Wahyu 20

1Erek koma beda didif dik malaikat egens onjuj jeska mebaga. Ofa orka rantai jera gusin tumu etma. Noba gusin insa koma bera nou orof joug montouj mebi efesi. 2Beda malaikat insa koma agei ofa ongga enofoguma rot mona ongga dektek fob noba ongga rinjeka ofoka oida magosu ongga ofogog ni, Bilis ni, Setan ni. Beda malaikat koma era rantai insa koma erakid ofa rot ahais. Beda malaikat eij ofa gij mebi efesi, beda era gusin insa koma orof montouj joug ofa gij tahun rara ribu egens. 3Ofa otunggom mar koma jeskaseda enadaij nou Bilis orokrusa rusnok mebif gij tahun rara ribu egens deika guru. Nou ongga tahun ribu egens insa koma oisa fob, beda rumohoda montouj efeyi jeska ofa fogora omosuwa ofa gij mona ongga estir deika ojgomu. 4Erek koma beda didif dik kursi jera rusnok ongga ringker gij kursi insa koma. Noba rua bera rinsma owesa efek jeskaseda ruga ojga rot rusnok rerin rita mar erek teinefa. Beda didif dik rusnok ongga rusnok enjgineg rinris ribirfaga jeska fob. Jeska rua bera ongga rumftuftu rot Allah oga osok gij Yesus Kristus skoita rusnok enjgineg sis fob. Noba rua insa koma bera runougif gu mar ofogog egens insa koma jinaga guru. Noba rua tein rinesma mar tumu ritoufu era ritma ongga orocunc rot mar ofogog insa koma efen ofoka tein jinaga guru. Rua insa koma rimefena ebah sons beda rufoka ereij keingg mar morototuma jera Yesus Kristus gij tahun rara ribu egens insa koma. 5Rua bera ongga rimefena ebah sons sismeni. (Nou ongga tahun ribu egens insa koma oisa fob, beda Allah efen rusnok enjgineg ongga ranggos fob bera rifena ebah sons tein.) 6Rua ongga rifena ebah sons gij tahun ribu egens insa koma bera rudou efaga ouka ojgomu, jeska rerin rudou bera erek ebsi komowa. Noba Allah eneij rua gij mahmei meren morototuma jera rusnok enjgineg guru. Jeska rusnok ongga Allah emeij gij mahmei meren bera erek rusnok ongga rimagos rot ofosma jueka deika. Tina rusnok ongga rudou ebsi komowa insa koma bera rimeja erek Allah jera Yesus Kristus efen imam-imam. Beda rua rumofoka ereij keingg mar nomnaga morototuma jera Allah gij tahun rara ribu egens insa koma. 7Erek koma noba, nou ongga tahun ribu egens insa koma oisa fob, beda rumosuwa Bilis jeska mebi efesi insa koma ongga ofa engker gij erek mod oskusk. 8Beda ofa emeja jeskaseda orokrusa rusnok gij monuh mebif nomnaga ongga rinjeka ofoka erek Gog jera Magog. Beda ofa omohoturu rusnok insa koma nomnaga jeskaseda rimedima jera Allah. Noba efen rusnok insa koma bera rufoukou doska erek mebsta tuturu ongga angh gu mei mojumu efembra. 9Rua rimecira morototuma jah enama enama tein erek rusnok rufoukou doska. Beda rua rimeja skoita kota egens ongga Allah efen rusnok ringker gij. Beda rua nomnaga rumot rejrej kota egens koma ongga Allah odou okora rot. Tina mah eisa egigir omojuj jeska mebaga noba et rua fogora riseiseifa nomnaga. 10Beda Allah emeij Bilis ongga orokrusa rusnok rufoukou insa koma gij mahmei meren ongga eisa egigir. Jefeda ofa eker morototuma jera mar ofogog egens insa koma noba jera nabi ongga ebireira egens insa koma tein ojgomu. Beda rua rimeita rufogu okora eteb doska orofosut mona jera motu rot mona ongga ah aibin ojgomuja. 11Erek koma beda didif dik kursi eteb egens ongga ebsi komowa jera Ofa ongga engker gij kursi koma. Beda mebif jera memaga nomnaga eja eseiseifa jah Ofa odou ojgomu. 12Beda didif dik rusnok nomnaga ongga ranggos fob. Rua bera erek rusnok ongga rufoka aksa jera rusnok ongga runok rufoka gij guru. Noba rua rut gu kursi eteb insa koma odou. Beda didif dik buku-buku ongga ohoda fob. Noba didif dik buku egema egens deika ongga ohoda fob. Noba buku egens koma efen ofoka oida, Buku Eiteij ah. Noba Allah oga ojga rot rusnok ongga ranggos insa koma ororu rerin rita mar jeni erek runggu gij buku insa koma. 13Beda rusnok ongga ranggos fob rurogna jeska mei mojumu efei jera mebif efesi jera monuh mar agos tein. Noba Allah oga ojga rot rua orofosutut egens egens ororu jeni rerin rita mar ongga sis fob. 14Beda Allah agei rua ongga rerin owesa efek nou rurotunggom rusnok riseiseifa noba ongga rerin owesa efek rot monuh ongga rua ongga riseiseifa ringker gij, beda Ofa eij rua insa koma gij mahmei meren tein. Noba mahmei meren insa koma bera orocunc rot rusnok insa koma ongga ranggos rot ofosma jueka. 15Noba Allah eij orofosutut rusnok ongga rufoka enah gij efen Buku Eiteij ah insa koma guru gij mahmei meren ojgomu.

will be added

X\