Matius 10

1Yesus ohoturu efen ruforoker rufok setka kungkob erfeka. Beda Ofa eita owesa efek gu rua jeskaseda rikemeji efena ofogog jeska rusnok rudou efesi, jera rita eskeira gu rusnok rot mar nomnaga ongga orotunggom rua erek marenir tein. 2Ruforoker rufok setka kungkob erfeka insa koma bera: Simon (ongga rijeka erek Petrus tein) ni, efen mokosa Andreas ni, Yakobus jera efen mokosa Yohanes ni, (Goga bera Zebedeus efen efeserga) 3Filipus ni, Bartolomeus ni, Tomas ni, Matius ni (Koma didif ongga duhoturu pajak jeska rusnok sis fob), Yakobus ongga Alfeus efen efesa ni, Tadeus ni, 4Simon ni (ongga rusnok rijeka Patriot tein), jera Yudas Iskariot, ongga gij mona kahma emekikif jeska Yesus. 5Nou ongga Yesus omobk efen ruforoker rufok setka kungkob erfeka ongga Ofa oncunc fob, beda Ofa agot gu rua oida, "Iwa ineja jah monuh ongga rusnok ongga Yahudi guru ringker gij guru. Noba iwa inoira gij kota-kota ongga angh gij monuh Samaria tein guru. 6Tina iwa ija skoita rusnok Israel ojgomu. Jeska rua bera erek domba-domba ongga riseiseifa. 7Iwa ija skoita rua noba ifesij gu rua oida, mona ongga Allah omofoka ereij keingg rusnok bera enesaga doida fob. 8Iwa ita eskeira gu rusnok ongga marenir ni, ita efena ebah sons gu rusnok ongga ranggos fob ni, ita eskeira gu rusnok ongga maira et rufos ni, ikemeji efena ofogog jeska rusnok rudou efesi ni. Didif dita owesa efek insa koma rot oubji gu iwa ojgomu. Jefeda iwa tein itunggom mar insa koma nou rusnok rot oubji tein ojgomu. 9Iwa inorka fifi era mar egema tein guru. 10Inorka yeyin mesina tein guru. Noba iwa icira rot meisoufa ongga irgi fob ojgomu. Inorka yeyin meisoufa era sandal era moskur ongga egema dokun deika guru. Iwa imofij rusnok jah suma, jefeda adaij nou rua rufij iwa rot maat jera meisoufa ongga iwa icosu rot ojgomu. 11Gij mona ongga iwa yuira gij kota egens, beda iwa yuhca osnok egens ongga omoroun iwa gij efen mod. Beda iwa iker jah suma onjoros imorogna jeska kota insa koma. 12Nou ongga iwa imoira gij mod egens, beda bagot gu rusnok gij mod insa koma oida, 'Memef mois gu Allah jeskaseda Ofa eita eskeira eteb gu iwa.' 13Noba erek rua ruroun iwa rot rudou ongga oufamofa, beda buis gu Allah rot mar insa koma ojgomu. Tina erek rusnok runororu iwa rot rudou ongga oufamofa skoita iwa guru, beda inois gu Allah jeskaseda Ofa eita eskeira erek insa koma gu rua guru. 14Noba erek rusnok gij mod egens era gij kota egens runoroun iwa guru, beda iwa ija jeska ojgomu. Noba yubsa ikoda rot mebi ofou ongga kota koma efen sismeni fog. 15Rusnok ongga ringker gij kota insa koma bera rimesma mar okum eteb jeska Allah ongga erek ekirsa jeska mar okum ongga Ofa omofra keingg rusnok jeska kota Sodom jera Gomora sis fob. Rusnok kota Sodom jera Gomora runtunggom mar ongga oska efekeifa sis eteb fob." 16Erek koma beda Yesus oftuftu mar deika gu efen ruforoker. Ofa agot oida, "Didif dumobk iwa ongga idou eriagamaga jah gu rusnok rifekesa ongga rudou ofogog. Koma erek domba-domba ongga rijeker gu serigala ofoukou rifekesa. Jefeda ibes ifaga jeska mar ongga ofogog erek magosu ongga ebes efaga jeska mar ongga ofogog. Noba ita mar skoita rusnok enjgineg rot idou ongga eriagamaga ojgomu erek mem monggeta mos ongga eriagamaga. 