Matius 26

1Nou ongga Yesus oftuftu rot mar insa koma nomnaga oisa fob, beda Ofa agot gu efen ruforoker oida, 2"Gij mona egeka deika, beda mona eteb ongga ofoka Paskah jera mona ongga rusnok rit roti ongga enefifij guru bera emesaga. Noba gij mona insa koma rusnok rimagei Didif, Rusnok Efesa, beda raha Didif gu rusnok enjgineg. Beda rua rumotob Didif tumu mega salib." 3Erek koma beda ebirfager imam-imam jera rusnok Yahudi rerin ebirfager enjgineg tein rumorodosuma gij mod eteb ongga Kayafas efen. Ofa bera erek imam ongga ofoka aksa gij mona insa koma. 4Beda rua ruhca moroju jeskaseda ragei Yesus erek wuswus beda ragob Ofa. 5Rua ragot moguma oida, "Mimif mineita mar insa koma gij mona ongga Paskah guru, jeska rusnok rufoukou rumotkonu oska eteb rot mimif fogora rimagot mar ofoukou rot." 6Erek koma beda, askesi Yesus engker gu kota Betania ros, beda Ofa eja jah mod egens ongga osnok egens ongga ofoka Simon efen. Sis fob Simon maira et ofos. 7Askesi Yesus et maat gij mod insa koma ros, beda ojaga egens en skoita Ofa. Ofa orka fanin egens ongga ebera rot miniyi ongga efen ensesa. Miniyi koma bera efen efera osok eteb. Ofa ohoda fanin insa koma beda otkinaja miniyi koma nomnaga tumu Yesus ebirfaga. 8Tina Yesus efen ruforoker rik mar koma ongga ofa ontunggom, jefeda rua ragot rot rusum oskusk moguma oida, "Teinefa fogora ofa otkinaja miniyi rourou erek komo. 9Jeska miniyi insa koma bera efen efera osok eteb. Ongga oufa bera ofa ohu miniyi insa koma beda ekeba fifi ongga esma rot skoita rusnok ongga rufojingki ojgomu!" 10Yesus ejginaga rot mar ongga rua ranggot moguma insa koma fob. Jefeda Ofa agot gu rua oida, "Teinefa fogora iwa inagot mar gu ofa erek komo. Mar ongga ofa ontunggom insa koma gu Didif bera erek ongkoska eteb. 11Rusnok ongga rufojingki bera riker ojgomuja. Tina Didif dineker morototuma jera iwa ojgomuja guru. 12Mar ongga ofa ontunggom insa koma bera jeskaseda esejah difaga nou mona ongga danggos fogora rusnok rimesah difaga gij moksu. 13Ongga tenten bera, gij mona ongga rusnok rifesij osok gij Allah oga ongga oufamofa rejrej mebif, beda rua rimefesij rot mar ongga ojaga egens kef ontunggom nou Didif tein. Jefeda rusnok rufoukou rimejginaga rot ofa tein si." 14Erek koma beda Yesus efen oforoka egens ongga ofoka Yudas Iskariot eja skoita ebirfager imam-imam. 15Beda ofa agot gu rua oida, "Iwa ita fifi gu didif, beda didif dimekikif jeska Yesus noba dumofij iwa yagei Ofa si." Jefeda rua rita fifi perak setka orgomu gu ofa rot. 16Beda oisouska mona insa koma bera Yudas ohca moroju egens jeskaseda aha Yesus gu rua. 17Mona eteb ongga rusnok Yahudi rit roti ongga enefifij guru bera ensaga fob. Jefeda Yesus efen ruforoker ragot gu Ofa oida, "Memef meja sinefa jeskaseda mesejah maat koma ongga mimif mint morototuma nou mona ongga Paskah?" 18Beda Yesus agot gu rua oida, "Iwa ija skoita osnok egens gij kota, beda yagot gu ofa oida, 'Mefmen Guru agot oida, dedin mona ongga eimofoj bera ensaga fob, jefeda Didif jera dedin ruforoker bera met maat nou mona ongga Paskah gij bua bebin mod efesi.' " 19Jefeda Yesus efen ruforoker runtunggom mar jeni erek Ofa anggot rot fob, beda mar insa koma nomnaga ensejah nou rua fob. 20Erek motu fob, beda Yesus eker jera efen ruforoker rufok setka kungkob erfeka jeskaseda rit maat morototuma. 