Wahyu 10

1Nou ongga mar insa koma oisa fob, beda didif dik malaikat egens ongga efen owesa efek ojuj jeska mebaga. Didif dik mocgoj ofog ah rejrej ofa, noba meinji tein ok tera ebirfaga. Efen osum bera eisa eteb erek mowa, noba efen aki bera erek mowuj mosu ongga mah eisa egigir eteb tumu. 2Ofa agei kertas efeyi ofokai ongga ohoda fob tumu etma. Ofa efen aki jah ognosk ot keingg mei mojumu efei, noba efen aki jah egris ot keingg jah mog tein. 3Beda ofa agerir mar rot oga ongga ahais doska erek singa efen oga. Nou ongga ofa agerir mar oisa fob, beda moc ogugur erek cinja erfeka ogugur erek eteb sons. 4Nou ongga moc ogugur cinja erfeka insa koma ruis mar, beda didif disejah nou dugu keingg mar ongga rumois insa koma. Tina didif dig oga egens ongga en jeska mebaga agot gu didif oida, "Bua bunogu keingg mar ongga moc ogugur cinja erfeka insa koma rumois rot guru. Tina bua bidemdemi mar insa koma ojgomu." 5Beda malaikat egens insa koma ongga ot gu mei mojumu efei jera mog bera ofra etma ognosk jah mebaga. 6- 7Beda ofa agen mar oisouska Ofa ongga engker rot mona ongga ah aibin ojgomuja ni, noba ongga ontunggom mebaga jera mar nomnaga ongga angh gu mebaga ni, noba ongga otunggom mebif jera mar nomnaga ongga angh gij mebif ni, noba ongga otunggom mei mojumu efei jera mar nomnaga ongga angh gij mei mojumu efei ni. Noba mar ongga ofa agen rot bera oida, "Erek doida mona ongga malaikat cinja erfeka emen manghi mei oga ongga cinja erfeka deika fob, beda Allah omotunggom mar ongga Ofa endemdemi jeska rusnok nomnaga sis fob si. Mar koma bera jeni erek Ofa oncunc gu efen nabi-nabi ongga rumfij Ofa sis fob. Jefeda mar koma bera enah dektek guru, tina emen rot ebeirens si." 8Beda oga egens insa koma ongga onjuj jeska mebaga bera agot gu didif deika oida, "Bua bija skoita malaikat egens ongga ont gij mei mojumu efei jera mog tein, beda bita kertas efeyi ongga ohoda fob tumu efen etma jeska ofa." 9Jefeda didif dija skoita malaikat egens insa koma, beda direjgei ofa rot kertas efeyi ongga ofokai insa koma. Beda ofa agot gu didif oida, "Bua bita kertas kef beda bit ojgomu. Askesi bua bit kertas efeyi koma gij bawesi beda eyejkita erek mosusu efei. Tina nou ongga enja gij butkonu fob, beda erek oska efeki ojgomu." 10Jefeda didif dita kertas efeyi ofokai insa koma jeska efen etma noba didif dit ojgomu. Noba nou ongga dint gij dawesi, beda eyejkita erek mosusu efei. Tina nou ongga enja gij dutkonu fob, beda erek oska efeki ojgomu. 11Beda oga egens insa koma agot gu didif oida, "Bua bagot rot mar ongga Allah oncunc gu bua osok gij rusnok enjgineg ni, oga enjgineg ni, jera raja-raja enjgineg ni juens deika ojgomu."

will be added

X\