Filipi 2

1Iwa yut joug idou efesi rot ahais ojgomu jeska yeyin idou bera eja erek egens jera Yesus Kristus fob. Noba idou efesi tein eskeiramera jeska Yesus Kristus efen odou ongga okora rot iwa. Noba iwa idou erek egens jeska Efena Ebsi Allah tein ongga engker gij idou efesi fob. Jefeda iwa icunc idou ongga oufamofa fogora ita idou ongga omokorema ojgomuja. 2Erek koma tein, didif duis gu iwa jeskaseda mar ongga iwa isujohu rot bera erek egens ni, idou omokorema ni, idou efesi oitij rot mar ongga iwa intunggom erek egens morototuma ni ojgomuja. Mar koma bera ereita dudou efesi erek eskeiramera eteb rot iwa. 3Noba iwa ineita mar egema tein rot idou ongga eftirir keingg mar guru, era rot idou ongga yufra isinsa ifoka erek aksa gij tein guru. Tina yuin keingg isinsa idou efesi noba yufra rusnok enjgineg rufoka erek ekirsa jeska iwa ojgomu. 4Noba idou enefeneinei rot isinsa yeyin iteij ah ojgomu guru, tina idou efeneinei rot rusnok enjgineg rerin riteij ah tein ojgomuja. 5Iwa isujohu rot mar morototuma erek Yesus Kristus osujohu rot mar erek kef oida, 6Gij mona ongga Ofa enen gu mebif enesi, bera Ofa tein morototuma erek Allah ojgomu. Erek koma tina, Ofa odou enefeneinei rot efen ofoka ongga aksa morototuma erek Allah ojgomuja guru. 7Tina Ofa aha esinsa ofoka ongga aksa insa koma jah, fogora oin keingg esinsa erek osnok egens ongga omfij rusnok enjgineg ojgomu. Koma bera, Ofa eja erek rusnok giskini ojgomu. 8Noba gij mona ongga Ofa eja erek rusnok giskini fob, beda Ofa oin keingg esinsa ofoka ekirsa deika fogora ougif gu Allah beda Ofa agos. Koma bera, rusnok rifena oskereta Ofa, beda Ofa agos tumu mega salib rot tein. 9Erek koma jefeda Allah omfra Ofa efen ofoka erek aksa ekirsa jeska mar nomnaga. Noba Allah eita owesa efek ongga ekirsa jeska mar nomnaga gu Ofa. 10Allah otunggom mar insa koma jeskaseda rusnok jera mar nomnaga ongga angh gu mebif ni, mebaga ni, jera mar ongga engker gij mebi efesi owohoh ni bera rugif gu Ofa ojgomu. 11Beda orofosutut rusnok egens egens nomnaga rumofra Yesus Kristus efen ofoka aksa fogora ragot oida Ofa bera Tuhan ongga ofoka ereij keingg mar nomnaga. Noba mar ongga rua rumotunggom insa koma bera erek rurofra Allah efen ofoka erek aksa tein. 12Erek koma jefeda, edohuji ongga dudou okora rot, iwa tein yugif gu Allah erek Yesus Kristus ougif gu Ofa sis fob. Noba iwa ita mar erek iwa intunggom sis fob ojgomuja fogora iroru mar ongga oufamofa erek rusnok ongga Allah onsuwa jeska rerin mar ongga oska fob. Iwa intunggom mar erek koma sis mona ongga didif dingker morototuma jera iwa ros. Tina ebeibeyaif bera didif duis gu iwa jeskaseda iwa ita mar erek insa koma rot ekirsa deika gij mona ongga dingker jera iwa deika tein guru. Iwa ita mar erek koma rot idou ongga emesmeesa rot jera idou ongga ougif gu Allah askesi iwa iroru efen oga ojgomuja. 13Jeska Allah bera ongga eita owesa efek gu iwa jeskaseda mar ongga iwa itunggom bera emah jeni erek Allah ondou os rot ojgomu fogora iwa imecira gij mar insa koma ojgomuja. 