Roma 1

1Didif Paulus, bera osnok egens ongga ofij Yesus Kristus. Ofa bera ongga enjeka didif erek rasul egens fob. Noba sis fob Ofa bera enjeka didif jeskaseda difesij rot Ofa efen oga ongga oufamofa skoita rusnok. Noba sis mona ongga Yesus enen gu mebif enesi, bera Allah anggen rot efen oga ongga oufamofa insa koma. 2Ofa anggen rot efen oga insa koma oisouska mar ongga nabi-nabi runggu gij Mar Efeyi Ebsi sis fob. 3Noba oga ongga oufamofa insa koma ongga rua runggu rot bera osok gij Ofa efen efesa Yesus Kristus. Ofa en gu mebif erek osnok egens ongga onjuj jeska efen meimowa raja Daud. 4Noba Ofa en erek osnok egens ongga ebsi komowa morototuma erek Allah tein. Noba oisouska Allah efen owesa efek eteb bera Ofa ocunc Yesus erek efen efesa. Ofa ocunc rot mar insa koma gij mona ongga Ofa ofra Yesus Kristus jeska anggos. Noba Yesus Kristus insa koma bera erek mifmin Tuhan tein. 5Erek koma noba, oisouska mar ongga Yesus ontunggom nou didif, bera Allah oncunc didif rot efen odou ongga oufamofa skoita didif, jeskaseda dufij Ofa erek efen rasul egens. Ofa otunggom mar insa koma jeskaseda didif difesij rot efen oga ongga oufamofa gu rusnok nomnaga ongga erek Yahudi guru. Beda rua tein rumofra Yesus efen ofoka erek aksa, noba rumougif gu Ofa oisouska rudou ongga ororu Ofa fob. 6Noba iwa bera erek rusnok rineya tein ongga Allah enjeka jeskaseda ija erek Yesus Kristus efen rusnok fob. 7Didif dugu surat insa kef skoita iwa ongga ingker gij kota Roma ongga iroru Yesus Kristus fob. Iwa bera ongga Allah odou okora eteb rot. Noba Ofa enjeka iwa jeskaseda ija erek efen rusnok fob. Didif dum diteij gu mifmin Mika Allah jera mifmin Tuhan Yesus Kristus jeskaseda Ofa ocunc efen odou ongga oufamofa skoita iwa ojgomuja, noba jeskaseda iwa isma iteij ah ongga eskeiramera tein ojgomuja. 8Sismeni, didif dudou os duis oufamofa eteb skoita dedin Allah rot mar ongga Ofa ontunggom nou iwa oisouska Yesus Kristus fob. Jeska rusnok ongga ringker rejrej monuh ofoukou bera rimfesij moguma rot teinefa iwa iroru Yesus Kristus erek tenten fob. 9Allah bera ongga didif dufij rot dudou ongkasmos askesi dimfesij rot efen oga ongga oufamofa osok gij efen efesa Yesus Kristus. Noba Ofa ejginaga rot tenten oida didif dum diteij gu Ofa nou iwa erek insa koma ojgomuja. 10Erek koma noba didif dum diteij gu Ofa jeskaseda ebeibeyaif Ofa omohoda moroju egens nou didif fogora dumojogog iwa tein si. 11Jeska didif dudou os dik iwa jeskaseda dufij iwa fogora iwa insma owesa efek jeska Efena Ebsi Allah. Noba didif dudou os dutunggom mar erek koma jeskaseda iwa imororu Yesus Kristus rot ahais ekirsa deika. 