Matius 12

1Gij mona ongga Sabat egens bera Yesus ecira aki morototuma jera efen ruforoker gij mekta egens ongga gandum ener gij. Ofa efen ruforoker mosona ongkir jefeda rua rigib gandum efej fogora rimet. 2Nou ongga rusnok Yahudi ongga ebic Farisi rineya rik mar insa koma fob, beda rua ragot gu Yesus rot rusum oskusk oida, "Teinefa fogora bebin ruforoker rigib maat erek komo. Jeska mifmin erebent agama eyahehir joug rot koma gij mona ongga Sabat ojgomu!" 3Beda Yesus oroun gu rua oida, "Erek iwa inek gij Mar Efeyi Ebsi osok gij mar ongga Daud otunggom sis fob gij mona ongga ofa efen ruforoker mosona ongk rua tein gurei? 4Jeska ofa oira gij Mod Allah efesi. Beda ofa jera efen ruforoker rit roti ongga imam-imam sismeni rira nou rurougif gu Allah fob. Tina mifmin erebent agama agot oida imam-imam risinsiyai bera rit roti insa koma ojgomu. 5Era, erek iwa inek mar egens gij buku hukum Musa osok gij imam-imam rot mona ongga Sabat gurei. Jeska mar koma agot oida, erek imam-imam ongga rita mar nou Allah gij efen mod efesi bera runororu jeni mar ongga hukum erebent agot rot mona ongga Sabat guru, beda mar koma bera enerek oska guru. 6Tina ongga tenten bera, mar egens ongga erek ekirsa jeska Mod Allah bera en fob. 7Noba runggu gij Mar Efeyi Ebsi rot mar ongga Allah anggot oida, 'Didif dudou eneskeira eteb rot rusnok ongga rita marksa erek mar ongga rurougif gu Didif rot guru. Tina Didif dudou eskeira rot rusnok ongga rucunc rudou ongga oufamofa moguma ojgomu.' Erek koma noba erek iwa idou ebriyi gij mar insa koma efen ofou fob, beda iwa inocunc rusnok ongga rita mar ongga oufamofa erek oska guru. 8Erek koma jeska Didif, Rusnok Efesa, bera ongga dagot rot mar meidu ongga rusnok rutunggom gij mona ongga Sabat ojgomu." 9Beda Yesus eja jeska mekta insa koma noba eja jah mod ongga rusnok Yahudi rum riteij gu Allah gij. 10Osnok egens ongga etma enama ofumbohah enofogu gij mod insa koma. Rusnok rineya jeska ebic Farisi jah suma ruhca moroju jeskaseda rucunc Yesus erek osnok egens ongga eita mar ongga oska. Jefeda rua rijeka gu Ofa oida, "Erek osnok egens eita eskeira gu rusnok enjgineg gij mona ongga Sabat, beda ororu mifmin erebent agama koma bera erek oska ei era gurei?" 11Beda Yesus agot gu rua oida, "Erek osnok egens jeska iwa efen domba egens ongga esiri gij mebi efesi gu mona ongga Sabat, beda ofa omofra efen domba insa koma jeska mebi efesi koma si. 12Tina rusnok bera erek rufoufem ekirsa jeska domba-domba ojgomu. Jefeda erek mimif mufij rusnok enjgineg gij mona ongga Sabat beda ororu mifmin erebent agama koma onoska guru." 13Erek koma beda Yesus agot gu osnok egens koma ongga etma enama ofumbohah oida, "Bua busk bitma ongga ofumbohah." Beda osnok egens koma osk efen etma ongga ofumbohah, noba ainsa koma tein efen etma erek eskeira fob. 14Beda rua ongga ebic Farisi jah suma rurogna rot rudou ongga oska. Jefeda rua rudou oromom jeskaseda ragob Yesus. 15Nou ongga Yesus ejginaga rot oida rusnok ebic Farisi rudou oromom jeskaseda ragob Ofa, beda Ofa eja jeska monuh insa koma. Rusnok rufoukou doska ruroru Ofa tein, noba Ofa eita eskeira gu rua ongga marenir. 16Tina Ofa eyahehir joug rua jeskaseda rinefesij rot mar ongga Ofa ontunggom nou rua skoita rusnok enjgineg guru. 17Ofa eita mar erek insa koma jeskaseda mar ongga Allah anggot oisouska nabi Yesaya osok gij Yesus sis fob bera emah gij efera fob. Ofa anggot oida, 18"Ofa kef bera osnok egens ongga Didif duncunc fob. Didif dudou okora rot Ofa, noba dudou eskeira rot mar ongga Ofa otunggom tein. Didif dumobk dedin Efena Ebsi skoita Ofa, beda Ofa emagot gu rusnok ebic nomnaga rot oida mona ongga Didif dumofra mar okum keingg rusnok rot rerin mar ongga oska bera en fob. 19Noba Ofa enagerir rot mar insa koma guru. Noba efen oga onomosokuma rot jera rusnok