21Askesi rua rint maat ros, beda Yesus agot gu rua oida, "Ongga tenten bera, osnok egens jeska iwa emekikif jeska Didif si." 22Mar ongga Yesus anggot insa koma ereita efen ruforoker rudou efesi okumkum rot. Jefeda rua egens egens ragot oida, "Tuhan, didif dineita mar erek koma jinaga guru." 23Beda Yesus oroun oida, "Osnok egens ongga ec roti gij mokosku kef jera Didif bera ongga emekikif jeska Didif si. 24Didif, Rusnok Efesa, bera dimagos jeni erek runggu rot gij Mar Efeyi Ebsi sis fob. Tina okum eteb rot osnok egens koma ongga ekikif jeska Didif, Rusnok Efesa. Ongga tenten bera, oufa ekirsa erek ofa efen mosu onojuj rot ofa sis fob guru. Jeska ebeibeyaif ofa emesma mar okum eteb rot mar ongga ofa ontunggom koma si." 25Beda Yudas, ongga ai juens emekikif jeska Yesus, agot oida, "Guru, Bua busujohu rot oida didif bera ongga emekikif jeska Bua ei?" Beda Yesus oroun oida, "Mar ongga bua banggot rot bera erek tenten ojgomu." 26Askesi rua rint maat ros, beda Yesus eita roti ofog egens noba oisa oufamofa eteb gu Allah rot. Beda Ofa etka roti insa koma noba ekeba dogdog gu efen ruforoker. Beda Ofa agot gu rua oida, "Iwa ita roti kef beda it. Jeska roti kef bera erek dedin difaga ongga dimaha gu rusnok ongga rufogog jeskaseda iwa imesma eiteij ah ongga efeinah." 27Beda Ofa eita mokosku rot anggur efei noba ois oufamofa eteb gu Allah rot. Beda Ofa eita mokosku egens koma gu rua jeskaseda orofosutut rusnok egens egens rij anggur efei morototuma jera Ofa. Beda Ofa agot oida, "Iwa nomnaga ij anggur efei kef ojgomu. 28Jeska anggur efei kef bera erek dedin dugufu ongga emeya nou rusnok rufoukou. Noba koma orocunc rot mona efeinah ongga Allah anggen eimofoj rot sis fob jeskaseda Ofa omosuna rot rusnok rufoukou rerin mar ongga oska. 29Ongga tenten bera, Didif dinej anggur efei morototuma jera iwa deika guru onjoros mona ongga Allah ofoka ereij keingg rusnok ensaga fob. Beda gij mona insa koma bera dimej anggur efei ongga erek efeinah morototuma jera iwa deika si." 30Nou ongga rua ruf medemer morototuma oisa fob, beda rua rija jah memaga ofos Zaitun. 31Erek koma beda Yesus agot gu efen ruforoker oida, "Gij motu kef bera iwa nomnaga imoku jeska Didif si. Noba koma ororu jeni erek runggu gij Mar Efeyi Ebsi sis fob. Mar egens koma agot oida, 'Allah emagob Ofa ongga ont joug domba-domba, beda domba-domba riberbera suma suma.' 32Tina gij mona ongga Didif dindebecki jeska danggos fob, beda Didif dimeja okag iwa jah monuh Galilea." 33Beda Petrus agot gu Yesus oida, "Erek rua insa kef nomnaga ruku jeska Bua, tina didif dineita mar erek koma jinaga guru." 34Beda Yesus agot gu Petrus oida, "Ongga tenten bera, nou ongga mongkukar orna onoga nou motu insa kef rot ofosma egeka enesi, beda bua bisinsa bumorot keingging gu rusnok rot ofosma orgomu rot oida bua binejginaga rot Didif guru." 35Beda Petrus agot oida, "Erek rusnok ragob didif morototuma jera Bua, beda didif dunorot keingging oida dinejginaga rot Bua erek koma guru." Noba ruforoker ongga enjgineg nomnaga ragot mar erek koma tein. 36Erek koma beda, Yesus jera efen ruforoker rija jah mekeni egens ongga ofoka Getsemani. Beda Ofa agot gu rua oida, "Askesi Didif dum diteij gu Allah ros beda iwa iker jah sif." 37Beda Ofa oroun Petrus, Yakobus jera Yohanes ongga Zebedeus efen efeserga morototuma jera Ofa. Gij mona insa koma bera Ofa odou efeneinei noba odou okum eteb tein rot mar ongga emeita efera okora eteb gu Ofa. 38Beda Ofa agot gu ruforoka rugomu insa koma oida, "Dudou okum eteb doska onjoros erek dimagos rot ojgomu. Jefeda iwa iker jera Didif jah sif noba inohohnoha jeska Didif guru." 39Ofa ecira oskiyai deika beda odou orohu mebi. Beda Ofa om eiteij gu Allah oida, "Akeina, bita mar okum ongga dimeita difera okora rot jeska Didif ojgomu. Tina bunotunggom mar ongga Didif disinsa dudou os rot guru. Butunggom mar jeni erek budou ejginaga rot ojgomu." 