Markus 7

1Gij mona egema deika beda ebirfager Yahudi ongga ebic Farisi jera Guru-Guru agama ongga rin jah kota Yerusalem rumohoturuma rejrej Yesus. 2Beda rua rik, tina Yesus efen ruforoker rutunggom mar rot ritma ongga rua insa koma rusujohu oida erek oska eteb. Koma bera, rua rik ruforoker rit maat, tina runot rerin ritma sismeni fog guru. Noba ororu agama Yahudi erebent bera rusnok rut ritma jeni erebent insa koma anggot rot sismeni fog fogora rimet maat ojgomu. 3Jeska rua ongga Farisi jera rineya tein ongga ruroru agama Yahudi erebent rot ahais bera rut ritma jeni erebent egens insa koma ongga onjuj en jeska rerin rimowa, fogora rimet maat ojgomu. 4Erek koma tein, gij mona ongga rua rijengk maat gu pasar noba ruksons jah rerin mod, beda rua rut maat insa koma jeni agama erebent anggot rot, fogora rit. Rua rerin agama erebent egema tein ongga rua rireni rot ahais jeskaseda ruroru jeni ojgomu. Koma erek, rua rut rerin mok osku ni, bokor efeyi ni, jera rerin meidibi ni tein jeni rerin agama erebent anggot rot jeskaseda mar koma onotunggom rua erek oska ahah Allah eiteij guru. 5Jefeda rua ongga ebic Farisi jera Guru-Guru agama insa koma ragot gu Yesus oida, "Bebin ruforoker koma rikirsa rot erebent ongga onjuj en jeska mifmin mimowa, jeska rua rit maat tina runot ritma jeni mifmin agama erebent anggot rot sismeni fog guri. Teinefa fogora Bua burons rua mar erek komo!" 6Beda Yesus agot gu rua oida, "Mar ongga nabi Yesaya anggot rot sis fob osok gij iwa bera erek tenten. Jeska iwa bera ongga ineita mar ongga oufamofa jeni erek yanggot rot gu rusnok ejginaga guru. Yesaya onggu mar ongga Allah anggot rot erek kef oida, 'Rusnok kef rusujohu rot oida rua rufra dufoka erek aksa oisouska mar ongga rua ranggot ojgomu. Tina gij rudou efesi bera runofra dufoka aksa erek oskiyai tein jinaga guru. 7Rua rugif gu Didif erek rourou ojgomu. Jeska mar ongga en jeska risinsa rudou efesi bera rua ruftuftu gu rusnok rot oida mar koma bera en jeska Didif ojgomu, tina guru.' " 8Beda Yesus agot deika oida, "Koma erek tenten, jeska iwa yukoja mar ongga Allah anggot rot noba iwa iroru erebent ongga rusnok ruftuftu rot ojgomu. 9Iwa idou efesis rot jeskaseda inororu mar ongga Allah anggot rot guru. Tina iwa iroru mar ongga isinsa yeyin erebent rot ojgomu. 10Mifmin mimowa Musa anggot rot oida, 'Yugif gu yeyin ika gonu yusu.' Ofa tein agot rot oida, 'Idu ongga agot mar ofogog skoita efen meka era mosu beda ofa emagos rot ojgomu.' 11- 12Erek koma tina erek osnok egens agot gu efen meka jera mosu oida, 'Didif dunofij goga rot dedin mar egema tein guru, jeska didif danggen rot oida dimeita mar insa koma gu Allah erek mar ongga durougif gu Ofa rot ojgomu.' Beda iwa yuftuftu gu rusnok oida mar insa koma bera erek oufa ojgomu. Jefeda koma bera erek iwa yuitij rot jeskaseda rusnok runofij rerin riker jera rusir jinaga guru. Koma bera erek oska, jeska koma orocunc rot oida iwa inororu hukum Musa insa koma rot tenten deika guru. 13Jefeda oisouska yeyin erebent ongga onjuj jeska yeyin imowa insa koma bera iwa inororu mar ongga Allah anggot rot osok gij yeyin ika jera yusu guru. Noba iwa ita mar erek koma rot mar egema tein ongga ofoukou ojgomuja." 14Erek koma beda Yesus ois gu rusnok rufoukou jah suma jeskaseda rumohoturuma jera Ofa deika. Beda Ofa efesij rot mar insa koma gu rua deika sons oida, "Iwa nomnaga ig duga rot iskusk fog jeskaseda idou ebriyi gij rot tenten ojgomu. 15Mar meidu meidu ongga oira gij rusnok rutkonu bera onotunggom rerin rudou erek oska ahah Allah eiteij guru. Tina mar ongga orogna jeska rusnok rudou efesi ojgomu bera ongga orotunggom rudou erek oska ahah Allah eiteij fob. 16Ainsa kef bera yuj yusu nou mar ongga Didif danggot gu iwa rot iskusk ojgomu fog." 17Nou ongga Yesus eja jeska rusnok insa koma nomnaga noba ojoira gij mod egens fob, beda efen ruforoker rijeka gu Ofa osok gij mar ongga Ofa emfesij insa koma rot efen ofou. 18Beda Ofa oroun gu rua oida, "Dudou ai erek okum rot iwa jeska idou enebriyi gij rot mar ongga Didif dimfesij insa koma efen ofou enesi. Mar meidu meidu ongga rusnok rint bera oira gij rutkonu ojgomu. Noba mar insa koma bera onotunggom rerin rudou efesi erek oska ahah Allah eiteij jinaga guru. 19Jeska mar insa koma onoira gij rudou efesi guru, tina mar koma bera oira gij rutkonu ojgomu. Noba gij mona ongga rua rij ebeyi rot, beda mar insa koma tein orogna ojgomu." (Mar ongga Yesus anggot insa koma bera orocunc rot oida maat nomnaga bera erek oufamofa nou rusnok ojgomu noba onotunggom rusnok rudou efesi erek oska tein guru). 