Matius 27

1Gij raha tentena beda ebirfager imam-imam jera ebirfager Yahudi ongga rineya bera rifesij mar osok gij rot teinefa rua rimagob Yesus. 2Rua rira rantai rirakid Yesus etma, beda ruroun Ofa skoita Pilatus. Ofa bera erek raja Kaisar efen Gubernur gij monuh insa koma. 3Nou ongga Yudas, ongga engkikif jeska Yesus fob, eg rot oida ebirfager imam-imam ruga ojga rot oida Yesus agos ojgomu, beda ofa odou okum eteb rot mar ongga ofa ontunggom skoita Yesus fob. Jefeda ofa orka fifi perak setka orgomu ongga ofa esma jeska ebirfager imam-imam sis fob. 4Beda ofa agot gu rua oida, "Didif dingkikif jeska Yesus noba dumfij iwa fob. Jefeda mar ongga didif duntunggom koma bera erek oska eteb. Jeska Ofa eneita mar egema tein ongga erek oska fogora yagob Ofa rot guru." Beda rua ragot gu ofa oida, "Skoidu, koma onofoufem skoita memef guru. Bua bera ongga buntunggom mar insa koma ojgomu." 5Jefeda Yudas eij fifi insa koma gu Mod Allah efesi, beda ofa eja noba era marfeb erakid ogoj beda ef esinsa tumu mega efetma fogora agos. 6Beda ebirfager imam-imam ruhoturu fifi ongga Yudas eij jeska insa koma. Noba rua ragot oida, "Fifi kef bera memef moh fogora osnok egens agos rot. Noba mimif agama erebent agot oida fifi ongga erek koma bera minesah gij Mod Allah guru." 7Jefeda rua ruitij rot oida rimera fifi insa koma rimerengk mebi jeska osnok egens ongga otunggom debeji. Beda rua rucunc mebi koma erek rusnok ongga rusodosa rerin rudog ojgomu. 8Erek koma jefeda onjoros deisef tein bera rusnok rijeka mebi koma oida, Mebi ogufu. 9Erek koma beda mar ongga nabi Yeremia anggot sis eteb fob rot mar insa koma bera ah gij efera fob. Ofa agot oida, "Rua ongga Israel ruitij rot ruh fifi perak setka orgomu jeskaseda ragob Ofa. 10Beda rua rira fifi insa koma rirengk mebi jeska osnok egens ongga otunggom debeji. Koma bera ongga Tuhan danggot rot gu Didif fob." 11Beda rua ruroun Yesus skoita Gubernur Pilatus, noba Ofa ot jah Pilatus odou. Beda Pilatus ejeka gu Ofa oida, "Bua bera rusnok Yahudi rerin raja ei?" Beda Yesus oroun oida, "Mar ongga bua banggot bera tenten." 12Tina Yesus onoroun mar osok gij mar ongga ebirfager imam-imam jera ebirfager Yahudi rineya ranggot rot osok gij Ofa guru. 13Jefeda Pilatus agot gu Ofa oida, "Iwa ingg rot mar ongga oska ongga rusnok insa koma ranggot osok gij Bua fob. Teinefa fogora Bua bunoroun mar sons rot guri." 14Tina Yesus onoroun mar sons rot mar ongga rua ranggot insa koma jinaga guru. Jefeda Gubernur insa koma odou oubsaha eteb rot. 15Gij orofosut mona ongga rusnok Yahudi ruina maat nou mona eteb ongga ofoka Paskah bera Gubernur osuwa osnok egens ongga rusnok Yahudi rirejgei gu ofa rot jeska mod oskusk. 