17Yut joug idou efesi rot iskusk ojgomu. Jeska rusnok rineya rimekris iwa jah rusnok Yahudi rerin ebirfager. Beda ebirfager insa koma rumoga ojga rot oida rangha iwa gij mod ongga rua rum riteij gu Allah gij. 18Iwa iroru Didif fob, jefeda rusnok rimekris iwa skoita ebirfager rineya jera raja-raja tein. Beda gij mona insa koma bera iwa ifesij osok gij Allah oga ongga oufamofa skoita rua jera rusnok ongga erek Yahudi guru tein ojgomu. 19Tina gij mona insa koma iwa inejekjeka idou efesi rot mar ongga imefesij gu rua guru. Jeska iwa imejginaga rot mar koma si. 20Erek koma jeska yeyin Ika Allah bera omorocunc rot mar ongga imagot insa koma oisouska Efena Ebsi gij idou efesi si. Beda iwa imefesij rot mar ongga en jeska Allah ojgomu. 21Gij mona insa koma rusnok rimekikif jeska risinsa rerin mokoser, jeska mokoser koma ruroru Didif fob. Beda rua rimekris rerin mokoser insa koma skoita ebirfager Yahudi. Beda rua rumoga ojga rot oida rerin mokoser ragos ojgomu. Erek koma noba riker rimekikif jeska rerin riser erek insa koma tein fogora riser ragos. Noba riser rimekikif jeska rerin riker jera rusir erek insa koma tein fogora rigeka tein rimagos. 22Rusnok rufoukou rimeita rudou ongga ofogog skoita iwa jeska iwa iroru Didif fob. Tina erek dedin rusnok rita rudou ahais gij mona ongga mar okum insa koma rireneni rua, beda rua rineseiseifa guru. Allah omoskotu rua si. 23Gij mona ongga rusnok rutunggom mar ongga oska skoita iwa, beda iwa ija jeska kota koma noba ija jah kota enjgineg ojgomu. Noba ongga tenten bera askesi iwa ita mar insa koma rejrej kota-kota ongga rusnok rerin Israel ros, beda Didif dumoksons gij mona insa koma si. 24Guru egens efen ofoka ongga aksa ekirsa jeska efen ruforoker. Noba osnok egens ongga efen rusnok ongga rumfij ofa bera efen ofoka ongga ekirsa jeska rua tein. 25Jefeda adaij nou ruforoker rita mar morototuma erek rerin Guru eita mar tein ojgomu. Noba adaij nou rua ongga rumfij rerin ebirfaga rita mar morototuma erek rerin ebirfaga egens eita mar ojgomu. Erek koma tina, erek rusnok rerin ebirfaga egens ongga ofoka Setan, beda rusnok enjgineg rumoga oska ekirsa skoita rua ongga ruroru ofa tein si." 26Beda Yesus agot gu efen ruforoker deika oida, "Erek koma jefeda iwa inemeesa rot rusnok enjgineg guru. Jeska mar ongga ah endemdemi jeska rua ebeibeyaif bera emah rot tomnomna si. Noba mar ongga angh jejema jeska rua bera rimejginaga rot si. 27Mar ongga Didif dimfesij gu iwa ojgomu bera ah jejema jeska rua ros. Tina ebeibeyaif iwa ifesij osok gij mar insa koma rot tomnomna ojgomu. Mar ongga iwa ig jeska Didif fob bera ifesij rot koisoisa gu rusnok nomnaga ojgomu. 