14Iwa ita mar nomnaga moguma rot yuga ongga enerahah rot guru era rot yuga ongga onomosokuma rot tein guru. 15Tina iwa ita mar ongga oufamofa ojgomu jeskaseda enadaij nou rusnok enjgineg rucunc iwa erek rusnok ongga rita mar ongga oska jinaga guru. Noba iwa ita mar erek insa koma ojgomu jeskaseda iwa ijerek Allah efen efeser ongga rudou ebsi komowa noba ongga efen mar ongga oska oskiyai tein guru. Yeyin idou efesi erek ebsi komowa askesi iwa iker gu rusnok ongga rita mar ongga oska ofoukou gu iwa rifekesa ros. Beda yeyin iteij ah bera erek eisa nou rusnok insa koma ongga ringker gij motkobah ros. 16Iwa bera erek eisa nou rusnok insa koma jeska iwa imfesij rot Allah oga ongga eita eiteij ah ongga ah aibin gu rusnok fob. Noba erek iwa ita mar insa koma nomnaga, beda didif dudou emefaga ouka eteb rot iwa gij mona ongga Yesus Kristus ongksons en fob. Jeska koma bera orocunc rot oida mar ongga didif dimfarur rot jah gu iwa ifekesa bera erek omfij iwa rot tenten fob. 17Didif duftuftu iwa jera rusnok enjgineg rot Allah efen oga fogora iwa iroru Ofa fob. Erek koma tina erek raja Kaisar efen tentarer ongga ragob didif jah sif rot ojgomu, beda dedin dugufu ongga otkinaja bera erek orocunc rot anggur efei ongga imam Yahudi egens eres gij mar ongga ofa orougif gu Allah rot omoisa rot. Noba yeyin iteij ah ongga yangha gu Allah fob bera erek mar insa koma ongga imam era fogora orougif gu Allah. Jefeda didif duis oufamofa eteb rot noba dudou efaga ouka morototuma jera iwa rot mar insa koma ojgomu. 18Erek koma jefeda iwa tein ita idou ongga efaga ouka rot ojgomu morototuma jera didif ojgomuja. 19Erek Tuhan Yesus ondou os rot beda ai juens bera didif dumobk Timotius skoita iwa jeskaseda gij mona ongga didif dingg mar jeska ofa, beda dudou emefaga ouka rot iwa ojgomu tein. 20Didif dumobk ofa jeska dedin rusnok egema ongga rudou okora rot iwa morototuma erek didif ongga riker jah sif guru. Ofa odou efeneinei eteb rot iwa tein. 21Tina rusnok jah sif bera rudou efeneinei rot risinsa rerin riteij ah ojgomu. Noba rua rudou enefeneinei rot mar ongga Yesus Kristus odou efeneinei rot guru. 22Tina iwa isinsa ik rot oida mar ongga Timotius emfarur rot fob bera erek tenten ojgomu. Jeska ofa bera ofij didif gij mona ongga didif dimfesij mar osok gij Allah oga rot iskusk fob, erek oforoka egens ongga ofij efen meka rot iskusk ojgomu. 23Jefeda didif dumobk ofa skoita iwa gij mona ongga rusnok ruga ojga rot didif jah sif fob. 24Noba didif dijginaga rot fob oida Allah omofij didif jeskaseda dektek deika guru, beda didif dumojogog iwa deika si. 25Noba didif dusujohu rot oida dumobk mifmin muhuj Epafroditus sons skoita iwa tein. Sis fob iwa yumbk ofa skoita didif jeskaseda ofij didif jah sif. Noba ebeibeyaif ofa bera erek dedin edohuj egens tein ongga ofij didif rot ahais erek maroska efer egens ongga ofij efen ebirfaga rot ahais ojgomu. 26Didif dumobk ofa sons skoita iwa jeska ofa odou os ejek iwa ebeirens. Ofa tein odou efeneinei rot iwa jeska iwa ingg rot oida ofa maren eteb fob. 27Sis fob ofa maren eteb noba doida nou ongga anggos rot fob. Tina Allah ocunc efen odou ongga oufamofa skoita ofa jefeda ofa enagos guru. Koma tein bera erek Allah ocunc efen odou ongga oufamofa skoita didif tein jeskaseda mar ongga okum ekirsa enah keingg didif deika guru. 28Erek koma jefeda didif dinsejah gij dudou efesi rot oida didif dumobk ofa sons skoita iwa jeskaseda iwa tein idou erirei eteb rot ofa. Beda didif tein dudou emefaga ouka eteb tein jeska iwa idou erirei rot erek koma. 29Noba gij mona ongga ofa ensaga jah suma fob, beda iwa iroun ofa rot idou ongga eskeiramera eteb ojgomu. Noba iwa yugif gu ofa jera rusnok enjgineg tein ongga rita mar erek ofa ojgomu. 30Jeska ofa aha efen eiteij ah nou rusnok enjgineg jeskaseda ofij Yesus Kristus ojgomuja. Noba doida nou ongga ofa anggos rot mar insa koma askesi ofa ofij didif. Noba ofa ontunggom mar insa koma oisouska iwa ongga yubk ofa skoita didif sis fob.

will be added

X\