16Gij mona insa koma bera tentarer rangha osnok egens ongga ofoka Barsabas gij mod oskusk fob. 17Jefeda nou ongga rusnok Yahudi rufoukou rumohoturuma gu Pilatus efen mod, beda ofa ejeka gu rua oida, "Iwa idou os jeskaseda didif dusuwa idu nou iwa? Didif dusuwa Barsabas ei, era didif dusuwa Yesus ongga rinjeka Kristus ei?" 18Ofa agot mar erek insa koma jeska ofa ejginaga rot oida ebirfager Yahudi raha Yesus gu ofa jeska rudou ejisei rot Yesus ojgomu. 19Askesi Pilatus engker gij efen kursi gij mona insa koma jeskaseda oga ojga rot mar ongga rusnok runcunc rot Yesus ros, beda osnok egens orka surat egens jeska efen mohona. Mohona koma onggu gij efen surat gu Pilatus oida, "Bua bineita mar ongga oska egema tein skoita osnok egens koma guru. Jeska Ofa eneita mar ongga oska egema tein guru. Gij motu neeka fob bera didif disih mar okum ofoukou osok gij Ofa ojgomu." 20Beda ebirfager imam-imam jera ebirfager Yahudi rineya rusos rusnok rufoukou jah suma jeskaseda ruis gu Pilatus oida rudou os Barsabas ojgomu, noba ragob Yesus ojgomu. 21Tina Pilatus agot gu rusnok rufoukou jah suma oida, "Iwa idou os jeskaseda didif dusuwa kenefo jeska goga kefo?" Rua ruroun oida, "Busuwa Barsabas ojgomu!" 22Beda Pilatus agot oida, "Tina didif dita mar meidu rot Yesus kef ongga iwa ijeka erek Kristus?" Beda rua ruroun oida, "Butob Ofa tumu mega salib ojgomu!" 23Tina Pilatus ejeka gu rua oida, "Tina Ofa otunggom mar ongga oska erek meidu?" Beda rusnok jah suma ruis rot ruga eteb doska oida, "Butob Ofa tumu mega salib ojgomu!" 24Pilatus ek rot oida rusnok insa koma rukoja Yesus ojgomu, noba erek ai juens beda rusnok rumotkonu oska eteb skoita ofa rot. Jefeda ofa eita mei beda ot efen etma gij mei koma jah rusnok koma rudou jeskaseda rik. Beda ofa agot gu rusnok insa koma oida, "Erek osnok egens kef agos ojgomu, beda koma enah gu didif guru. Mar koma bera ongga iwa idou os rot ojgomu." 25Beda rusnok rufoukou jah suma ruis rot ruga eteb oida, "Maraim, erek Ofa agos ojgomu, beda koma ah gu memef ojgomu, noba koma ah gu memef meser tein ojgomu!" 26Erek koma beda Pilatus osuwa Barsabas nou rua. Noba ofa obk efen tentarer jeskaseda rangha Yesus. Beda ofa aha Yesus skoita tentarer enjgineg jeskaseda rutob Ofa tumu mega salib. 27Erek koma beda Pilatus efen tentarer ruroun Yesus gij Gubernur efen mod efesi. Beda tentarer rufoukou jah suma rut rejrej Ofa. 28Rua rusuwa Ofa efen meisoufa giskini, beda rua raha meifeti ongga erek raja ergi tumu Ofa. 29Noba rua rira marfeb egens ongga efen ofogog doska fogora rirajgej ebirfaga erek rirahaisomu rot Ofa. Beda rua rita moskur egens gu Ofa jeskaseda agei erek raja agei moskur egens. Beda rua ris rukeibi gu mebif beda ougif gu Ofa erek rusnok rugif gu raja egens fogora rirahaisomu rot Ofa erek koma. Rua ragot mar erek kef oida, "Bua ongga Yahudi rerin raja, memef modou os jeskaseda Bua bifena ebah nou mona ongga dektek ojgomu!" 30Beda rua ruj oskurfi gij Ofa noba ragei moskur sons jeska Ofa beda rubu Ofa ebirfaga tein. 31Nou ongga rua rirahaisomu rot Ofa erek insa koma oisa fob, beda rua rita raja efen meisoufa insa koma jeska Ofa noba rita Ofa efen meisoufa sons gu Ofa. Beda rua ruroun Ofa jah mebah jeskaseda rutob Ofa tumu mega salib. 