ebsi komowa jinaga guru. 4Jeska oisouska mar ongga Yesus ontunggom fob bera rusnok runocosu rot ruroru hukum Musa jeskaseda risma rudou ongga efen mar ongga oska oskiyai tein deika guru. Yesus otunggom mar erek insa koma jeskaseda rusnok nomnaga ongga ruroru Ofa bera risma rudou ongga ebsi komowa erek insa koma ojgomuja. 5Sis fob Musa onggu keingg mar osok gij rusnok ongga ruroru hukum Allah rot tenten jeskaseda risma rudou ongga ebsi komowa. Ofa onggu oida, "Erek rusnok ruroru jeni hukum Allah nomnaga rot tenten fob, beda rua rimesma eiteij ah ongga efeinah si." 6Erek koma, tina rusnok ongga ruroru Allah oga rot tenten bera rinsma rudou ongga ebsi komowa fob. Jefeda rua ragot oida, "Enadaij nou rusnok rija jah mebaga jeskaseda ruroun Yesus degini kefin skoita mimif jeskaseda mig efen oga guru. 7Noba enadaij nou rusnok rujuj gij monuh mar agos jeskaseda ruroun Yesus skoita mimif fogora mig efen oga guru." 8Jeska runggu gij Mar Efeyi Ebsi erek kef oida, "Allah oga bera ah doida iwa fob. Jefeda adaij nou iwa ifesij rot oga insa koma ojgomu, noba adaij nou iwa isah oga insa koma gij idou efesi tein. Oga insa koma bera ongga memef memfesij gu rusnok fob. Oga insa koma agot oida rusnok ruroru Yesus Kristus ojgomu." 9Noba erek rusnok ragot rot tomnomna oida, "Yesus Kristus bera Tuhan," noba rua ruroru rot tenten oida Allah omfra Ofa jeska anggos fob, beda Allah omoskotu rua jeska rerin mar ongga oska si. 10Jeska erek mudou efesi ororu Yesus Kristus rot tenten fob, beda Allah omocunc mimif erek rusnok ongga rudou ebsi komowa. Noba erek mimif magot rot tenten oida mimif muroru Yesus Kristus fob, beda Allah omoskotu mimif jeska mifmin mar ongga oska si. 11Gij Mar Efeyi Ebsi bera Allah agot oida, "Osnok egens ongga odou os ororu Kristus rot tenten, beda mojenen ofa rot koma jinaga guru." 12Koma erek tenten nou rusnok ebic nomnaga tein. Jeska ahah Allah eiteij, rusnok ongga Yahudi jera rusnok ongga Yahudi guru tein bera morototuma erek egens. Ofa bera erek Tuhan nou rusnok ebic nomnaga. Noba Ofa ocunc odou ongga oufamofa eteb skoita rusnok nomnaga ongga ruis gu Ofa jeskaseda Ofa oskotu rua. 13Erek koma jeska nabi egens onggu gij Mar Efeyi Ebsi sis eteb fob oida, "Allah omoskotu rusnok nomnaga ongga ruis gu Ofa rot si." 14Erek koma tina, iwa isujohu rot rusnok ongga rudou onororu Tuhan enesi. Jeska erek rudou onororu Allah oga enesi beda enadaij nou rua ruis gu Ofa jeskaseda Ofa oskotu rua guru. Noba erek rua rineg rot Allah oga insa koma enesi, beda enadaij nou rua ruroru Ofa efen oga insa koma tein guru. Noba erek rusnok rinejefesij rot Allah oga insa koma gu rua guru, beda enadaij nou rua rig rot oga insa koma tein guru. 15Noba erek rusnok runobk rineya jeska rifekesa guru, beda enadaij nou rua insa koma rijefesij rot Allah oga gu rusnok enjgineg guru. Koma erek runggu gij Mar Efeyi Ebsi oida, "Gij mona ongga rusnok rinsaga jeskaseda rifesij rot Allah oga ongga oufamofa, beda koma bera erek mar ongga oufamofa eteb!" 16Koma tenten, tina rusnok rineya ongga Yahudi bera runororu Allah oga ongga oufamofa insa koma guru. Jeska nabi Yesaya onggu gij Mar Efeyi Ebsi sis eteb fob oida, "Tuhan, rusnok rufoukou bera runororu mar ongga memef memfesij osok gij Bua gu rua guri." 17Jefeda erek rusnok rijefesij rot Allah oga ongga oufamofa osok gij Yesus Kristus insa koma, beda rusnok enjgineg rimeg rot si. Beda rua tein rumororu Allah oga rot tenten si. 18Tina rineya jeska iwa rimagot oida, "Rusnok Yahudi nomnaga rineg rot Allah oga ongga oufamofa enesi." Beda didif dumoroun gu rua oida koma enerek tenten guru. Jeska runggu gij Mar Efeyi Ebsi oida, "Rusnok rineya bera rimfesij rot Allah oga ongga oufamofa gu rusnok rejrej monuh nomnaga fob." 19Tina rineya jeska iwa rimagot oida, "Yahudi ongga ringg rot Allah oga ongga oufamofa insa koma bera rudou enebriyi gij rot guri." Tina didif dagot oida rusnok Yahudi rudou ebriyi gij Allah oga insa koma ojgomu fob. Jeska Musa onggu gij Mar Efeyi Ebsi rot mar ongga Allah anggot gu rua ongga Yahudi fob. Ofa agot oida, "Didif dumocunc dudou ongga okora rot rusnok ongga Yahudi guru, beda iwa ongga Yahudi idou emejisei eteb rot rua si. Beda iwa imeita idou ongga ofogog skoita rua insa koma ongga iwa isujohu bera erek rudou osumsumu ojgomu." 20Noba nabi Yesaya anggot rot koisoisa osok gij mar insa koma tein. Jeska gij Mar Efeyi Ebsi ofa anggot rot mar ongga Allah anggot osok gij rusnok ongga Yahudi guru erek kef oida, "Rusnok ongga runohca Didif guru, rua bera ongga rimeja erek egens jera Didif si. Noba Didif dumocunc dudou ongga oufamofa skoita rusnok ongga rinerejgei mar jeska Didif guru." 21Noba Yesaya anggot mar osok gij rua ongga Yahudi erek kef oida, "Didif duga ebin gu rua ongga Yahudi ojgomuja. Tina rua rukoja Didif ojgomu. Rua rufos ombrera rot dedin duga ojgomu."

will be added

X\