Wahyu 2

1Erek koma beda Ofa insa koma agot gu didif Yohanes deika oida, "Mar ongga ai juens dimagot gu bua bera bugu keingg rot skoita malaikat egens ongga ont joug rusnok Mod Ari gij kota Efesus erek kef oida, Oga kef bera en jeska Ofa ongga agei motur cinja erfeka tumu etma jah ognosk, noba ongga encira jah gu lampu emas cinja erfeka ongga angh esij mowuj mosu cinja erfeka efekesa. Ofa bera agot erek kef oida, 2Didif dijginaga rot iwa ongga Kristen gij kota Efesus yeyin ita mar nomnaga fob. Noba Didif dijginaga rot oida iwa imfarur rot ahais noba oida iwa ita idou ongga ahais gij mona ongga mar okum ereneni iwa tein ojgomuja. Didif dijginaga rot oida idou eneskes rot rusnok ongga rutunggom mar ongga oska jah gu ifekesa tein guru. Noba iwa tein inororu rua ongga ragot rot ruga efei oida rua bera erek rasul ongga tenten rot ebeirens guru. Tina iwa ijeka joug rua rot sismeni fog. Beda iwa incunc rua erek rasul ongga ebireira ojgomu fob. 3Noba iwa bera ongga ita idou ongga ahais askesi mar okum ah keingg iwa ojgomuja jeskaseda iroru dedin duga. Iwa tein ineita idou ongga eskes rot mar insa koma guru. 4Erek koma tina Didif dudou okum rot iwa osok gij mar ofoka egens erek kef. Gij mona ongga iwa inroru Didif erek efeinah ros, bera idou okora eteb rot Didif erek eteb. Tina gij mona ongga ebeibeyaif bera idou ongga okora rot Didif insa koma bera ensiri fob. 5Didif duis gu iwa jeskaseda iwa idou ah keingg rot mona ongga idou okora rot Didif erek eteb sis fob deika sons ojgomu. Beda iwa imek rot teinefa yeyin idou ongga eskes rot Didif gij mona ebeibeyaif fob. Iwa imeesa joug rot yeyin mar ongga oska fogora ita idou ongga okora rot Didif erek sis fob deika sons ojgomu. Tina erek iwa inemeesa joug yeyin mar ongga oska insa koma guru, beda Didif dimen noba dukweisi lampu ongga ont gu iwa ifekesa. 6Erek koma tina iwa itunggom mar egens ongga ereita dudou eskeira rot iwa ros. Koma bera, iwa idou oska rot mar ofogog ongga Nikolaus otunggom ojgomuja. Jeska Didif tein dudou oska rot mar ofogog ongga ofa otunggom insa koma ojgomuja. 7Erek iwa idou os isma idou ongga ebriyi gij mar insa koma, beda iwa ig rot mar ongga Efena Ebsi agot gu rusnok Mod Ari insa koma rot iskusk ojgomu. Jeska erek iwa inesiri gu Bilis guru, beda Didif dumoroun iwa fogora iwa imet dedin mega efek ongga eita eiteij ah si. Mega eiteij ah insa koma bera ont gu monuh ongkoska ongga Allah engker gij." 8Erek koma beda Ofa agot gu didif Yohanes deika oida, "Mar ongga ai juens dimagot gu bua bera bugu keingg rot skoita malaikat egens ongga ont joug rusnok Mod Ari gij kota Smirna erek kef oida, Oga kef bera en jeska Ofa ongga erek sismeni jera ongga erek omoisa rot mar nomnaga. Ofa bera ongga anggos, beda endebecki jeska agos fob. 9Ofa agot erek kef oida, Didif dijginaga rot oida mar okum ah keingg iwa ongga Kristen gij kota Smirna fob. Noba Didif dijginaga oida iwa irek ifojingki tein. Tina ahah Allah eiteij bera iwa yeyin ifoka aksa erek runa mei ahta, jeska iwa iroru Yesus Kristus ojgomuja. Didif dijginaga rot rusnok Yahudi ongga ranggot rourou oida rua ruroru Allah rot tenten, tina guru. Jeska rua ruga oruh iwa ojgomuja. Rua bera ongga rugif gu Bilis ojgomu. 