Wahyu 21

1Nou ongga koma oisa fob beda didif dik mebaga jera mebif ongga efeinah deika. Jeska mebaga jera mebif ongga ensis bera eja eseiseifa fob. Noba mei mojumu efei bera enah deika guru. 2Beda didif dik kota Yerusalem ongga erek efeinah deika noba ebsi komowa onjuj en jeska Allah. Noba kota koma onjuj rot ongkoska eteb erek ojaga egens ongga oumna esinsa jeskaseda ongkoska eteb nou efen igers. 3Beda didif dig oga eteb egens jeska kursi eteb insa koma agot oida, "Ebeibeyaif bera Allah onjuj jah gu efen rusnok rifekesa. Noba Ofa bera eker morototuma jera rua ojgomuja. Rua bera rirek Ofa efen rusnok, noba Ofa bera eker jera rua erek rerin Allah. 4Allah omosuna rusnok insa koma itoh jeska riteij. Rusnok rineita rufogu okora deika guru ni, rusnok rudou onokumkum deika guru ni, rusnok rinebisa deika guru ni, noba rusnok rinagos deika guru. Jeska mar ongga ensis nomnaga bera eseiseifa fob." 5Beda Ofa ongga engker gij kursi eteb insa koma agot oida, "Didif dumotunggom mar nomnaga erek efeinah deika." Beda Ofa tein agot oida, "Bua bugu keingg mar ongga dimagot kef nomnaga, jeska mar insa koma bera erek tenten noba rusnok rudou ororu ojgomu." 6Beda Ofa agot gu didif oida, "Mar nomnaga bera angh gij efera fob. Didif bera Alfa jera Omega. Didif ongga erek sismeni, noba ongga erek omoisa rot mar nomnaga tein. Noba rusnok ongga magon enir bera rimej mei jeska dedin mei eiteij ah ongga ereita eiteij ah gu rusnok. Noba rua rinengk mei insa koma jeska Didif guru. Tina Didif dimeita mei koma gu rua rot oubji ojgomu. 7Noba rusnok ongga rinesiri gu Bilis guru, rua bera rimesma mar ongga oufamofa insa koma si. Noba rua rimeja erek dedin edeser noba Didif dimeja erek rua rerin Allah. 8Tina rua ongga mojenir rot Didif fogora runororu Didif guru ni, rua ongga runororu dedin duga guru ni, rua ongga rita mar erek oska efekeifa ni, rua ongga ragob rusnok enjgineg ni, rua ongga risiri morototuma ni, rua ongga risa mar ongga oska skoita rusnok enjgineg ni, rua ongga rugif gu mar ongga erek tenten guru ni, rua ongga rucuwei mar ni, rua koma nomnaga bera rimeja gu mahmei meren ongga eisa egigir ojgomu. Koma erek rua ranggos rot ofosma jueka." 9Erek koma beda malaikat egens ongga agei mongkei mos cinja erfeka ongga ebera rot Allah efen mar okum cinja erfeka nou mona ongga omoisa bera en skoita didif. Beda ofa agot gu didif oida, "Bua bin jera didif jah sif, beda didif dumocunc ofa ongga erek Domba Efer efen arja gu bua." 10Beda didif disma owesa efek jeskaseda dik mar erek kef oida, malaikat egens koma ofra didif jah memaga ongga erek skidameda. Beda ofa ocunc kota Yerusalem ongga ebsi komowa noba onjuj jeska Allah gu mebaga gu didif. 11Noba kota koma efen efesa ongga eskeiramera eteb morototuma erek Allah efen efesa ongga eskeiramera eteb tein. Efen efesa insa koma bera morototuma erek mamu egens ongga efen efera osok noba eirirbi eteb. 12Noba mejga mamu ongga aksa eteb angh rejrej joug kota koma. Noba mejga mamu insa koma efen montouj setka kungkob erfeka. Noba malaikat egens ont joug montouj insa koma egens egens. Noba runggu keingg Israel ebic setka kungkob erfeka rerin rufoka egens egens tumu montouj eitoufu insa koma. 13Noba mejga mamu ongga angh jah mowa orogna efen montouj orgomu. Noba mejga mamu ongga angh jah mowa ensiri gij efen montouj orgomu. Noba ongga angh jah emaga efen montouj orgomu. Noba ongga angh jah agosu efen montouj orgomu. 