Wahyu 19

1Nou ongga koma oisa fob beda didif dig rusnok riskembemba gij mebaga ongga risitit oida, "Mimif nomnaga misitit mar eteb gu mifmin Allah ojgomu. Jeska Ofa bera ongga eita eiteij ah ongga efeinah gu rusnok. Noba Ofa bera ongga efen ofoka ongga aksa eteb ojgomu. Noba Ofa tein efen owesa efek ongga ekirsa jeska nomnaga. 2Noba Ofa bera ongga oga ojga rot rusnok nomnaga rot tenten jera odou ongga aharukamoka ojgomu. Jeska Ofa omfra mar okum eteb keingg rusnok ongga rudou eftirir keingg mar ofoukou erek ojaga eja motu egens ongga odou eftirir keingg runer rufoukou. Jeska rua bera ongga rurokrusa rusnok mebif jeskaseda rugif gu efen mar ongga oska efekeifa ojgomu. Jefeda Allah ensesa efen rusnok rugufu sons skoita ofa fob. Jeska rua bera ongga ranggob rua sis fob." 3Beda didif dig rusnok gij mebaga insa koma rufra ruga eteb oida, "Mimif nomnaga misitit gu mifmin Allah ojgomuja. Jeska mah efeb jeska kota koma ongga mah ent eribseb nomnaga fob bera osok jah mebaga ojgomuja." 4Erek koma beda ebirfager Mod Ari rufok setka egeka noba tohkuru ongga ringker gij mebaga jah Allah odou jera mar ongga efena ebah tohkuru ongga ringker gij mebaga tein bera risiri jah Allah odou fogora ragerir oida, "Mimif nomnaga misitit gu Bua. Noba mimif mudou os erek koma ojgomu!" 5Erek koma beda didif dig oga egens en jeska kursi ongga Allah engker gij noba agot oida, "Iwa nomnaga ongga erek Allah efen rusnok ongga rumfij Ofa jera iwa nomnaga ongga erek ifoka aksa jera iwa ongga inok ifoka gij guru bera isitit Ofa ojgomu." 6Erek koma beda didif dig rusnok rufoukou doska ongga ruga eteb. Noba ruga insa koma ogugur eteb doska erek mei mos ongga onsoka gij ofoska fogora ogugur eteb, era erek moc ogugur eteb. Noba rusnok insa koma ruis rot ruga eteb oida, "Mimif nomnaga misitit Allah. Jeska mifmin Tuhan Allah ongga efen owesa efek bera ofoka ereij keingg mar nomnaga erek raja egens ojgomuja. 7Mimif nomnaga mudou efaga ouka noba mita mudou ongga erirei eteb, noba misitit rot efen ofoka ongga aksa tein. Jeska Ofa ongga erek Domba Efer bera en fob jeskaseda oskotu efen arja. Noba efen arja insa koma bera ensejah esinsa erek ongkoska nou efen igers insa koma fob. 8Noba arja insa koma bera esma meifeti ongga erek ebsi komowa noba eirirbi eteb jeskaseda ergi gij mona insa koma. " (Meifeti ongga ebsi komowa insa koma bera orocunc rot Allah efen rusnok rerin rita mar ongga erek ongkoska). 9Beda malaikat egens insa koma agot gu didif oida, "Bua bugu keingg mar erek kef oida, 'Oufamofa eteb rot rusnok ongga Allah oga ebin rua jeskaseda riremecinma jera Ofa ongga erek Domba Efer ongga omoskotu arja. Fogora rua ruina maat keingg morototuma jera Ofa.' " Beda malaikat egens koma agot deika oida, "Allah esinsa bera ongga enagot rot mar insa koma ojgomu." 10Nou ongga didif dingg malaikat koma anggot mar insa koma nomnaga oisa fob, beda didif disiri jah ofa odou jeskaseda dugif gu ofa. Tina ofa agot gu didif oida, "Bua bunougif gu didif erek koma guru. Tina bua bugif gu Allah ojgomu. Jeska didif bera dufij Allah morototuma erek bua jera bebin obhujir tein ongga ruroru mar ongga Yesus Kristus anggot rot ojgomu. Bugif gu Allah ojgomu." Ofa agot mar erek koma gu didif jeska mar nomnaga ongga Allah efen nabi-nabi rimfesij rot sis fob bera osok gij Yesus Kristus. 