Wahyu 8

1Nou ongga koma oisa fob, beda didif dik Domba Efer insa koma ohoda mar ongga eyet joug kertas efeyi cinja erfeka. Beda ainsa koma tein, moubsahamaha gij mebaga nou aras ofod ojgomu. 2Beda didif dik malaikat cinja erfeka ongga runt jah Allah odou. Noba rua risma manghi mei cinja erfeka ongga erek akseij. 3Beda malaikat egens deika en noba orka mokosku egens ongga ris mah gij mar ongga ensesa ongga angh gij mokosku. Mokosku koma bera runtunggom jeska emas. Ofa ot gu meja egens ongga imam raha mar esij jeskaseda rurougif gu Allah rot. Beda ofa esma mar efen ensesa ofoukou. Beda ofa aha mar efen ensesa insa koma morototuma jera mar ongga Allah efen rusnok rum riteij gu Ofa rot esij meja ongga emas koma ongga ot jah Allah efen kursi odou. 4Beda mah efeb ongga en jeska mar efen ensesa ongga malaikat koma es mah gij mok osku morototuma jera mar ongga Allah efen rusnok rum riteij rot bera osok erek mah efeb jeska malaikat etma. Beda mah efek koma eja skoita Allah. 5Erek koma beda malaikat egens insa koma ecka mah efesi krenmeni rot eisa jeska meja ongga emas insa koma, beda ofa aha mar koma gij mokosku insa koma. Beda ofa era mar insa koma orobuma rot gu mebif. Beda ainsa koma tein moc ogugur eteb doska, noba moc efesa tein ofoukou, noba mebif icusur eteb doska. 6Beda didif dik malaikat cinja erfeka risejah nou rin manghi mei oga. 7Beda malaikat ongga sismeni en manghi mei oga. Beda ainsa koma tein mar erek eis mamu jera mah ongga oromohohuma jera ogufu bera ojuj gu mebif. Beda mah et mebif oknama ni, mega oknama ni, jera mofombra ongga efei ofraha nomnaga ni. 8Beda malaikat ongga egeka en manghi mei oga ongga egeka deika. Beda ainsa koma tein didif dik mar erek memaga mosu eteb ongga mah eisa gij nomnaga ojuj gu mei mojumu efei. Beda mei mojumu efei oknama eja erek ogufu. 9Noba mar nomnaga ongga angh gij mei mojumu efei oknama agos. Noba kabar mei ongga ah gu mei mojumu efei oknama eseiseifa. 10Beda malaikat ongga orgomu en manghi mei oga ongga orgomu deika. Beda ainsa koma tein bera mensir efaga ongga erek mah eisa gij ojuj jeska mebaga beda esiri gij mei oknama, noba esiri gij mei eiteij oknama tein. 11Noba mensir efaga insa koma efen ofoka oida, Oska Efeki. Jefeda rusnok rufoukou ragos jeska rua rij mei insa koma ongga eja erek oska efeki. 12Beda malaikat ongga tohkuru en manghi mei oga ongga tohkuru deika. Beda ainsa koma tein mar egens edi mowa oknama jera mesta oknama jera motur oknama. Beda mar insa koma nomnaga oknama eneisa deika guru. Jefeda gij mona beda oknama erek motkobah ojgomu. Noba gij motu tein, oknama erek eneisa deika guru. 13Askesi didif diajga mar insa koma, beda didif dik mem nesmei ofu gu mebaga skidameda. Noba mem insa koma ois rot oga eteb gu rusnok mebif oida, "Ayo rot rusnok mebif, jeska ai juens beda malaikat ongga cinja ni, malaikat ongga cinja erfens ni, malaikat ongga cinja erfeka ni rimen manghi mei oga deika. Beda mar okum ongga ekirsa emecirej iwa si!"

will be added

X\