14Noba mejga mamu insa koma nomnaga bera angh esij mamu efebr setka kungkob erfeka ongga ahais doska. Noba runggu keingg rasul setka kungkob erfeka ongga rumfij Domba Efer sis fob rerin rufoka tumu mamu efebr setka kungkob erfeka insa koma tein. 15Beda malaikat egens insa koma ongga emfesij mar gu didif bera agei moskur emas egens tumu etma. Noba ofa era moskur koma ereni kota insa koma rot mejga mamu jera montouj efen tein erek egaho. 16Noba kota insa koma efen efefi jera aksa jera akseij ideja erek edamokuma ojgomu. Noba ofa ereni jeni kota insa koma. Beda ofa ek rot oida kota insa koma efen efefi jera aksa jera akseij ideja bera edamokuma erek 2,400 kilometer. 17Beda ofa tein ereni jeni mejga mamu insa koma ongga angh rejrej kota koma rot efen ontumba erek egaho. Noba ofa ek rot oida efen ontumba bera erek 60 meter. Malaikat ereni jeni rot mar insa koma morototuma erek rusnok giskini rireni jeni mar ojgomu. 18Noba mejga mamu insa koma bera runtunggom jeska mamu ongga efera osok doska noba ongga erek eirirbi eteb. Noba kota koma bera runtunggom jeska emas ongga eirirbi erek kasinam efena eirirbi eteb. 19Noba rira mamu ongga efera osok noba eirirbi eteb fogora ruroumna mamu efebr setka kungkob erfeka insa koma ongga mejga mamu ot esij. Nou mamu efebr ongga egens bera rira mamu ongga efeb titnetna erek ofrahamaha. Noba ongga egeka bera rira mamu ongga efen efeb titnetna erek ahta mei ahta. Noba ongga orgomu bera rira mamu ongga efen efeb titnetna erek ebsibsi tein. Noba ongga tohkuru bera rira mamu ongga efen efeb titnetna erek ebsibsi orohoh jera mebi. 20Noba ongga cinja bera rira mamu ongga efen efeb titnetna erek mebi moubja. Noba ongga cinja erfens bera rira mamu ongga efen efeb titnetna erek ekeni mebi. Noba ongga cinja erfeka bera rira mamu ongga efen efeb titnetna ai erek oruk. Noba ongga cinja orfomu bera rira mamu ongga efen efeb titnetna erek igor efeibah. Noba ongga cinja tohkuru bera rira mamu ongga efen efeb titnetna erek ai orugmok ojgomu. Noba ongga setka bera rira mamu ongga efen efeb titnetna erek oruk orohoh ofraha. Noba ongga setka kungkob erfens bera rira mamu ongga efen efeb titnetna erek igor efeibah ojgomu. Noba ongga setka kungkob erfeka bera rira mamu ongga efen efeb titnetna erek ekeni ofom ahta. 21Noba mejga mamu efen montouj setka kungkob erfeka orofosutut egens egens bera erek siriow efej egens ongga efen efera osok eteb. Noba kota insa koma efen semfag nomnaga bera erek emas ongga eirirbi eteb erek kasinam efena ongga eirirbi. 22Noba didif dinek mod egens ongga erek Allah efen mod jah suma guru. Jeska rusnok rugif gu Allah jera Ofa ongga erek Domba Efer sinefo sinefo gij kota insa koma ojgomu. 23Noba mowa jera mesta eneisa gij kota insa koma deika guru. Jeska Allah esinsiyai efen efesa ongga eisa eteb bera adaij nou kota koma. Noba Ofa efen Domba Efer insa koma bera erek lampu ongga eisa nou rusnok jah suma. 24Noba kota koma efen eisa eteb jeska Allah bera ejinten rusnok nomnaga. Noba raja-raja mebif nomnaga rumorka rerin mareibra ongga ongkoska eteb jah kota koma. 25Noba kota insa koma efen montouj bera runof joug jinaga guru. Jeska rua rinek motkobah deika tein jinaga guru. 26Noba rumorka mar ongga ongkoskamoka jera mar ongga erek ofoufem jeska monuh nomnaga jah kota koma. 27Noba mar ongga oska bera onoira gij kota koma jinaga guru. Noba rinek rusnok rutunggom mar ongga oska egema tein gij kota koma deika guru. Tina rik rusnok ongga rerin rufoka bera angh gij Domba Efer efen buku eiteij ah ojgomu.

will be added

X\