10Iwa inemeesa rot mar okum ongga emah keingg iwa gij mona ongga emen guru. Jeska gij mona ongga emen bera Bilis emereneni iwa rot ahais fogora rusnok rimekris rineya jeska iwa jah mod oskusk. Beda iwa imeita ifera okora gij mona rara setka. Noba erek rua risejah rudou ofogog jeskaseda ragob iwa, beda iwa inesiri gu rua guru, tina iroru Didif rot ahais ojgomu. Beda Didif dimeita yeyin ifons ongga erek eiteij ah ongga efeinah noba ongga ah aibin ojgomuja gu iwa si. 11Erek iwa idou os isma idou ongga ebriyi gij mar insa koma, beda iwa ig mar ongga Efena Ebsi agot gu iwa ongga rusnok Mod Ari rot iskusk ojgomu. Jeska rusnok ongga rinesiri gu Bilis guru, rua bera rinagos gij mona ongga rusnok ragos rot ofosma jueka guru." 12Erek koma beda Ofa agot gu didif Yohanes deika oida, "Mar ongga ai juens dimagot gu bua bera bugu keingg rot skoita malaikat egens ongga ont joug rusnok Mod Ari gij kota Pergamus. Bua bugu keingg mar erek kef oida, Oga kef bera jeska Ofa ongga agei meiteb kalawan ongga efeya jah enama enama tein tumu etma. 13Ofa agot erek kef oida, Didif dijginaga rot iwa Kristen ongga ingker gij kota Pergamus. Didif dijginaga rot oida yeyin monuh ongga iwa ingker gij bera Bilis ofoka ereij keingg rusnok rufoukou jah suma. Tina iwa iroru dedin dufoka rot tenten ros. Jeska gij mona ongga Antipas oftuftu osok gij dedin dufoka rot tenten jah suma, beda rusnok ongga Bilis ofoka ereij keingg gij yeyin monuh insa koma bera ragob ofa rot. Erek koma tina iwa bera inekikif jeska Didif gij mona insa koma jinaga guru. 14Erek koma tina mar egema ongga iwa intunggom bera ereita dudou okumkum rot iwa ojgomu. Rusnok rineya jeska iwa bera ruroru mar ongga oska ongga Bileam oftuftu rot sis fob. Jeska Bileam bera ongga oftuftu mar gu Balak jeskaseda ofa oroku Israel rerin rimower rudou efesi fogora rua tein rutunggom mar ongga oska. Mar ongga oska insa koma bera erek rua rit marska ongga rusnok enjgineg rira jeskaseda rirejiteyi skoita mar ongga tenten guru, jera risiri morototuma erek ebireira tein. 15Noba erek koma tein rineya jeska iwa bera iroru mar ongga oska ongga rusnok ongga ruroru Nikolaus ruftuftu rot. 16Jefeda Didif duis gu rineya insa koma jeskaseda rimeesa joug rot rerin mar ongga oska insa koma ojgomu. Tina guru, beda Didif dimen rot ebeirens skoita rua. Beda Didif dimera meiteb kalawan ongga orogna jeska dawesi fogora dagob rua si. 17Erek iwa idou os isma idou ongga ebriyi gij mar insa koma, beda iwa ig rot mar ongga Efena Ebsi agot gu iwa ongga rusnok Mod Ari rot iskusk ojgomu. Erek iwa inesiri gu Bilis guru, beda Didif dimeita maat egens ongga ofoka manna gu iwa. Manna insa koma bera ah jejema gij mebaga ros. Noba Didif dimeita mamu ebsi ongga dunggu keingg yeyin ifoka ongga efeinah tumu gu iwa si. Noba yeyin ifoka insa koma bera ah jejema jeska rusnok enjgineg. Iwa isinsiyai egens egens ijginaga rot yeyin ifoka ongga efeinah insa koma ojgomu." 18Erek koma beda Ofa agot gu Didif Yohanes deika oida, "Mar ongga ai juens dimagot gu bua bera bugu keingg rot skoita malaikat egens ongga ont joug rusnok Mod Ari gij kota Tiatira erek kef oida, Oga kef bera en jeska Allah efen Efesa. Noba efen eiteij efej bera erek mah eisa egigir eteb, noba efen okoda bera eirirbi eteb doska erek kermom ongga rukub gij mah fogora efeskrenmeni. 