40Beda Yesus oksons skoita efen ruforoker rugomu insa koma, tina rua rahca ahaingkongka fob. Beda Ofa agot gu Petrus oida, "Simon, bua binahca erek koma guru. Erek bineker jera Didif rot ai juens ojgomu tein gurei. 41Bua binahca guru, tina bum biteij gu Allah ojgomu jeskaseda bua binesiri gu mar ongga ereneni bua guru. Erek bua budou os bita mar ongga Didif danggot ainsa kef, tina bebin owesa efek bera enadaij rot guru." 42Beda Yesus ejeker gu esinsa noba om eiteij gu Allah juens deika oida, "Akeina, erek enadaij nou Bua bita mar ongga dimeita difera okora eteb jeska Didif guru, beda Didif dimeita mar koma jeni erek budou ejginaga rot si." 43Nou ongga Ofa ongksons deika skoita efen ruforoker insa koma, beda Ofa ek, tina rua rahca ahaingkongka deika jeska rufonskos eteb. 44Beda Yesus eja noba om eiteij gu Allah rot mar insa koma juens deika. 45Tina nou ongga Ofa ongksons skoita rua deika, beda Ofa ek, tina rua rahca ahaingkongka deika. Beda Ofa agot gu rua oida, "Teinefa fogora iwa inahca erek koma ros. Iwa idebecki ojgomu. Iwa ik, jeska ai juens beda osnok egens ongga odou ekikif jeska Didif bera emaha Didif gu rusnok ongga rufogog. 46Jefeda iwa idebecki ebeirens! Jeska osnok egens insa koma enesaga fob." 47Askesi Yesus enagot mar insa koma skoita efen ruforoker ros, beda Yudas ensaga jah suma. Rusnok rufoukou ongga rurka meiteb kalawan jera moskur tein ruroru Yudas jah suma. Ebirfager imam-imam jera Yahudi rerin ebirfager rineya bera rubk rua jah suma. 48Gij mona ongga Yudas engkikif jeska Yesus sis fob beda ofa agot gu rusnok insa koma oida, "Osnok egens ongga didif dunsa omnu bera ongga iwa yuhca rot insa koma. Jefeda iwa yagei Ofa ojgomu." 49Erek koma beda gij motu insa koma Yudas eja teisis skoita Yesus beda agot gu Ofa oida, "Akeina Guru, didif duis oufamofa eteb gu Bua." Beda ofa onsa Yesus omnu. 50Beda Yesus agot oida, "Edohuj, bita mar ongga budou os rot ebeirens ojgomu." Beda rusnok insa koma ragei Yesus rot ahais. 51Beda Yesus efen oforoka egens jah suma agei efen meiteb kalawan noba agob osnok egens ongga ofij ebirfaga imam fogora eris efen osu enama jeska. 52Beda Yesus agot gu ofa oida, "Bisah bebin meiteb kalawan gij efei ojgomu. Rusnok ongga rira meiteb riragob rusnok enjgineg bera rimagos rot meiteb ongga rusnok ragob rua rot tein si. 53Erek Didif dudou os rot beda dumois gu dedin Akeina, beda Ofa omobk efen malaikat ebic setka kungkob erfeka jeskaseda ragob rusnok kef. 54Tina Didif dineita mar erek koma guru jeskaseda mar ongga rua rumotunggom gu Didif bera ah gij efera jeni erek runggu gij Mar Efeyi Ebsi sis fob ojgomu." 55Beda Yesus agot gu rusnok insa koma oida, "Teinefa fogora iwa yurka yeyin meiteb jera moskur jeskaseda iragei Didif erek komo! Jeska Didif bera dinerek osnok egens ongga ofogog guri. Gij mona ofoukou bera Didif duftuftu mar gu rusnok gij momas ongga angh rejrej Mod Allah, tina iwa inagei Didif jah suma guri. 56Tina mar ongga iwa intunggom kef bera jeskaseda mar ongga nabi-nabi runggu gij Mar Efeyi Ebsi osok gij Didif sis fob bera emah gij efera ojgomu." Beda Yesus efen ruforoker nomnaga rimaha Ofa jah fogora ruku jeska. 57Erek koma beda rusnok insa koma ruroun Yesus gu mod ongga Kayafas efen. Ofa bera ebirfaga imam-imam Yahudi egens ongga ofoka aksa. Noba ebirfager imam-imam Yahudi rineya jera ebirfager rusnok Yahudi jera Guru-Guru agama rumohoturuma gij mod egens insa koma. 58Petrus okahma otoij Yesus ai yes. Beda ofa oira gij momas ongga angh rejrej mod insa koma fob. Beda ofa eker doida tentarer ongga runt joug mod insa koma jeskaseda eg rot mar ongga ebirfager Yahudi rumotunggom skoita Yesus. 