enjgineg tein guru. Ofa enefesij osok gij mar koma rot oga eteb skoita rusnok gu moroju tein guru. 20Ofa omocunc odou ongga eriaga skoita rusnok ongga runowesa efek guru. Beda Ofa omofij rua ongga rufojingki tein si. Ofa omog ejmeg rot efen mar ongga Ofa oftuftu osok gij dedin duga ojgomuja onjoros rusnok rijginaga rot oida Didif bera ongga duskotu rusnok jeska rerin mar ongga oska. 21Noba rusnok ebic nomnaga rumoisum gij Ofa si." 22Nou ongga koma oisa fob, beda rusnok ruroun osnok egens ongga efena ofogog oira gij odou efesi fob fogora ofa enagot mar deika guru, noba eiteij ofou tein. Jefeda Yesus eita eskeira gu osnok egens koma, beda ofa agot mar deika sons noba ek mar deika sons tein. 23Rusnok rufoukou ongga rik mar insa koma bera rudou oubsaha eteb rot. Jefeda rua ragot moguma oida, "Ofa bera osnok egens koma ongga onjuj jeska raja Daud ongga emen ei?" 24Nou ongga rusnok ebic Farisi rig rot mar insa koma beda rua ragot oida, "Erek koma guru! Ofa ekemeji efena ofogog jeska rusnok rudou efesi oisouska owesa efek ongga Ofa esma jeska Beelzebul ojgomu." 25Yesus ejginaga rot mar ongga rua ragot moguma fob, jefeda Ofa agot gu rua oida, "Erek rusnok ebic egens ongga ringker gij monuh egens rimagobuma, beda gij mona kahma bera ebic egens insa koma omorowora rot rua tein. Erek koma tein, erek rusnok ongga ringker gij kota egens era gij mod etma egens rimagobuma, beda kota koma era mod etma egens koma emesiri ojgomu fogora rusnok insa koma rimekebema ojgomu. 26Beda erek koma tein rot efena ofogog. Erek efena ofogog nomnaga ongga ruroru Bilis risinsa rimagobuma, beda koma erek rua rimekebema tein. Jefeda runofora efek deika guru. 27Iwa yagot oida Didif dikemeji efena ofogog jeska rusnok rudou efesi oisouska owesa efek ongga Didif disma jeska Beelzebul. Tina gij mona ongga iwa yeyin ruforoker rikemeji efena ofogog jeska rusnok rudou efesi, beda iwa yagot oida rua rinesma owesa efek jeska Beelzebul rot guru. Jefeda koma orocunc rot oida mar ongga iwa yanggot rot Didif bera enerek tenten guru. 28Beelzebul eneita owesa efek gu Didif jinaga guru. Tina Efena Ebsi Allah bera ongga eita owesa efek gu Didif jeskaseda dikemeji efena ofogog jeska rusnok rudou efesi. Jefeda koma bera orocunc rot tenten gu iwa oida mona ongga Allah omofoka ereij keingg efen rusnok bera ensaga fog. 29Erek koma tein, erek osnok egens odou os eita mareibra jeska mod ongga osnok egens enjgineg ongga ofora efek efen, beda sismeni fog bera ofa agei osnok egens ongga ofora efek insa koma, noba erakid efen etma tein ojgomu. Beda ofa emeita efen mareibra nomnaga jeska efen mod insa koma. 30Osnok egens ongga onot jera Didif guru, ofa bera ongga eretei rot Didif ojgomu. Noba osnok egens ongga onofij Didif jeskaseda duroun rusnok skoita Allah guru, beda ofa bera erek osnok egens ongga ekemeji rusnok jeska Allah ojgomu. 31Didif dagot mar erek insa koma jeska Allah omosuna rot rusnok rerin mar ongga oska nomnaga tein si. Tina erek rusnok ragot mar ongga ofogog osok gij Efena Ebsi, beda Allah onosuna rot rerin mar ongga oska egens koma jinaga guru. 32Noba erek rusnok ragot mar ongga oska rot Didif, Rusnok Efesa, beda Allah omosuna rot mar insa koma. Tina erek rusnok ragot mar ongga oska rot Efena Ebsi, beda Allah onosuna rot rerin mar ongga oska egens koma jinaga guru." 33Beda Yesus agot deika oida, "Mega egens ongga ot gij mebi ongga ofogu rara bera efen efek ongga ongkoska. Noba mega ongga ot gij mebi oska bera efen efek ongga erek oska tein. Noba erek iwa ik mega efen efek, beda iwa ijginaga rot mega koma efen ofoka erek teinefa. 