19Ofa agot erek kef oida, Didif dijginaga rot oida iwa ongga Kristen gij kota Tiatira bera intunggom mar ofoukou ongga erek oufamofa ojgomu. Didif dijginaga rot oida idou okora rot Allah ni, idou ororu efen oga ojgomuja ni, iwa yufij Ofa rot iskusk ojgomu ni, iwa yut rot ahais gij mar okum ongga ereneni iwa ni, noba ebeibeyaif bera iwa itunggom mar ongga erek oufamofa ekirsa jeska mar ongga sis fob tein ni. 20Erek koma tina mar egema ongga iwa intunggom bera ereita dudou okum rot iwa ojgomu. Jeska iwa irons rot ojaga egens ongga ofoka Izebel fogora ofa oftuftu mar ongga erek tenten guru jah gu ifekesa ojgomuja. Ofa ocunc esinsa erek Allah efen nabi ojaga egens, tina guru. Jeska oisouska mar ongga ofa oftuftu bera ofa orokrusa dedin rusnok ongga rumfij Didif fogora rua risiri morototuma, noba rua tein rit marska ongga rusnok rira nou rirejiteyi skoita mar ongga erek tenten guru. 21Didif duh mona gu ojaga insa koma jeskaseda emeesa joug rot efen mar ongga oska insa koma. Tina ofa enemeesa joug rot jinaga guri. 22Jefeda Didif dumofra mar okum eteb keingg ofa rot si, beda ofa emah rot ofogu okora eteb ojgomuja. Noba erek rusnok ongga ruromohohuma jera ofa rot efen mar ongga oska insa koma ojgomuja, noba rua rinekikif jeska mar koma guru, beda Didif dimesa mar okum erek insa koma skoita rua tein si. Beda rua tein rimeita rufogu okora eteb rot si. 23Beda Didif dimagob ofa efen rusnok ongga ruroru ofa nomnaga fogora rimagos ojgomu. Beda rusnok Mod Ari nomnaga rimejginaga rot oida Didif bera ongga diajga joug gij orofosutut rusnok egens egens rudou efesi. Jefeda Didif dumofra mar okum eteb keingg rua ororu jeni rerin rita mar ongga oska. Noba didif dimeita oufamofa eteb gu rusnok ororu jeni rerin rita mar ongga oufamofa si. 24Noba Didif dijginaga rot iwa ineya ongga ingker gij kota Tiatira ongga inororu mar ongga oska ongga ojaga egens koma oftuftu guru. Mar ongga oska koma bera rineya rijeka erek mar ongga en jeska Bilis, tina rindemdemi jeska rusnok ongga runororu ojaga egens insa koma guru. Jeska iwa inororu ojaga egens insa koma rot efen mar ongga oska guru, beda Didif dunofra mar okum keingg iwa guru. 25Tina iwa yagei dedin dufoka rot ahais ojgomuja onjoros mona ongga Didif dungksons en fob. 26Erek koma jeska rusnok ongga rinesiri gu Bilis guru, tina rua ruroru mar ongga dudou ejginaga rot onjoros mona ongga omoisa, beda Didif dimeita owesa efek gu rua jeskaseda rufoka ereij keingg rusnok mebif nomnaga. 27Runggu gij Mar Efeyi Ebsi erek kef oida, 'Ofa bera ofoka ereij keingg rua rot ahais doska. Ofa omohoda rot mesa gij monuh mebif nomnaga erek osnok egens orobuma debeji fogora ofojeres nomnaga!' Owesa efek insa koma bera morototuma erek owesa efek ongga Akeina eita gu Didif fob. 28Beda Didif dimeita mensir efaga ongga eisa egigir nou rahah tentena gu iwa. 29Erek iwa idou os isma idou ongga ebriyi gij mar insa koma, beda iwa ig rot mar ongga Efena Ebsi agot gu iwa ongga irek rusnok Mod Ari insa koma rot iskusk ojgomu."

will be added

X\