20Beda Yesus agot gu rua deika oida, "Mar ongga oska ongga orogna jeska rusnok rudou efesi bera ongga orotunggom rudou efesi erek oska ahah Allah eiteij. 21Jeska mar ongga angh gij rusnok rudou efesi bera ongga oroku rudou efesi jeskaseda rusujohu rot mar ongga ofogog ni, risiri morototuma ni, rukoreka mar ni, ragob rusnok enjgineg ni, risiri jera egema efen mohona ni, 22rudou ot rot mareibra ofoukou ojgomu ni, rita mar ofogog ojgomuja ni, rurokrusa rusnok enjgineg ni, rusoka ebeirens gij mar meidu meidu ongga oska ni, rudou ejisei rot rusnok enjgineg ni, ruga oruh rusnok enjgineg ni, rufra risinsa rufoka erek eteb ni, ruhurmei mar rot meidu meidu ojgomuja ni. 23Mar insa koma nomnaga ongga en jeska rusnok rudou efesi bera ongga orotunggom rudou efesi erek oska ahah Allah eiteij ojgomu." 24Nou ongga Yesus enja jeska monuh Galilea beda Ofa eja jah monuh egens ongga angh rejrej kota Tirus. Ofa oira gij mod egens jah suma jeskaseda eker gu esinsa. Jefeda Ofa enagot gu rusnok enjgineg rot guru. Tina dektek guru, beda rusnok jah suma rijginaga rot oida Ofa en fob noba engker gij mod egens insa koma. 25- 26Beda ojaga egens ongga eker jah suma efen oforokai ojaga egens ongga efena ofogog engker gij odou efesi. Ojaga egens insa koma bera jeska rua ongga Yahudi guru. Ofa bera rua ongga Yunani ongga ojga jeska kota Fenisia gij monuh Siria. Nou ongga ojaga egens insa koma engg rot oida Yesus bera en fob, beda ofa eja ebeirens skoita Ofa. Beda ofa es okeibi gu mebi noba ougif gu Ofa. Ofa erejgei Yesus jeskaseda Ofa ekemeji efena ofogog jeska efen efesa egens insa koma odou efesi ojgomu. 27Tina Yesus agot rot mar ongga orocunc egens gu ofa oida, "Ruforoker rint maat onjoros maat insa koma ereya rua sismeni fog. Jeska enadaij nou rusnok rita maat insa koma jeska rua fogora rij gu mes guru." 28Tina ojaga egens koma odou ebriyi gij mar ongga orocunc insa koma, jefeda ofa agot sons gu Yesus oida, "Mes ongga engker jah meja owohoh ongga ruforoker rint maat esij bera et maat oskiyai tein ongga ensiri jeska meja insa koma." 29Beda Yesus agot gu ofa oida, "Mar ongga bua banggot insa koma bera orocunc rot oida budou ororu Didif rot tenten fob. Jefeda binerejgei Didif deika guru, tina buksons jah bebin mod ojgomu. Jeska mar ongga bua budou os rot bera ah gij efera fob. Koma bera, efena ofogog ongga engker gij bebin ebesa odou efesi insa koma bera orogna jeska fob." 30Jefeda ojaga egens insa koma oksons jah efen mod. Nou ongga ofa ensaga jah suma fob beda ofa ek, tina efen efesa ojaga egens insa koma ongga ah gu meidibi bera eskeira sons fob. Jeska efena ofogog insa koma orogna jeska odou efesi fob. 31Gij mona egema deika beda Yesus eja jeska monuh insa koma ongga angh rejrej kota Tirus. Beda Ofa eris kota Sidon deis jera monuh ongga ofoka kota Setka onjoros Ofa ensaga gu meren Galilea. 32Jah suma bera rusnok ruroun osnok egens ongga osu otuw noba enagot mar tein guru skoita Ofa. Beda rua rirejgejgei Yesus jeskaseda Ofa aha etma esij osnok egens koma fogora eita eskeira gu ofa. 33Nou ongga Yesus oroun osnok egens koma ai yes jeska rusnok rufoukou insa koma, beda Ofa ahtec osnok egens insa koma efen osu. Beda Ofa oskurfi gij etma fogora oroduis osnok egens insa koma arni ofou tein. 34Beda Ofa eyajga jah mebaga noba agot rot odou ongga okora oida, "Efata!" Koma efen ofou oida, "Big mar!" 35Beda ainsa koma tein osnok egens insa koma eg mar koisoisa, noba mar ongga otunggom ofa fogora enagot mar guru bera eseiseifa jeska ofa ojgomu. Jefeda ofa agot mar erek giskini ojgomu. 36Beda Yesus eyahehir joug rusnok nomnaga jah suma jeskaseda rinagot rot mar ongga Ofa ontunggom nou osnok egens insa koma guru. Ofa eyahehir joug rua erek koma ojgomu, tina rua rijefesij rot mar insa koma gu rusnok enjgineg ojgomuja. 37Rusnok ongga ringg rot mar insa koma rudou oubsaha eteb rot. Noba rua ragot rot rudou ongga efaga ouka eteb oida, "Mar nomnaga ongga Ofa ontunggom bera erek oufamofa eteb! Ofa tein eita eskeira gu rusnok ongga rusuw otu fogora rua rig mar. Noba Ofa eita eskeira gu rusnok ongga rinagot mar jinaga guru fogora rua ragot mar tein!"

will be added

X\