Wahyu 3

1Erek koma beda Ofa agot gu didif Yohanes deika oida, "Mar ongga ai juens dimagot gu bua bera bugu keingg rot skoita malaikat egens ongga ont joug rusnok Mod Ari gij kota Sardis erek kef oida, Oga kef bera en jeska Ofa ongga agei Allah efen efena cinja erfeka jera motur cinja erfeka. Ofa agot mar erek kef oida, Didif dijginaga rot iwa ongga Kristen gij kota Sardis yeyin ita mar. Jeska rineya rifesij rot oida rerin riteij ah ongga efeinah tein fob. Tina rerin rita mar insa koma bera onorocunc rot erek koma guru. 2Jefeda iwa ibs keingg idou efesi rot mar insa koma sons deika ojgomu fog. Jeska erek iwa ineita mar insa koma guru, beda yeyin ita mar ongga oufa oskiyai insa koma tein bera emeseiseifa. Didif dijginaga rot oida yeyin ita mar ongga oufamofa bera enadaij nou ereita Allah odou eskeira rot iwa enesi. 3Iwa idou ah keingg rot oga ongga oufamofa ongga rusnok rumftuftu gu iwa sis fob noba ongga iwa inroru sis fob tein ojgomu. Iwa imeesa joug rot yeyin mar ongga oska fogora iroru oga ongga oufamofa insa koma deika sons. Tina erek iwa inebs idou efesi rot guru, beda Didif dumorogna keingg iwa morototuma erek osnok egens ongga oukoreka mar orogna keingg rusnok gij rerin mod efesi. Erek koma jeska iwa inejginaga rot mona kenefa ongga Didif dimen skoita iwa jinaga guru. 4Tina rineya gu ifekesa gij kota Sardis koma bera rineita mar ongga orotunggom rudou efesi erek oska guru. Koma bera erek mar ongga ahtaboku eneyet tumu rerin meifeti ongga ebsi komowa guru. Adaij nou rua rimecira morototuma jera Didif rot rerin meifeti ongga ebsi komowa ojgomu. 5Jeska rusnok ongga rinesiri gu Bilis guru, tina rutunggom mar ongga oufamofa erek rua insa koma ros, beda rerin rudou efesi emeja erek ebsi komowa erek rusnok risma meifeti ongga erek ebsi komowa. Beda rua rimeja erek egens jera Didif tein. Noba Didif dunosuna rot rerin rufoka jeska buku eiteij ah tein jinaga guru. Noba Didif dimagot rot rerin rufoka skoita Akeina Allah jera efen malaikat-malaikat tein. 6Erek iwa idou os isma idou ongga ebriyi gij mar insa koma, beda iwa ig mar ongga Efena Ebsi agot gu iwa ongga irek rusnok Mod Ari rot iskusk ojgomu." 7Erek koma beda Ofa agot gu didif Yohanes deika oida, "Mar ongga ai juens dimagot gu bua bera bugu keingg rot skoita malaikat egens ongga ont joug rusnok Mod Ari gij kota Filadelfia erek kef oida, Oga kef bera jeska Ofa ongga ebsi komowa noba ongga tenten tein. Ofa bera ongga agei gusin montouj morototuma erek raja Daud agei gusin montouj sis fob. Jefeda montouj ongga Ofa ohoda bera rusnok enjgineg runof joug sons jinaga guru. Noba montouj ongga Ofa of joug bera rusnok enjgineg runohoda sons jinaga guru. 8Ofa agot oida, Didif dijginaga rot iwa Kristen yeyin ita mar fob. Didif dijginaga rot oida yeyin owesa efek bera erek oskiyai ojgomu, tina iwa iroru dedin duga ojgomuja. Noba iwa inekikif jeska dedin dufoka guru. Jefeda Didif dunghoda montouj egens nou iwa fob. Noba enadaij nou rusnok enjgineg ruf joug montouj koma rot iwa jinaga guru. 9Noba rusnok Yahudi rineya ongga ringker jah gu ifekesa bera ragot rourou oida rua ruroru Didif rot tenten fob, tina rua rucuwei mar ojgomu. Jeska rua bera rugif gu Bilis ojgomu. Jefeda Didif diradgodu rua jeskaseda rugif gu iwa fogora ragot rot tenten oida iwa bera erek rusnok ongga Didif dudou okora rot ojgomu. 