Wahyu 5

1Erek koma beda didif dik Ofa ongga engker gij kursi eteb insa koma agei kertas efeyi ongga ongkuku tumu efen etma jah ognosk. Noba didif dik mar ongga runggu gij kertas insa koma jah enama tein enama tein. Noba Ofa era mar erek mecij ofot cinja erfeka ereyet joug kertas efeyi insa koma fogora of joug fob. 2Beda didif dik malaikat egens ongga efen owesa efek ois rot oga eteb oida, "Idu bera efen owesa efek ongga adaij nou ohoda rot mar ongga ereyet kertas efeyi ongga ongkuku ainsa kef fogora osu rot." 3Tina rusnok egema tein ongga ringker gu mebaga, era ongga ringker gu mebif, era ongga ringker gij mebif efesi tein bera rerin owesa efek adaij nou ruhoda kertas efeyi insa koma era rik tumu tein jinaga guru. 4Jefeda didif dibisa eteb rot jeska didif dinek rusnok egema tein ongga rerin owesa efek ongga adaij nou ruhoda kertas efeyi insa koma beda rik rot mar ongga runggu gij jinaga guru. 5Erek koma tina, ebirfager egens jeska rua ongga setka egeka noba tohkuru insa koma agot gu didif oida, "Bua binebisa rot guru, jeska osnok egens ongga efen owesa efek ongga adaij nou ohoda mar cinja erfeka insa koma ongga ereyet joug kertas efeyi koma bera enofoguma. Ofa bera ongga erek Singa jeska ebic Yehuda. Noba Ofa bera ongga erek ofojuwu egens ongga onjuj jeska raja Daud. Noba Ofa bera ongga oin keingg efen mesa nomnaga fob." 6Beda didif dik domba efer egens jera efen efera ofamosma jeska rusnok ongga ranggob Ofa sis fob. Ofa ot deismos desi kursi eteb egens insa koma. Noba mar ongga efena ebah tohkuru insa koma jera ebirfager setka egeka noba tohkuru insa koma tein bera rut rejrej domba efer egens insa koma. Noba domba efer insa koma bera efen oubukum cinja erfeka. Noba efen eiteij cinja erfeka tein. Noba mar insa koma bera orocunc rot Allah efen efena cinja erfeka ongga Ofa ombk gu mebif. 7Beda domba efer insa koma en noba eita kertas efeyi koma jeska Ofa ongga engker gij kursi koma etma jah ognosk. 8Nou ongga ofa eita kertas efeyi insa koma, beda mar ongga efena ebah tohkuru jera ebirfager setka egeka noba tohkuru insa koma nomnaga risiri jah gu Domba Efer okoda. Noba orofosutut rua insa koma nomnaga ragei mar egens ongga erek moubseja tumu ritma. Noba rua ragei mokosku ongga erek emas gij ritma enama. Noba mah efeb jeska mar efen ensesa ongga ris mah gij tein orogna jeska mokosku insa koma. Noba mah efeb insa koma bera erek orocunc rot mar nomnaga ongga Allah efen rusnok rum riteij rot gu Ofa sis fob. 9Beda rua nomnaga ruf medemer egens rot mar ongga efeinah erek kef oida, "Bua bera bebin owesa efek ongga adaij nou bita kertas efeyi ongga ongkuku fogora bumohoda mar ongga eyet kertas efeyi insa koma ojgomu. Jeska Bua bera ongga rusnok enjgineg ranggob sis fob. Noba oisouska bebin bugufu ongga eya jeska bifaga bera bua bunskotu rusnok fogora buroun rua skoita Allah fob. Noba rusnok ongga Bua bunskotu fob bera rineya rin jeska orofosutut ruga rusnok egens egens, jera orofosutut rusnok ebic egens egens, jera orofosutut monuh egens egens gu mebif nomnaga. 10Bua bera butunggom rusnok insa koma erek Allah efen rusnok ongga Ofa ofoka ereij keingg mar ojgomuja. Noba rua nomnaga tein bera rinja erek imamir ongga rufij mifmin Allah ojgomuja. Rua tein bera rumofoka ereij keingg rusnok gu mebif si." 11Beda didif dik malaikat-malaikat riskembemba ongga erek ribu-ribu rufoukou doska. Noba rua nomnaga ringker rejrej kursi egens insa koma jera mar ongga efena ebah tohkuru jera ebirfager setka egeka noba tohkuru insa koma tein. 12Beda rua ruf medemer rot ruga ongga eteb erek kef oida, "Adaij nou domba efer egens ongga rusnok ranggob sis fob esma owesa efek ni, jera mar nomnaga ongga oufamofa jeska Allah ni, jera odou ongga ebriyi eteb gij mar ni, jera ofoka aksa ongga rusnok nomnaga rugif gu noba risitit rot tein ni." 13Beda didif dig mar nomnaga ongga efena ebah gu mebaga ni, gu mebif ni, gij mebif efesi ni, gij mei mojumu efei ni, nomnaga ruf medemer erek kef oida, "Mimif mudou os oida Ofa ongga engker gij efen kursi eteb gu mebaga jera efen domba efer esma ofoka ongga aksa eteb ni, owesa efek ni, rusnok nomnaga risitit rot efen ofoka ni, rua rugif gu Ofa rot mona ongga ah aibin ojgomuja tein ni." 14Beda mar ongga efena ebah tohkuru insa koma ruroun oida, "Memef modou os erek koma tein ojgomu." Beda ebirfager setka egeka noba tohkuru bera risiri fogora rugif gu Ofa ojgomu.

will be added

X\