32Askesi rua ruroun Yesus jeskaseda rutob Ofa tumu mega salib, beda rua rurodosu osnok egens ongga ofoka Simon gu moroju osobu deismos. Ofa bera ojga jeska kota Kirene. Tentarer insa koma riradgodu ofa jeskaseda orka mega salib ongga ai juens runtob Yesus tumu. 33Tentarer insa koma ruroun Yesus jah monuh egens ongga ofoka Golgota. Koma efen ofou oida, Monuh Ebirfaga Oboha. 34Beda rua rurka anggur efei ongga rugun ariawun ongga ofoka mur gij fogora rita gu Ofa, tina nou ongga Yesus ereni oskiyai beda Ofa okoja anggur koma ojgomu. 35Beda rua rutob Ofa tumu mega salib. Nou ongga koma oisa fob beda rua ruku mofka jeskaseda orocunc rot idu jeska rua bera emesma Yesus efen meisoufa. 36Beda rua riker jah suma noba riajga Ofa. 37Rua runggu mar tumu papan egens ongga agot rot efen mar ongga oska. Rua runggu rot oida, "OFA KEF BERA RUSNOK ONGGA YAHUDI RERIN RAJA." 38Beda rua rutob gosnok gegeka deika ongga goukoreka mar sis fob desi Ofa. Rua runtob egens gu Yesus ognosk, noba gegema gu Yesus egris. 39Rusnok ongga rirabj monuh insa koma rik Yesus noba ruga oruh Ofa ojgomu. 40Rua ragot oida, "Hah! Bua bagot oida bumohoda Mod Allah nomnaga beda bimei Mod koma sons gij mona orgomu ojgomu. Erek Bua bera Allah efen efesa rot tenten beda busuwa bisinsa jeska mega salib koma ojgomu! Bujuj jeska mega koma ojgomu!" 41Beda ebirfager imam-imam jera Guru-Guru agama jera ebirfager Yahudi rineya nomnaga ruga oruh Yesus erek koma tein. 42Rua ragot oida, "Ofa ofij rusnok enjgineg jeskaseda rerin mar okum enah gu rua deika guru, tina enadaij nou Ofa onsuwa esinsa jeska mar kef guri! Ofa bera ongga rusnok Israel rerin raja ei. Erek Ofa ojuj jeska mega salib kef beda memef modou omororu Ofa si! 43Ofa oisum gij Allah, noba Ofa agot oida Ofa bera Allah efen efesa tein. Jefeda teinefa fogora Allah onoskotu Ofa jeska mar okum kefi guri." 44Noba gosnok gegeka insa koma ongga runtob tumu mega salib desi Yesus bera goga oruh Ofa tein. 45Erek mowa ot deis beda monuh insa koma nomnaga eja erek motkobah. Noba ah erek koma onjoros aras orgomu fob. 46Beda gij aras insa koma Yesus ois rot oga eteb oida, "Eloi, Eloi, lama sabakhtani." Koma efen ofou oida, "Akeina Allah, teinefo fogora Bua baha Didif igef jah erek kefo?" 47Erek koma beda rusnok ongga runt doida Yesus rig Ofa agot mar erek insa koma. Jefeda rua ragot oida, "Ofa ois mar gu nabi Elia!" 48Beda orna egens eja ebeirens jeskaseda ejeita anggur efei ongga ekemba. Ofa ec moskur gij anggur efei insa koma noba osk moskur insa koma rot gu Yesus awesi jeskaseda Ofa omna oskiyai. 49Beda osnok egens ongga enjgineg agot oida, "Mimif miker ai juens jeskaseda mik oida nabi Elia emen noba omosuwa Ofa jeska mega salib ei era gurei." 