12Erek koma, jeska erek didif disisi joug iwa erek insa koma, beda iwa tein yeyin owesa efek adaij nou isisi joug didif tein. Koma erek mimif mimeisisima joug oisouska mudou ongga ororu Yesus Kristus rot tenten fob. 13Didif dudou os difesij gu iwa rot teinefa didif direni gij mona ofoukou jeskaseda dujogog iwa jah suma, tina mar ofoukou eragou joug didif rot ojgomuja. Didif dudou os dija skoita iwa jeskaseda dufij iwa fogora imot rot ahais ekirsa oisouska Yesus Kristus. Koma morototuma erek didif dufij rusnok ongga Yahudi guru gij monuh enjgineg tein jeskaseda rua rumororu Yesus Kristus rot ahais tein. 14Didif ducosu rot difesij rot Ofa efen oga skoita rusnok ongga Yahudi ni, rusnok ongga Yahudi guru ni, rusnok ongga rufokor aksa tein ni, jera rusnok ongga rudou osumu ni. 15Jefeda didif dug dudou nou jeskaseda difesij rot Allah efen oga ongga oufamofa skoita iwa ongga ingker gij kota Roma tein. 16Didif dudou os difesij rot Allah oga ongga oufamofa insa koma, noba mar koma bera mojenen didif rot oskiyai tein jinaga guru. Jeska Allah oga insa koma bera efesij rot teinefa Ofa efen owesa efek eteb ongga adaij nou oroskotu rusnok nomnaga ongga ruroru efen oga insa koma. Koma erek sismeni nou rusnok ongga Yahudi, beda nou rusnok ongga erek Yahudi guru tein. 17Jeska Allah oga ongga oufamofa insa koma bera efesij gu mimif rot teinefa Ofa ocunc mimif erek rusnok ongga rerin mar ongga oska oskiyai tein guru. Mimif mik mar erek insa koma gij mona ongga sismeni onjoros mona ongga omoisa rot tein. Koma morototuma erek mar ongga runggu gij Mar Efeyi Ebsi sis fob ongga agot rot oida, "Rusnok ongga Allah oncunc oida rerin rudou ongga ebsi komowa jeska rua ruroru efen oga fob, rua bera ongga rimesma eiteij ah ongga ah aibin." 18Allah oncunc gu rusnok nomnaga rot tomnomna oida Ofa efen mar okum eteb emen jeska Ofa gij mebaga skoita rusnok nomnaga ongga runororu Ofa efen oga guru. Mar okum koma emah keingg rusnok ongga rita mar ongga oska efekeifa skoita rusnok enjgineg fob tein. Noba oisouska rerin rita mar ongga ofogog insa koma bera rua riragou joug moroju fogora rusnok enjgineg runororu Allah oga rot tenten tein guru. 19Rusnok nomnaga rijginaga rot Allah fob. Erek koma jeska Ofa oncunc mar rot esinsa skoita rusnok nomnaga fob. 20Enadaij nou mimif mik Allah gu miteij guru. Tina sis mona ongga Ofa otunggom mebif nomnaga onjoros mona deisef tein bera rusnok nomnaga rijginaga rot oida Ofa enofoguma fob. Noba oisouska mar ongga Ofa ontunggom fob bera mimif mik rot koisoisa oida Ofa efen owesa efek eteb ongga ah aibin ojgomuja. Noba Ofa efen ofoka bera aksa ekirsa jeska mar nomnaga ongga angh gu mebif jera mebaga tein. Jefeda enadaij nou rusnok egema tein ragot oida rua rinejginaga rot Allah enesi jinaga guru. 21Rua rijginaga rot Allah fob, tina rua runougif gu Ofa rot efen ofoka ongga aksa guru. Noba rua runois oufamofa eteb gu Ofa tein guru. Tina rua ringkikif jeska Ofa, noba rua rusujohu mar rot Ofa ongga erek rourou ojgomu. Noba rua bera rirek rusnok ongga rudou osumsumu ojgomu ongga ringker gij motkobah ojgomuja. 22Rua rufra risinsa rufoka erek rusnok ongga rudou ebriyi gij mar ofoukou. Tina ongga tenten bera rua rija erek rusnok ongga rudou osumsumu ojgomuja. 