Wahyu 14

1Koma oisa fob beda didif dik Domba Efer ot gu memaga ofos Sion. Noba rusnok rufok 144,000 rut jah suma morototuma jera Ofa tein. Noba Domba Efer insa koma efen ofoka jera efen meka ofoka bera runggu tumu ritoufu tein. 2Beda didif dig mar ongga ogugur eteb egens jeska mebaga ongga erek mei ofoska ongga oforkamaga noba ongga erek moc ogugur eteb tein. Noba didif dig mar egens deika erek rusnok ongga rindi mar ongga erek moubseja oga tein. 3Noba rua insa koma ruf medemer rot mar ongga erek efeinah skoita Allah ongga engker gij efen kursi, noba skoita mar ongga efena ebah tohkuru rudou, noba skoita ebirfager setka egeka noba tohkuru rudou tein. Noba rusnok mebif rufok 144,000 ongga Domba Efer onskotu fob bera rijginaga rot medemer egens insa koma ojgomu. Noba rusnok enjgineg bera guru. 4Rusnok rufok 144,000 insa koma bera erek rua ongga rita mar rot rudou ongga ebsi komowa ojgomuja. Rua rinerek rusnok ongga rinsiri jera rujager ebireira guru. Noba rua ruroru Domba Efer insa koma ojgomuja ojgomu. Ofa onskotu rua jeska rusnok mebif erek rusnok ongga sismeni jeskaseda oroun rua skoita Allah erek mar ongga orougif gu Ofa fogora ereita Ofa odou eskeira rot. Koma erek osnok egens ongga orka maat efej ongga sismeni jeska efen mekeni jeskaseda eita gu Allah erek mar ongga orougif gu Ofa ojgomu. 5Rua bera erek rusnok ongga runocuwei mar oskiyai tein jinaga guru. Noba enadaij nou rusnok enjgineg tein rucunc rua erek oska jinaga guru. 6Erek koma beda didif dik malaikat egens ongga ofu gu mebaga skidameda. Noba ofa orka Allah efen oga ongga oufamofa ongga ah rot mona ah aibin. Ofa orka oga insa koma jeskaseda efesij rot gu orofosutut rusnok ebic nomnaga ni, rusnok ruga nomnaga ni, monuh nomnaga ni. 7Beda ofa agerir rot oga eteb oida, "Iwa icunc idou ongga emeesa rot Allah noba isitit rot efen ofoka ongga aksa eteb. Jeska Allah efen eimofoj adaij fob. Jefeda Ofa omoga ojga rot mar nomnaga ongga rusnok mebif runtunggom fob. Iwa nomnaga yugif gu Ofa ongga ontunggom mebaga ni, mebif ni, mei mojumu efei ni, mei eiteij ni nomnaga." 8Beda malaikat ongga egeka ongga ontoij malaikat egens insa koma ofu gu mebaga skidameda tein. Noba ofa agerir rot oga eteb oida, "Ofa ongga ofoka kota Babel bera onghoda fob. Ofa ejeseiseifa fob! Jeska ofa bera ongga otunggom mar skoita rusnok rufoukou fogora rudou erebibei rot rerin mar ongga oska efekeifa ojgomuja, erek rusnok ongga rudou erebibei rot mofut efeyi ojgomuja. Jefeda rua rugif gu mar ongga oska efekeifa insa koma ojgomuja." 9Beda malaikat ongga orgomu ontoij malaikat egeka insa koma deika noba agerir rot oga eteb oida, "Iwa inororu mar ongga ofogog ongga orogna jeska mebi efesi guru. Noba iwa inougif gu mega efebr ongga rusnok runtunggom ongga erek orocunc rot ofa jinaga guru. Iwa inesma mar tumu itofu era gu itma ongga orocunc rot efen ofoka tein jinaga guru. 10Jeska Allah emeita efen odou omotkonu oska eteb skoita rusnok nomnaga ongga ruroru mar insa koma fob. Beda Ofa emaha mar okum eteb keingg rua nomnaga rot si. Mar ongga Allah omotunggom insa koma bera erek osnok egens ongga eradgodu rusnok enjgineg jeskaseda rij anggur efei ongga ekembemba eteb. Noba rua runokoja mar koma jinaga guru. Erek koma tein, gij mona ongga Allah omfra mar okum eteb keingg rusnok insa koma, beda rua runokoja jinaga guru. Mar okum koma bera erek mah eisa eteb ongga emet rua ojgomuja. Noba malaikat-malaikat jera Domba Efer rimek rusnok insa koma rita rufogu okora eteb gij mah ojgomuja. 