28Noba iwa inemeesa rot rusnok ongga ragob iwa ojgomu guru. Jeska rerin owesa efek jeskaseda rij iwa gij mahmei meren enah jinaga guru. Tina iwa yugif gu Allah rot idou ongga imeesa rot Ofa ojgomu. Jeska Ofa efen owesa efek jeskaseda otunggom rusnok fogora ragos beda rij rua gij mahmei meren tein. 29Iwa isujohu rot mem cucurwahi. Mem insa koma efena efera ojuj ojgomu. Rusnok ringk mem koma rot fifi erek ai oskiyai ojgomu. Tina Allah odou okora rot mem koma tein. Noba erek Ofa onoitij rot guru, beda mem erek egens tein enagos guru. 30Tina Allah odou okora rot iwa erek eteb ekirsa tein. Ofa ejginaga osok gij mar ongga ai ofokai rot iwa tein. Ofa ejginaga rot yeyin ibirfaga efeji egens egens tein. 31Jefeda iwa inemeesa rot rusnok enjgineg guru, jeska ahah Allah eiteij bera iwa erek ofoufem ekirsa jeska mem cucurwahi insa koma. Ofa omot joug iwa rot ahais si. 32Noba osnok egens ongga agot jah rusnok rudou rot oida ofa bera ororu Didif rot tenten fob, beda Didif dumocunc ofa erek dedin oforoka egens jah Akeina odou gu mebaga tein. 33Tina osnok egens ongga okoja Didif jah rusnok rudou, beda Didif tein dumokoja ofa jah Akeina odou gu mebaga si." 34Erek koma beda Yesus agot deika oida, "Enadaij nou iwa isujohu rot oida Didif din jah mebif jeskaseda rusnok nomnaga riker rot rudou ongga eskeiramera moguma ojgomu guru. Didif dinen jeskaseda dita mar erek koma nou rusnok guru. Tina Didif din jeskaseda rusnok rimekebema ojgomu. 35Jeska mar ongga Didif duftuftu rot bera omorotunggom meka fogora ekeba jeska efen efesa orna ni, efesa ojaga emekeba jeska ofa efen mosu ni, mogona emekeba jeska efen mefina ni. 36Yeyin ibskir rimeja erek mesa ongga rufogog skoita iwa. 37Noba erek rusnok rudou okora rot rerin rika jera rusu ekirsa jeska rudou ongga okora rot Didif, beda enadaij nou rua ruroru Didif erek dedin ruforoker guru. Noba rua ongga rudou okora rot rerin riser ekirsa jeska rudou ongga okora rot Didif, beda enadaij nou rua ruroru Didif erek dedin ruforoker guru. 38Rua ongga runoitij rot rita efera okora eteb erek Didif dimeita difera okora eteb guru, beda enadaij nou rua ruroru Didif erek dedin ruforoker guru. 39Noba rusnok ongga rusujohu ekirsa rot mar ongga riteij ah kef efen, beda rua rineita eiteij ah ongga efeinah guru. Noba erek rusnok runororu mar ongga risinsa rudou os gij riteij ah kef guru, tina rua ruroru mar ongga Allah odou os rot ojgomu, beda rua rimeita eiteij ah ongga efeinah si." 40Beda Yesus agot deika oida, "Erek osnok egens oroun iwa rot odou ongga oufamofa, beda koma erek ofa oroun Didif rot odou ongga oufamofa tein. Noba ofa ongga oroun Didif rot odou ongga oufamofa, beda koma erek ofa oroun dedin Akeina rot odou ongga oufamofa tein. Akeina bera ongga obk Didif jah mebif fob. 41Noba osnok egens ongga oroun rua ongga Allah ombk fob, jeska ofa ejginaga rot oida rua insa koma bera rifesij mar osok gij Allah oga, ofa tein emesma ofons ongga ongkoska eteb jeska Allah morototuma jera rusnok insa koma ongga Allah ombk fob si. Noba osnok egens ongga oroun rusnok ongga rudou oufamofa, ofa tein emesma ofons ongga ongkoska eteb jeska Allah morototuma jera rusnok insa koma ongga rudou oufamofa si. 42Noba osnok egens ongga ofij dedin ruforoker rot mar ongga oskiyai tein erek eita mei ongga emej era eita maat ongga emet, beda ofa tein emesma ofons ongga ongkoska eteb jeska Allah si."

will be added

X\