Wahyu 4

1Nou ongga koma nomnaga oisa fob beda didif dik montouj egens gu mebaga ongga onghoda fob. Beda didif dig oga egens ongga agot mar gu didif rot ahais erek manghi mei oga ongga ogugur eteb. Oga insa koma agot oida, "Bua bin skoita Didif, beda Didif dumocunc gu bua rot mar ongga omorogna gij mona kahma si." 2Ainsa koma tein didif disma owesa efek jeskaseda dik mar ongga onswos eteb gu mebaga. Beda didif dik kursi eteb egens ongga osnok egens engker gij. 3Noba osnok egens koma bera efen Efesa eteb ongga erek mamu ongga efera osok eteb noba efen efeb titnetna ongga erek ebsi oromohohuma jera ofrahamaha jera ekeni mebi tein. Noba didif dik meinji ongga efen efeb titnetna ongga erek ofrahamaha. Noba meinji insa koma ah rejrej kursi eteb insa koma tein. 4Beda didif dik kursi setka egeka noba tohkuru ongga ah rejrej kursi eteb egens insa koma. Noba didif dik ebirfager nou rusnok Mod Ari ringker gij kursi-kursi setka egeka noba tohkuru insa koma. Rua rirgi meifeti ongga erek ebsi komowa ojgomu, noba manggem eteb ongga eirirbi erek emas ah tumu ritoufu tein. 5Beda didif dik moc efesa eteb noba dig moc ogugur rejrej kursi eteb egens insa koma. Noba lampu cinja erfeka ongga eisa eteb bera ah jah kursi insa koma odou. Lampu-lampu insa koma bera orocunc rot Allah efen efena cinja erfeka. 6Beda didif dik mar erek mei mojumu efei ongga edeider noba efena eirirbi eteb erek kasinam ongga ah jah kursi insa koma odou tein. Beda didif dik mar tohkuru ongga efena ebah noba ongga efen eiteij ofoukou ongga ah jah odou jera ejmeg tein. Noba mar insa koma bera ot rejrej kursi egens insa koma deismos. 7Mar egens ongga efena ebah insa koma bera erek singa. Noba mar efena ebah ongga egeka bera erek sapi. Noba mar ongga efena ebah orgomu insa koma bera efen osum ongga erek orna egens efen. Noba mar ongga efena ebah tohkuru insa koma bera erek mem nesmei eteb ongga ofu gij mebaga. 8Noba orofosut mar ongga efena ebah insa koma egens egens bera efen efembra ofou cinja erfens. Noba rua tein rerin riteij ofoukou ongga ah rejrej rifaga nomnaga. Riteij insa koma ah jah rines efesi obohoh tein. Noba rua ragerir orofosut motu jera mona ojgomuja oida, "Tuhan Allah bera efen owesa efek eteb ekirsa jeska nomnaga. Ofa bera ongga ebsi komowa ojgomu. Noba Ofa bera ongga enofoguma gij mona ongga sismeni fob. Noba Ofa bera ongga eneker ojgomuja ebeibeyaif tein, noba Ofa bera ongga emen tein si." 9- 10Beda mar ongga efena ebah tohkuru insa koma risitit mar gu Ofa ongga engker gij kursi egens insa koma noba ongga efena ebah rot mona ongga ah aibin. Rua risitit rot efen ofoka ongga aksa eteb noba rua ruis oufamofa eteb skoita Ofa tein. Noba askesi rua risitit rot mar insa koma, beda ebirfager Mod Ari setka egeka noba tohkuru insa koma bera risiri fogora rugif gu Ofa ongga engker gij kursi insa koma noba ongga efena ebah rot ah aibin ojgomuja. Beda ebirfager insa koma raha rerin manggem ongga eirirbi insa koma jah Ofa odou erek mar ongga rurougif gu Ofa. 11Beda rua risitit gu Ofa oida, "Bua bera erek mefmen Tuhan jera Allah. Noba adaij nou Bua bisinsiyai bisma bufoka ongga aksa eteb, jera owesa efek eteb ojgomu. Noba adaij nou rusnok nomnaga rugif gu Bua ojgomu. Jeska Bua bera ongga buntunggom mar nomnaga. Bua bera ongga buntunggom mar nomnaga oisouska budou ejginaga rot. Mar nomnaga bera ah oisouska Bua ojgomu."

will be added

X\