11Jeska mah insa koma efen eisa egigir ah ojgomuja. Jefeda rusnok insa koma rita rufogu okora eteb ongga onoisa jinaga guru. Rusnok ongga rugif gu mar ongga ofogog egens insa koma, era ongga risma mar insa koma ongga orocunc rot efen ofoka tumu ritoufu tein, bera rimeita rufogu okora eteb gij orofosutut mona jera motu tein ojgomuja si. Rua rineja jeska mah eisa insa koma jinaga guru." 12Jefeda rua ongga rugif gu Allah efen oga noba ongga ruroru Yesus Kristus rot tenten ojgomu bera ruin keingg rudou efesi fogora rita rudou ahais gij mar okum ongga askesi ah keingg rua ojgomu. 13Erek koma beda didif dig oga egens jeska mebaga ongga agot gu didif oida, "Bua bugu keingg mar erek kef oida, ebeibeyaif rusnok ongga ranggos askesi rua ruroru Allah rot tenten ojgomuja bera rimeita rudou ongga efaga ouka eteb ojgomuja. Noba Efena Ebsi tein agot oida, 'Koma tenten ojgomu. Jeska rua bera rimejeker keingg rufons jeska mar okum ongga angh keingg rua sis fob ojgomuja. Beda rua rimesma rerin rufons rot mar oufamofa ongga rua runtunggom sis fob.' " 14Nou ongga mar insa koma oisa fob beda didif dik mar erek mocgoj ofog ongga ebsi komowa eteb. Noba didif dik osnok egens ongga erek Rusnok Efesa eker jah suma. Noba manggem ongga emas ah tumu eitoufu, noba Ofa agei meiteb yagegeb ongga efen efeya doska tumu etma tein. 15Beda didif dik malaikat egens egema deika. Ofa orogna jeska Mod ongga Allah efen gu mebaga. Beda ofa ois rot oga eteb skoita Ofa ongga engker gij mocgoj ofog insa koma oida, "Bua bira meiteb yagegeb beda biris maat efej ongga oruk fob gij mekeni. Jeska maat efej gu mebif bera nomnaga oruk fob." 16Jefeda Ofa ongga engker gij mocgoj ofog insa koma era meiteb eris maat efej gu mebif ongga oruk nomnaga fob. Beda Ofa ohoturu maat efej insa koma nomnaga nou esinsa fob. 17Erek koma beda didif dik malaikat egens egema deika orogna jeska Mod ongga Allah efen gu mebaga. Noba ofa tein agei meiteb yagegeb ongga efeya doska tumu etma. 18Beda malaikat egens egema deika ongga ont joug mah bera en jeska meja ongga angh jah Allah odou gij efen Mod efesi. Beda ofa ois rot oga eteb skoita malaikat egens ongga agei meiteb yagegeb insa koma oida, "Bua bira meiteb yagegeb ongga efeya doska beda bireris anggur efek gu mebif, jeska anggur efek insa koma bera oruk fob." 19Jefeda malaikat egens insa koma era meiteb yagegeb beda eris anggur efek gu mebif nomnaga fob. Beda ofa ohoturu anggur efek insa koma noba esah gij mansinya eteb fogora ot keingg gij nomnaga. Mansinya ongga ont keingg gij insa koma bera orocunc rot mar okum eteb ongga Allah omofra keingg rusnok. 20Ofa ot keingg anggur efek insa koma nomnaga gij mansinya jah kota ejmeg. Beda ogufu ofoukou eya jeska mansinya insa koma noba ofot osok doska gij meter egens noba ofod. Beda ogufu insa koma eya oforkamaga ojgomuja erek kilometer wuntin orgomu.

will be added

X\