50Erek koma beda Yesus ois mar rot oga eteb fob, beda agos. 51Ainsa koma tein meifeti aksa ongga rusnok rimf joug montoj rot rusnok jeskaseda runoira gij Mod Allah efesi guru bera ebga jeska skida onjoros degini fob. Beda mebi icusur doska noba mamu eteb ofoukou ebriyi. 52Beda rusnok rudog ohoda noba Allah efen rusnok rineya rufoukou ongga ranggos sis fob bera rifena ebah sons. 53Beda gij mona ongga Yesus endebecki jeska agos fob, rusnok ongga rifena ebah sons insa koma tein ricira gij kota Yerusalem. Noba rusnok rufoukou ringk rua jah suma tein. 54Ebirfaga tentarer egens jera efen ruforoker ongga runt joug Yesus tumu mega salib jera ofa bera rik mebi icusur jera mar enjgineg tein ongga omorogna keingg rusnok gij mona insa koma. Jefeda rua rimeesa eteb rot beda ragot oida, "Tenten Ofa bera Allah efen efesa ojgomu!" 55Noba rujager rufoukou rut ai yes noba riajga mar insa koma tein. Rua bera ongga ruroru Yesus jeska monuh Galilea. Noba rua rumfij Yesus gij mona insa koma tein. 56Rineya jeska rua bera erek Maria jeska Magdalena ni, Maria ongga Yakobus jera Yusuf gegan mosu ni, jera Zebedeus efen mohona ni. 57Nou ongga motu fob, beda orna mei ahta egens jeska kota Arimatea ensaga jah suma. Ofa ofoka Yusuf, noba ofa tein ororu Yesus sis fob. 58Ofa eja skoita Pilatus jeskaseda erejgei ofa rot Yesus efaga. Beda Pilatus obk efen tentarer jeskaseda rita efen efaga koma gu Yusuf. 59Jefeda Yusuf orka efaga koma jeska fob. Beda ofa era meifeti ongga efeinah orond Yesus efaga insa koma. 60Beda ofa esah Yesus efaga koma gij moksu egens ongga ofa otunggom gij mamu efesi fob. Beda ofa eskiski mamu eteb joug mamu efesi insa koma rot ahais. Beda ofa eja jeska. 61Noba Maria jeska Magdalena jera Maria ongga enjgineg insa koma tein geyajga mar insa koma. 62Gij mona juens deika, ongga erek mona ongga Sabat, beda ebirfager imam-imam jera rusnok ebic Farisi rija skoita Pilatus. 63Beda rua ragot gu ofa oida, "Tuan, bua budou ah keingg rot mar ongga Ofa ongga ocuwei mar anggot sis fob, gij mona ongga Ofa enagos enesei? Jeska Ofa anggot oida, 'Gij mona orgomu deika beda Didif dimedebecki jeska danggos si.' 64Jefeda bua bubk bebin tentarer jeskaseda ot joug Ofa efen moksu gij mona orgomu ojgomu. Bita mar erek koma jeskaseda Ofa efen ruforoker rinen noba runorka efen efaga jeska guru. Erek bua bunotunggom mar koma guru, beda rua rimagot gu rusnok rufoukou oida Ofa endebecki jeska agos fob. Beda rucuwei mar koma bera erek oska ekirsa jeska mar ongga Ofa ocuwei mar rot sis fob ojgomu." 65Jefeda Pilatus agot gu rua oida, "Iwa ita mar koma ojgomu. Jefeda iwa iroun dedin tentarer jah suma beda yuf joug moksu koma rot ahais ojgomu." 66Jefeda rua rija jah mansu mamu ongga Yesus efaga angh gij. Beda rua raha mar tumu mamu eteb ongga of joug moksu awesi insa koma. Beda mar koma orocunc oida rusnok enjgineg riskiski mamu insa koma jeska fob era gurei. Beda tentarer rut joug mansu insa koma rot ahais ojgomuja tein.

will be added

X\