Wahyu 1

1Sis fob bera Allah ocunc gu Yesus Kristus osok gij mar ongga omorogna keingg Ofa gij mona ongga enja ejgwaga ensaga fob. Ofa otunggom mar erek koma jeskaseda Yesus tein omocunc rot mar insa koma gu efen rusnok ongga rumfij Ofa. Beda rua tein rudou emebriyi gij mar insa koma ongga omorogna en si. Noba Yesus oncunc rot mar insa koma oisouska malaikat egens ongga Ofa obk skoita didif Yohanes ongga dumfij Ofa tein. 2Beda didif dugu keingg mar nomnaga ongga didif dik gu diteij noba dig gu dusuw tein gij surat egens kef. Koma bera, didif dugu keingg osok gij mar ongga Allah anggot rot jera mar ongga Yesus ontunggom nou rusnok sis fob. 3Jefeda oufamofa eteb bera ah gu rusnok ongga rik rot mar ongga Yesus oncunc gu didif fogora dunggu gij surat kef osok gij mar ongga omorogna gij mona kahma si. Noba oufamofa eteb ah gu rusnok ongga ringg rot mar insa koma fogora ruroru rot tenten ojgomuja. Jeska mona ongga mar insa koma omorogna keingg rusnok bera ensaga doida fob. 4Surat kef bera jeska didif Yohanes skoita iwa ongga iroru Yesus Kristus gij kota cinja erfeka ongga angh gij monuh Asia. Noba didif dum diteij gu Allah jeskaseda Ofa eita yeyin iteij ah ongga ongkoskamoka jera eskeiramera gu iwa ojgomuja. Ofa bera ongga enofogu gij mona ongga sismeni fob. Noba Ofa tein bera ongga enofogu ojgomuja ebeibeyaif tein. Noba Ofa tein bera ongga emen si. Noba mar ongga didif dunggu gij surat kef en jeska efena cinja erfeka ongga ringker rejrej kursi eteb ongga Allah engker gij jeskaseda ofoka ereij keingg mar nomnaga. 5Noba oga kef tein en jeska Yesus Kristus ongga emfesij rot mar ongga tenten ojgomu. Ofa bera ongga endebecki jeska agos rot sismeni erek osumbohka rot rusnok nomnaga ongga rimedebecki jeska ranggos si. Ofa tein bera ongga ofoka ereij keingg ebirfager mebif nomnaga. Ofa odou okora rot mimif. Noba oisouska efen ogufu ongga eya jeska efen efaga tumu mega salib bera Ofa onsuwa mimif jeska mifmin mar ongga oska fob. 6Ofa ontunggom mimif erek Allah efen rusnok ongga Ofa ofoka ereij keingg. Jefeda mimif minja erek efen imamir ongga rumfij Ofa efen meka Allah ojgomuja. Mimif mudou os jeskaseda Ofa esma ofoka ongga aksa eteb jera esma owesa efek ongga ekirsa jeska nomnaga rot ah aibin ojgomuja. Ainsoma. 7Iwa ik ojgomu, jeska Ofa emen orogna gij mocgoj ofog. Beda rusnok nomnaga rimek Ofa si. Noba rusnok ongga runduis Ofa efen efaga sis fob tein bera rimek Ofa gij mona insa koma si. Beda rusnok ebic nomnaga bera ruga rifeda risinsa rudou efesi rot gij mona ongga rimek Ofa. Mimif mudou os erek koma ojgomu. Ainsoma. 8Tuhan Allah agot oida, "Didif bera Alfa jera Omega. Didif direk ongga sismeni, noba erek ongga omoisa rot mar nomnaga tein. Didif bera ongga dingker gij mona ongga sismeni fob, noba Didif dineker ojgomuja ebeibeyaif tein, noba Didif dimen si. Noba Didif bera ongga dedin owesa efek ongga aksa ekirsa jeska nomnaga." 