10Noba jeska iwa ita idou ahais askesi mar okum ereneni iwa, erek Didif duftuftu iwa rot sis fob, jefeda Didif dumot joug iwa si. Beda gij mona ongga mar okum eteb ah keingg rusnok mebif nomnaga erek mar ongga ereneni rua, beda mar koma enah keingg iwa jinaga guru. 11Gij mona ongga ai estir deika beda Didif dimen si. Jefeda iwa iroru mar ongga Didif dumftuftu gu iwa fob jeskaseda yeyin ifons ongga ongkoska eteb eneseiseifa jeska iwa guru. 12Jeska rusnok ongga rinesiri gu Bilis guru, beda Didif dimeita rerin rufoka aksa eteb gij mebaga. Rua bera rimerek mowuj mosu ongga ot rot ahais erek mamu. Rusnok runokoja rua jeska mod Allah insa koma jinaga guru. Beda Didif dumogu keingg Akeina Allah efen ofoka tumu rua. Noba Didif tein dumogu keingg Akeina Allah efen kota ofoka tumu rua tein. Kota koma ofoka Yerusalem ongga efeinah, noba ongga onjuj jeska Akeina Allah gu mebaga. Noba Didif tein dumogu keingg dedin dufoka ongga efeinah tumu rua. 13Erek iwa idou os isma idou ongga ebriyi gij mar insa koma, beda iwa ig mar ongga Efena Ebsi agot gu iwa ongga irek rusnok Mod Ari insa koma rot iskusk ojgomu." 14Erek koma beda Ofa agot gu didif Yohanes deika oida, "Mar ongga ai juens dimagot gu bua bera bugu keingg rot skoita malaikat egens ongga ont joug rusnok Mod Ari gij kota Laodikia erek kef oida, Oga kef bera en jeska Ofa ongga anggot oida, Ainsoma! Ofa bera ongga otunggom mar ongga tenten noba ongga anggot rot mar ongga tenten. Noba Ofa bera ongga ofoka ereij keingg mar ongga Allah ontunggom nomnaga sismeni fob. 15Ofa agot oida, Didif dijginaga rot iwa ongga Kristen gij kota Laodikia yeyin ita mar. Yo, iwa inokoja Didif guru, tina erek iwa inororu Didif rot ahais tein guri. Koma erek rusnok ongga runt gij mesiga ongga ofon deis ojgomu. Ongga tenten bera iwa ikoja Didif ei, era iroru Didif rot ahais ei. 16Noba jeska iwa yunt gij mesiga ongga ofon deis ojgomu, jefeda Didif dumokoja iwa rot dudou ongga oska eteb rot iwa ojgomu. 17Iwa yagot rot oida iwa ihoturu yeyin mareibra ofoukou fob, jefeda yeyin mareibra ofoukou insa koma bera adaij nou iwa fob. Erek koma tina ahah Allah eiteij bera iwa irek rusnok ongga rufojingki doska ni, jera rua ongga riteij ofou ni, jera rua ongga erek ricira rot rufos robrob ojgomu. Erek koma jeska yeyin ita mar ongga erek ongkoska tein egema enah jinaga guru. 18Erek koma jefeda Didif dimeisisi keingg iwa jeskaseda iwa ita emas ongga rungkub gij mah fogora eirirbi eteb jeskaseda iwa isma ifoka aksa rot tenten ojgomu. Koma erek iwa imeesa joug rot yeyin mar ongga oska fogora ita idou ongga ororu mar ongga oufamofa ojgomu. Noba iwa ita meifeti ongga ebsi komowa jeskaseda mojen en iwa rot ifos robrob insa koma guru. Koma erek iwa ita idou ongga ebsi komowa ojgomuja. Noba iwa ita ariawun ongga imfin gij iteij efej tein jeskaseda ik mar rot koisoisa. Koma erek iwa ita idou ongga ebriyi gij rot dedin duga ojgomu. 19Didif bera dagot joug mar noba duftuftu rot mar ongga ahais skoita orofosutut rusnok ongga dudou okora rot. Jefeda iwa ita idou eriagamaga fogora imeesa joug yeyin mar ongga oska ojgomu. 20Didif dut jah sif noba dingkingk montouj. Noba osnok egens ongga eg rot dedin duga fogora ohoda montouj jeska Didif, beda Didif dumoira gij efen mer efesi noba dimet maat morototuma jera ofa si. Beda ofa emet maat morototuma jera Didif tein. 21Noba rusnok ongga rinesiri gu Bilis guru, beda Didif dimeita owesa efek gu rua jeskaseda riker morototuma jera Didif gij kursi ongga Didif dufoka ereij keingg mar nomnaga jeska. Beda rua rimeker morototuma erek Didif ongga dinesiri gu Bilis guru. Noba Didif bera dingker morototuma jera Akeina Allah gij efen kursi egens insa koma fob. 22Erek iwa idou os isma idou ongga ebriyi gij mar insa koma, beda iwa ig mar ongga Efena Ebsi agot gu iwa ongga irek rusnok Mod Ari rot iskusk ojgomu."

will be added

X\