23Rua runougif gu Allah rot efen ofoka ongga aksa eteb noba ongga ah rot aibin jinaga guru. Tina rua rikikif jeska Ofa noba rugif gu mar ongga rua risinsa runtunggom tumu ritma ojgomu. Mar koma ongga rua rugif gu bera erek orocunc rot rusnok ni, mem ni, marska ni, jera mar erek magosu tein ni. 24Erek koma jefeda Allah orons rot rua jeskaseda ruroru rerin mar nomnaga ongga angh gij rudou efesi ongga erek oska ojgomuja fog onjoros rua runtunggom mar ongga erek oska efekeifa eteb rot rifaga moguma. 25Rua rukoja mar ongga tenten rot Allah, beda rugif gu mar ongga erek tenten guru. Rua runougif gu Allah ongga ontunggom mar nomnaga guru, tina rua rugif gu mar ongga Ofa ontunggom ojgomu. Tina oufa nou rusnok risitit mar gu Allah rot mona ah aibin ojgomuja, noba rinesitit rot mar enjgineg tein guru. 26Jefeda Allah orons rot rua insa koma jeskaseda riker gij rerin mar ongga oska ongga rudou eftirir keingg ojgomuja. Rujager ruroru rerin mar ongga oska insa koma onjoros rudou onosos rot runer deika guru, tina ruckahtah rot rujager enjgineg ojgomu. 27Noba erek koma tein, runer rudoubu joug risiri morototuma jera rujager deika guru, tina rua ruckahtah rot runer enjgineg fogora rutunggom mar ongga oska efekeifa moguma ojgomu. Jefeda rua rinsma mar okum eteb jeska Allah ororu jeni rerin mar ongga oska efekeifa insa koma fob. 28Erek koma tein, jeska rua rukoja Allah efen oga ongga tenten noba runosujohu rot Ofa deika guru, jefeda Allah orons rot rua riker gij rerin mar ongga oska efekeifa insa koma ojgomuja. Rua ruroru mar ongga oska ongga rudou eftirir keingg insa koma onjoros rutunggom mar ofoukou deika ongga erek oska eteb fob. 29Koma bera erek, rudou ebera rot mar nomnaga ongga erek oska efekeifa ni. Rua rudou os rita mar ongga ofogog skoita rusnok enjgineg ni. Rua rudou os ruhoturu mareibra ofoukou nou risinsa ojgomu ni. Mar ongga angh gij rudou efesi bera erek oska ojgomu ni. Rudou eftirir keingg rot rusnok enjgineg rerin mar ni. Rua ragob rusnok enjgineg ni. Rua ruga omosokuma jera rusnok enjgineg ojgomuja ni. Rua rurokrusa rusnok enjgineg ojgomuja ni. Rua ruhurmei mar osok gij rusnok enjgineg ni. Rua ruh rusnok enjgineg rufonoknok ni. 30Rua ruga oruh rusnok enjgineg ni. Rua rufc rusum rot Allah ni. Rua runougif gu rusnok egema tein guru, noba rudou okoja rot mar ongga rusnok enjgineg rusujohu rot rua tein ni. Rua rufra risinsa rufoka erek aksa ojgomu ni. Rua rujohca moroju ofoukou jeskaseda rutunggom mar ongga ofogog deika ni. 31Rua rudou osumsumu eteb ni. Rua runororu Allah efen oga guru ni. Rua rukoja rot mar ongga rusnok enjgineg rusujohu rot ni. Rua rutunggom mar ongga oska skoita rusnok enjgineg tein ni. 32Noba rua rijginaga rot mar ongga Allah anggot osok gij mar insa koma fob tein. Jeska Ofa oga ojga rot oida, rusnok ongga rita mar ongga oska bera rimagos rot rerin mar ongga oska insa koma si. Erek koma tina rua ruroru rerin mar ongga oska insa koma ojgomuja. Noba ongga oska ekirsa bera, rua rudou eskeira rot rusnok enjgineg ongga rutunggom mar ongga oska erek insa koma tein.

will be added

X\