34Iwa yeyin idou ongga efesis noba ofogog erek magosu ojgomu. Jeska giskini rusnok ragot rot mar ongga angh gij rudou efesi. Iwa yagot mar ongga erek eriagamaga, tina iwa indemdemi yeyin mar ongga ofogog gij idou efesi ojgomu fob. 35Osnok egens ongga eita mar ongga oufamofa bera agot rot mar ongga oufamofa eteb ongga angh gij efen odou efesi. Tina osnok egens ongga eita mar ongga ofogog bera agot rot mar ongga ofogog eteb ongga ah gij efen odou efesi tein. 36Kef bera tenten oida, gij mona ongga Allah ofra mar okum keingg rusnok rot rerin mar ongga oska, beda Ofa omocunc iwa erek oska rot mar nomnaga ongga iwa yanggot fob ongga erek oska tein si. 37Jeska Allah omocunc rusnok nomnaga erek oska era erek oufamofa si. Noba Ofa omotunggom mar koma oisouska mar ongga rua risinsa ranggot ongga erek oska era ongga erek oufamofa si." 38Erek koma beda gij mona insa koma bera rua ongga Guru-Guru agama jera rua ongga ebic Farisi rineya ragot gu Yesus oida, "Bua butunggom mar ongga onswos egens nou memefo!" 39Beda Yesus agot oida, "Iwa ongga ifena ebah gij mona ebeibeyaif bera erek rusnok ongga ofogog eteb. Iwa yuis gu Didif jeskaseda dutunggom mar onswos ongga orocunc rot oida dedin owesa efek ongga en jeska Allah. Tina Didif dineita mar koma nou iwa guru. Allah bera omocunc mar onswos egens gu iwa ongga morototuma erek mar onswos ongga nabi Yunus ek rot sis eteb fob. 40Sis fob bera Yunus eker gij mos eteb efen otkonu efesi gij mona orgomu jera motu orgomu. Beda erek koma tein Didif, Rusnok Efesa, bera dimeker gij mebif efesi nou mona orgomu jera motu orgomu tein. 41Gij mona ongga Yunus oftuftu gu rusnok Niniwe rot Allah oga, beda rua rimeesa joug rot rerin mar ongga oska. Jefeda gij mona ongga Allah ofra mar okum eteb keingg rusnok rot rerin mar ongga oska, beda rusnok Niniwe insa koma rumocunc iwa irek oska. Noba ongga tenten bera ebeibeyaif iwa ig rot Allah oga jeska osnok egens ongga ofoka ekirsa jeska Yunus fob. 42Noba sis eteb fob bera ojaga egens ongga ofoka ereij keingg monuh eteb bera eja skoita raja Salomo jeskaseda eg rot mar ongga ofa oftuftu rot odou ongga ebriyi eteb gij mar. Jefeda gij mona ongga Allah omofra mar okum eteb keingg rusnok rot rerin mar ongga oska, beda ojaga egens insa koma bera omorocunc rot iwa erek oska si. Ongga tenten bera ebeibeyaif iwa ig mar jeska Didif ongga dedin dufoka ongga ekirsa jeska raja Salomo fob." 43Beda Yesus oftuftu mar deika oida, "Gij mona ongga efena ofogog orogna jeska osnok egens odou efesi fob, beda efena ofogog koma ecira gu monuh ongga owowa noba ohca osnok egens jeskaseda eker keingg ofonskos gij efen odou efesi. Tina efena ofogog koma enek osnok egens egema tein ongga adaij guru. 44Beda efena ofogog koma osujohu rot oida omoksons skoita osnok egens ongga ofa engker gij sis fob deika. Beda efena ofogog koma ek rot oida osnok koma efen odou efesi bera erek eskeira eteb deika fob. 45Jefeda efena ofogog koma eja noba oroun efena ofogog cinja erfeka deika ongga erek ofogog ekirsa jeska esinsa. Beda efena ofogog koma nomnaga rijeker morototuma gij osnok egens insa koma odou efesi. Jefeda ebeibeyaif osnok egens insa koma emefera okora eteb ekirsa jeska mona ongga efena ofogog egens engker gij odou efesi. Mar erek koma bera emecirej rusnok ongga riker gij mona ebeibeyaif tein si." 46Askesi Yesus efesij mar gu rusnok rufoukou insa koma ros, beda Ofa efen mosu jera mokoser rinsaga jah suma. Rua rut jah mebah noba rua rudou os rifesij mar jera Yesus. 47Jefeda osnok egens ongga eker gij mod efesi agot gu Yesus oida, "Akeina, bebin mosib jera obkoser rut jah mebah, noba rua rudou os ragot mar jera Bua." 48Beda Yesus oroun oida, "Rusnok ongga erek dedin ameina, era erek dedin edkoser bera erek idu." 49Beda Ofa ek gu efen ruforoker jah suma noba agot oida, "Rusnok kef bera erek dedin ameina jera edkoser. 50Jeska rusnok ongga rita mar ongga Akeina ongga eker gu mebaga odou os rot ojgomu, rua bera erek dedin ameiner jera edkoser jera edieser tein."

will be added

X\