Wahyu 11

1Nou ongga koma oisa fob beda didif disma moskur egens ongga erek rusnok rira nou rireni jeni mar. Beda oga egens agot gu didif oida, "Bua bireni jeni Mod ongga Allah efen jera meja ongga imam-imam ris mah gij mar esij. Beda bua tein bufosuit rusnok nomnaga ongga rugif gu Allah jah suma. 2Tina bua binereni jeni momas ongga angh rejrej Mod Allah guru. Jeska rua ongga Yahudi guru bera rimesma owesa efek jeskaseda rutunggom mar ongga oska jeni rudou os rot gij momas insa koma ojgomu. Beda rua rumot keingg kota Yerusalem ongga ebsi komowa gij tahun rara orgomu noba ofod. 3Beda Didif dimeita owesa efek gu dedin gosnok gegeka fogora goga gemefesij rot mar ongga Didif duncunc gu goga fob. Noba goga gemergi meisoufa ongga oska. Koma bera orocunc rot oida godou okumkum noba gebisa rot rusnok rerin mar ongga oska. Beda goga gemefesij rot mar insa koma gij mona rara 1,260. 4Gosnok gegeka insa koma bera erek mega zaitun efej egeka jera mowuj mosu egeka ongga lampu ont esij noba ongga gont jah Allah odou. Allah bera ongga ofoka ereij keingg mebif nomnaga. 5Noba erek rineya rutunggom mar ongga oska skoita goga, beda mah eisa omorogna jeska gawesi fogora et rua ongga rutunggom mar ongga oska skoita goga. Noba rusnok ongga runtunggom mar ongga oska skoita goga, beda rua rimagos erek insa koma tein si. 6Noba goga insa koma gegan owesa efek jeskaseda gof joug mebaga fogora mos enes gij mona ongga goga goftuftu rot Allah oga jinaga guru. Noba goga tein gegan owesa efek jeskaseda gotunggom mei fogora eja erek ogufu. Noba goga tein gegan owesa efek jeskaseda gesa mar ongga okum skoita rusnok fogora marenir. Goga gegan owesa efek ongga adaij nou gotunggom mar erek insa koma nomnaga rot ofosma ofoukou ojgomuja. 7Erek koma beda, gij mona ongga goga gemfesij rot Allah oga erek oisa fob, beda mar ofogog egens omorogna jeska moksu efesi ongga degini kemb. Beda mar koma omosoka keingg goga insa koma, beda emagob goga fogora gemagos. 8Beda gegan gefaga ongga agos fob bera emah joug moroju deis gij kota insa koma ongga ofoka aksa. Gegan Tuhan, Ofa tein bera agos tumu mega salib gij kota insa koma tein. Noba kota Sodom jera monuh Mesir bera erek orocunc rot kota egens insa koma tein. 9Noba gij mona orgomu ofod, beda rusnok jeska orofosutut ruga rusnok egens egens, jera orofosutut rusnok ebic egens egens, jera orofosutut monuh egens egens nomnaga rimeyajga toutou joug rot gegan gefaga ojgomu. Tina rineya rinesah gegan gefaga gij moksu guri. 10Erek koma beda rusnok rufoukou rudou emefaga ouka eteb rot jeska goga gagos fob. Beda rua rumoh mar ongga erek ongkoskamoka moguma ongga orocunc rot rudou ongga efaga oka eteb jeska goga insa koma ganggos fob. Rua rudou emefaga ouka erek koma jeska sis fob gosnok gegeka insa koma gofra mar okum keingg rua oisouska mar ongga goga goftuftu rot Allah oga. 11Tina gij mona orgomu ofod insa koma oisa fob, beda Allah emeita eiteij ah sons gu goga fogora goga gemedebecki beda gecira sons deika. Beda rusnok nomnaga ongga riajga toutou joug gegan gefaga insa koma bera rimek goga gecira sons deika fob. Jefeda rua rudou omoubsaha fogora rimeesa eteb rot tein. 12Beda rusnok insa koma rimeg oga egens ongga emen jeska mebaga ongga agot gu goga oida, "Goga gosok skoita Didif jah sif." Beda goga gomosok mocgoj ofog jah mebaga askesi rusnok insa koma riajga toutou joug goga." 13Beda ainsa koma tein mebi icusur eteb doska, noba mod ofoukou oknama gij kota insa koma emesma. Noba rusnok rufok ribu cinja erfeka rimagos tein. Beda rusnok enjgineg ongga rifena ebah ros bera rudou omoubsaha noba rimeesa eteb rot. Jefeda rua rumofra Allah efen ofoka erek aksa gu mebaga. 14Ebeibeyaif mar okum ongga ah keingg rusnok rot egeka bera oisa fob. Tina mar okum ongga orgomu deika emen gij mona kahma deika ros. 15Erek koma beda malaikat ongga cinja erfeka en manghi mei oga ongga cinja erfeka deika. Beda ainsa koma tein didif dig rusnok ruga ofoukou ongga ragerir eteb gij mebaga. Rua ragot mar erek kef oida, "Ebeibeyaif, owesa efek nou ofoka ereij keingg rusnok mebif nomnaga bera angh gu mifmin Tuhan Allah jera efen osnok egens koma ongga Ofa oncunc erek Kristus fob. Ofa oncunc Kristus koma jeskaseda osuwa rusnok nomnaga jeska rerin mar okum fob. Noba Ofa omofoka ereij keingg mar nomnaga rot mona ongga ah aibin ojgomuja." 16Beda ebirfager setka egeka noba tohkuru insa koma ongga ringker gij rerin kursi jah Allah odou bera risiri fogora rugif gu Allah. 17Beda rua risitit oida, "Memef mois oufamofa eteb gu Bua Tuhan rot bebin bufoka ongga aksa eteb. Bua bera ongga bunofoguma gij mona ongga sismeni fob. Bua bunofoguma gij mona ongga mar nomnaga omoisa rot tein. Jeska Bua bisma bebin owesa efek eteb fogora bumfoka ereij keingg rusnok nomnaga fob. 18Sis eteb fob bera mesa rudou otkonu oska fogora rita rudou ofogog eteb skoita Bua. Tina ebeibeyaif Bua buncunc budou ongga otkonu oska eteb rot rua. Ebeibeyaif Bua bebin eimofoj adaij fob nou buga ojga rot rusnok nomnaga rerin rita mar. Erek koma tein, ebeibeyaif bebin eimofoj adaij fob nou bimeita ofons ongga ongkoska eteb skoita bebin rusnok nomnaga ongga rugif gu bebin bufoka. Koma bera erek skoita rusnok ongga runok rufoka gij guru ni, jera rusnok ongga rufoka aksa tein ni, jera bebin nabi ongga rumfij Bua sis fob ni. Ebeibeyaif Bua bebin eimofoj adaij fob nou bufra okum eteb keingg rusnok ongga runghoda rusnok rerin riteij ah gu mebif tein." 19Erek koma beda, didif dik Allah efen mod montouj gu mebaga ohoda. Beda didif dik burwa ongga rua rinsah mamu efebr ongga Musa onggu keingg Allah efen hukum tumu sis fob gij burwa insa koma efesi. Noba burwa koma bera orocunc rot mar ongga Allah anggen eimofoj rot gu rusnok sis fob. Noba didif dik moc efesa eteb ni, dig moc ogugur eteb ni, mebif erek icusur doska ni, noba mos eteb ongga erek eis mamu ofoukou doska ens ni nomnaga.

will be added

X\