9Didif Yohanes bera erek yeyin ihuj egens ongga dita difera okora morototuma jera iwa, jeska mimif muroru Yesus Kristus rot tenten ojgomuja fob. Mimif nomnaga bera morototuma erek Allah efen rusnok. Noba oisouska Yesus Kristus efen owesa efek bera mimif muin keingg mudou efesi askesi mar okum ah keingg mimif ojgomuja. Sis fob rusnok ragei didif fogora rikris didif jah motowohu ongga ofoka Patmos. Rua rutunggom mar insa koma jeska didif difesij rot Allah efen oga jera rot mar ongga Yesus Kristus ontunggom nou rusnok sis fob. 10Gij mona ongga Ari eteb bera didif disma owesa efek jeska Efena Ebsi Allah fogora didif dig oga egens jah ejmeg ongga ogugur eteb erek rusnok ongga rin manghi mei. 11Erek koma beda, oga egens insa koma agot gu didif oida, "Mar ongga ai juens bua bimeg rot bera bugu keingg gij surat egens ojgomu. Beda bua bisa surat koma skoita rusnok ongga ruroru Yesus Kristus gij kota cinja erfeka ongga angh gij monuh Asia. Kota insa koma bera efen ofoka Efesus ni, Smirna ni, Pergamus ni, Tiatira ni, Sardis ni, Filadelfia ni, Laodikia ni." 12Erek koma beda didif dikikif jeskaseda dik rot oida idu bera enagot mar insa koma gu didif. Tina didif dik lampu emas cinja erfeka ongga angh esij mowuj mosu cinja erfeka. 13Noba didif dik mar erek osnok egens ongga ont gu lampu-lampu cinja erfeka insa koma efekesa. Noba Ofa ergi meifeti ongga aksa noba ojuj jah okoda. Noba Ofa era meifeti ongga erek emas erakid okom ofoj tein. 14Ofa efen ebirfaga efeji bera erek ebsi komowa, noba efen eiteij bera eisa egigir eteb erek mah eisa. 15Noba Ofa efen okoda bera eirirbi eteb doska erek kermom ongga rukub gij mah fogora efeskrenmeni. Noba efen oga bera ogugur eteb erek mei ongga onsoka gij ofoska. 16Noba Ofa agei motur cinja erfeka tumu etma jah ognosk. Noba meiteb kalawan ongga efeya jah enama tein enama tein bera orogna jeska awesi. Noba efen osum efesa eteb doska noba eisa egigir erek mowa. 17Nou ongga didif dik rot mar insa koma nomnaga fob, beda didif disiri gu Ofa odou ojgomu, erek osnok egens ongga agos fogora esiri jah gu mebi ojgomu. Beda Ofa aha efen etma ognosk esij didif noba agot oida, "Bua binemeesa rot guru. Jeska Didif bera ongga erek sismeni noba erek ongga omoisa rot mar nomnaga tein. 18Didif bera ongga dita eiteij ah ongga efeinah gu rusnok. Jeska sis fob Didif danggos. Tina Didif difena ebah sons fob. Jefeda Didif difena ebah rot mona ongga ah aibin ojgomuja. Didif bera dedin owesa efek nou danggot rot idu ongga rija gu mahmei meren jera idu ongga risma eiteij ah ongga efeinah. Noba Didif bera dufoka ereij keingg monuh ongga mar agos ringker gij tein. 19Erek koma jefeda bua bugu keingg mar ongga bua bingk ainsa kef jera mar ongga Didif dumocunc gu bua rot mar ongga emen gij mona kahma tein ojgomu. 20Noba ebeibeyaif Didif dimagot rot motur cinja erfeka insa koma ongga bua bik tumu ditma, jera lampu emas cinja erfeka insa koma efen ofou tein. Jeska mar koma efen ofou ongga ah jejema jeska rusnok ros. Motur insa koma bera erek orocunc rot malaikat-malaikat cinja erfeka ongga Allah ombk jeskaseda ot joug Mod Ari ebic cinja erfeka insa koma. Noba lampu emas cinja erfeka insa koma bera orocunc rot Mod Ari ebic cinja erfeka insa koma."

will be added

X\