Wahyu 15

1Nou ongga koma oisa fob, beda didif dik mar egens egema deika gu mebaga ongga erek onswos noba ongkoska eteb. Mar koma orocunc rot mar ongga emen deika. Mar onswos insa koma bera erek malaikat cinja erfeka ongga rurka mar okum cinja erfeka. Noba mar okum insa koma orotunggom rusnok rita rufogu okora eteb rot ongga omoisa. Jeska nou ongga rua raha mar okum cinja erfeka insa koma keingg rusnok fob, beda mar ongga Allah ontunggom rot odou ongga okum eteb skoita rusnok mebif bera oisa fob. 2Beda didif dik mar erek mei mojumu efei ongga edeider noba efena eirirbi eteb erek kasinam. Noba mei insa koma oromohohuma jera mah tein. Noba didif dik rusnok ongga rinesiri gu mar ofogog insa koma ongga orogna jeska mebi efesi sis fob guru. Rua tein bera ongga runougif gu mega efebr ongga orocunc rot mar ongga ofogog insa koma tein guru. Noba rua tein bera ongga rinesma nomor tumu ritma era ritoufu ongga orocunc rot mar ofogog insa koma efen ofoka guru. Rua bera rut gu mar ongga erek mei mojumu efei insa koma efembra. Noba rua ragei mar ongga erek moubseja ongga Allah eita gu rua tumu ritma. 3Noba rua ruf medemer osok gij mar ongga Allah ontunggom oisouska Musa ongga omfij Ofa sis fob, jera mar ongga Allah ontunggom oisouska efen Domba Efer tein. Rua ruf medemer erek kef oida, "Bua bera Tuhan Allah ongga efen owesa efek eteb doska. Noba mar nomnaga ongga Bua butunggom bera erek onswos eteb. Mar nomnaga ongga Bua butunggom bera erek tenten ojgomu. Bua buga ojga rot rusnok jera budou ongga aharukamoka ojgomu. Bua bera erek raja nou rusnok monuh nomnaga. 4Rusnok nomnaga rimeesa rot bebin bufoka, noba rua rufra bebin bufoka erek aksa eteb ojgomu. Jeska Bua bisinsiyai bera ongga erek ebsi komowa ojgomu. Rusnok monuh nomnaga bera rimen fogora rumougif gu Bua ojgomuja. Jeska rusnok nomnaga rijginaga rot bebin bita mar ongga erek ongkoska eteb rot tenten fob, jefeda rua rimen noba rugif gu Bua." 5Nou ongga koma oisa fob, beda didif dik mar gij mebaga erek kef oida, Didif dik montouj ohoda jeska mer efesi ongga rinsah burwa ongga orocunc rot mar ongga Allah anggen eimofoj rot gu rusnok sis fob gij. Mer efesi insa koma bera ah deismos gij Mod ongga Allah efen. 6Beda malaikat cinja erfeka rurogna jeska mer efesi insa koma rot mar okum cinja erfeka insa koma ongga rumorka. Noba rua bera rirgi meifeti ongga erek ebsi komowa. Noba rerin meifeti insa koma ongga eirirbi eteb erek emas bera risa tumu ringkwesi. 7Beda mar efena ebah egens jeska mar efena ebah tohkuru ongga ah gu Allah odou bera eita mongkei mos ongga erek emas gu orofosutut malaikat cinja erfeka insa koma. Noba mar ongga ah gij mongkei mos insa koma bera orocunc rot Allah odou ongga otkonu oska eteb rot rusnok mebif. Ofa bera ongga engker rot mona ongga ah aibin ojgomuja. 8Beda mer efesi insa koma bera ebera rot mah efeb eteb ongga en jeska Allah efen owesa efek jera efen ofoka ongga aksa eteb. Mar insa koma bera didif dik erek mah efeb ongga ofoukou doska. Noba enadaij nou rusnok egema tein ruira gij mer efesi insa koma jinaga guru onjoros malaikat cinja erfeka insa koma raha mar ongga okum cinja erfeka keingg rusnok mebif sismeni fog. Mar koma bera orotunggom rusnok mebif fogora rufogu okora eteb erek omoisa rot fob.

will be added

X\