11Nou ongga mar insa koma oisa fob, beda didif dik mebaga ohoda. Beda didif dik kuda egens ongga efeji ebsi komowa. Noba didif dik osnok egens ongga eifef esij kuda egens insa koma. Ofa ofoka bera efen ofou erek kef oida, "Ofa bera ongga ofij Allah rot tentenmen noba ongga otunggom mar ongga tenten ojgomu." Jeska Ofa bera ongga oga ojga rot rusnok nomnaga erek tenten ojgomu. Noba Ofa edi mesa oisouska odou ongga oga ojga rot mar erek tenten tein. 12Ofa efen eiteij erek mah ongga eisa egigir. Noba Ofa aha manggem ofoukou ongga eirirbi eteb tumu ebirfaga. Noba efen ofoka ongga runggu tumu bera Ofa esinsiyai ejginaga rot efen ofou koisoisa ojgomu. Rusnok egema tein rinejginaga rot efen ofou jinaga guru. 13Ofa ergi meifeti ongga ebsi komowa ongga ric gij ogufu. Noba efen ofoka oida, Allah Efen Oga. 14Noba efen tentarer gij mebaga bera rifef esij kuda-kuda noba runtoij Ofa. Rua rirgi meifeti ongga ongkoska eteb noba ebsi komowa. 15Noba meiteb kalawan ongga efeya doska orogna jeska Ofa awesi. Ofa emera meiteb kalawan koma fogora eragob mesa gij monuh mebif nomnaga. Ofa omofoka ereij keingg rua rot ahais doska. Noba Ofa omorka mar okum eteb jeska Allah ongga efen owesa efek eteb. Beda Ofa omot keingg rua rot rerin mar ongga oska, erek rusnok rut keingg anggur efek fogora efen efei orogna jeska. 16Noba runggu keingg tumu meifeti ongga angh esij efembra ofoj jera tumu okom ofoj efen ofoka erek kef oida, "Raja ongga ekirsa jeska raja-raja nomnaga," jera, "Tuhan ongga efen owesa efek ekirsa jeska nomnaga." 17Erek koma beda didif dik malaikat egens ongga ont gij mowa. Noba ofa ois rot oga eteb gu mem nomnaga ongga ofu gu mebaga oida, "Iwa nomnaga iremecinma ebeirens jeskaseda it mar ofoukou ongga Allah ensejah nou iwa fob. 18Iwa iremecinma jeskaseda it rusnok rufogu ojgomu. Iwa in noba it rufogu jeska rua ongga erek raja-raja ni, ebirfager tentarer nomnaga ni, rusnok ongga rerin owesa efek ni, kuda-kuda jera rusnok ongga rifef kuda insa koma ni, rusnok rufoukou ongga erek rufoka aksa ni, rua ongga runok rufoka gij guru ni, rusnok ongga runt gu risinsa ni, rusnok ongga rumfij rerin ebirfager ni, rit nomnaga rerin rufogu ojgomu." 19Erek koma beda didif dik mar ofogog egens ongga orogna jeska mebi efesi sis fob jera raja-raja mebif nomnaga jera rerin tentarer nomnaga. Rua rumohoturuma fob jeskaseda rimedima jera Osnok egens insa koma ongga eifef kuda ongga ebsi komowa jera Ofa efen tentarer. 20Tina Ofa ongga eifef kuda ongga ebsi komowa insa koma bera agei mar ofogog egens insa koma morototuma jera osnok egens ongga erek nabi ebireira. Nabi ebireira koma bera ongga ontunggom mar onswos ahah rusnok riteij. Noba oisouska mar onswos insa koma bera ofa orokrusa rusnok jeskaseda risma mar tumu ritoufu ongga orocunc rot mar ofogog egens insa koma efen ofoka. Beda rua rugif gu mega efaga ongga ranggosus erek mar ofogog insa koma efen efaga tein. Beda Ofa ongga eifef kuda ongga ebsi komowa insa koma bera eij goga insa koma rot gefena ebah gij mahmei meren ongga eisa egigir fogora et gofos ojgomuja. 21Beda Ofa era meiteb kalawan ongga orogna jeska awesi fogora eragob raja-raja jera rerin tentarer insa koma nomnaga. Beda mem insa koma nomnaga rit rusnok insa koma rerin rufogu ojgomuja onjoros erek ereyer doska.

will be added

X\