59Ebirfager imam-imam Yahudi jera ebirfager Yahudi rineya tein ruhca rusnok ongga rimagot rot oida rua rik Yesus otunggom mar ongga oska sis fob fogora ebirfager koma rimagob Yesus rot. 60Tina rua rinek osnok egens tein ongga anggot mar insa koma rot koisoisa jinaga guru. 61Beda gosnok gegeka gagot oida, "Sis fob magef mag Yesus koma agot oida 'Didif dumohoda Mod Allah kef. Noba gij mona orgomu deika, beda Didif dimei Mod Allah egens kef deika sons si.' " 62Beda ebirfaga imam-imam egens insa koma ot noba agot gu Yesus oida, "Bagot rot koisoisa gu memef osok gij mar ongga goga ganggot insa koma fob ojgomu." 63Tina Yesus enagot mar sons gu ofa rot guru. Beda ebirfaga imam-imam egens koma agot deika oida, "Didif duis gu Bua oisouska Allah, ongga efena ebah, efen ofoka jeskaseda buroun mar ongga mejeka gu Bua rot tenten ojgomu! Bua bera Kristus ongga Allah omobk erek raja egens ei?" 64Beda Yesus oroun gu ofa oida, "Mar ongga bua banggot insa koma bera tenten ojgomu. Tina Didif dagot gu bua rot tenten tein oida gij mona kahma bera bua bera bimek Didif, Rusnok Efesa, riker gu Allah ognosk rot owesa efek eteb. Noba bua bimek Didif dumoksons jeska mebaga gij mocgoj ofog si." 65Nou ongga ebirfaga imam-imam egens koma eg mar insa koma ongga Yesus anggot rot fob, beda ofa ekris efen meisoufa fogora ebga erek orocunc rot oida ofos graga eteb rot. Beda ofa ois gu rusnok jah suma oida, "Ofa ohurmei mar skoita Allah! Jefeda enadaij nou memef mejeka gu rusnok osok gij Ofa deika guru. Jeska iwa tein ig Ofa ohurmei mar skoita Allah fob. 66Iwa isujohu rot oida memef meita mar okum gu Ofa erek meidu?" Beda rua ragot oida, "Ofa ontunggom mar ongga oska eteb fob, jefeda Ofa agos rot ojgomu." 67Beda rua ruskurfi gij Yesus osum noba rubu Ofa jera riseda Ofa osum tein. 68Beda rua rirahaisomu rot Ofa fogora ragot oida, "Bua bera Kristus, jefeda bagot gu memef oida idu bera ongga obu Bua ainsa koma." 69Erek koma beda askesi Petrus engker gu momas ongga angh rejrej mod egens insa koma ros, beda ojaga egens ongga omfij ebirfaga imam-imam Yahudi ojot doida Petrus. Beda ofa agot oida, "Bua tein bera osnok egens ongga ororu Yesus insa koma ongga ojga jeska monuh Galilea!" 70Beda Petrus oroun gu ofa jah rusnok nomnaga rudou oida, "Didif dinejginaga rot mar ongga bua banggot rot insa kef guru." 71Beda ofa ojot doida montoj momas insa koma. Beda ojaga egens egema deika ek ofa jah suma. Beda ofa agot gu rusnok jah suma oida, "Ofa kef bera ororu Yesus koma ongga ojga jeska kota Nazaret tein." 72Beda Petrus agot rot oga ahais gu ofa tein oida, "Didif dinejginaga rot osnok egens koma guru!" 73Erek ai juens deika beda rusnok ongga rut jah suma rik Petrus, beda rua rin skoita ofa. Beda rua ragot gu ofa oida, "Tenten, bua tein bera Yesus efen ruforoka egens ojgomu. Jeska bua bagot mar morototuma erek rua ongga rujga monuh Galilea tein." 74Beda Petrus agot rot ahais gu rua oida, "Didif dinejginaga rot osnok egens koma jinaga guru! Noba erek didif ducuwei mar gu iwa rot, beda didif duis gu Allah jeskaseda ofra mar okum keingg didif rot ojgomu!" Beda ainsa koma tein mongkukar orna oga. 75Petrus odou ah keingg rot mona ongga Yesus agot gu ofa rot oida, "Erek mongkukar orna onoga enesi, beda bua bumorot keingging rot ofosma orgomu oida bua binejginaga rot Didif guru." Beda Petrus eja orogna jeska momas insa koma noba ebisa eteb rot mar ongga ofa ontunggom insa koma.

will be added

X\