Markus 5

1Yesus jera efen ruforoker rifef meg egens insa koma onjoros runjowa gu monuh ongga rusnok Gerasa ringker gij. Monuh insa koma bera angh gu meren Galilea enama. 2Nou ongga Yesus onjuj jeska meg insa koma fob, beda osnok orna egens orogna jeska mamu efesi ongga erek mar agos odog. 3- 4Koma bera, efena ofogog engker gij efen odou efesi tein, jefeda ofa eker gu mamu efesi insa koma ojgomuja. Sis fob rusnok rira rantai rirakid efen etma jera aki jeska ofa ofogog doska, tina guru. Ofa ekris rantai insa koma fogora ebga jeska noba ofa eyah kermom ongga rangha gu aki tein fogora ebs. Ofa erek ofora efek eteb doska jefeda enadaij nou rusnok ranggei ofa jinaga guru. 5Gij orofosut mona jera motu bera ofa ecira gij monuh ongga mar agos odog insa koma noba ofa tein eja jah memaga ofos. Beda ofa agerir mar ojgomuja noba era mamu efeya ereris esinsa efaga tein. 6Nou ongga ofa engk Yesus enesaga yes ros, beda ofa ofof skoita Yesus noba ougif jah Yesus odou. 7- 8Beda Yesus agot gu efena ofogog insa koma ongga engker gij ofa odou efesi oida, "Bua burogna jeska osnok egens kef ojgomu!" Beda osnok egens insa koma ois rot oga eteb oida, "Yesus, Bua bera Allah, ongga ofoka aksa, efen efesa! Bua bunotunggom mar ongga okum skoita didif guru! Didif duis gu Bua jeskaseda bagen gu Allah esinsa rot oida binaha mar okum keingg memef guru!" 9Beda Yesus ejeka ofa oida, "Bua bufoka idu." Beda ofa oroun oida, "Didif dufoka Mesa, jeska efena ofogog eskemba doska bera ringker gij osnok egens kef odou efesi." 10Efena ofogog insa koma emeesa eteb rot oida Yesus emekemeji rua nomnaga jeska monuh insa koma. Jefeda efena ofogog insa koma ois gu Yesus jeskaseda Ofa eneita mar erek koma gu rua guru. 11Ainsa koma tein mek ofoukou et mebi jah memaga ofog oduma ongga angh doida jah suma. 12Jefeda efena ofogog insa koma ois gu Yesus jeskaseda erek Ofa oitij rot beda rifena ofogog insa koma nomnaga rujoira gij mek ofoukou insa koma ojgomu. 13Beda Yesus oitij rot, jefeda rifena ofogog insa nomnaga rurogna jeska osnok egens insa koma noba rujoira gij mekir ofoukou koma rudou efesi. Jefeda mekir koma ruku noba rusoka jeska momfaga ongga erek mobcka aksa jah meren efembra fogora ragos ojgomu. Mek insa koma ongga runsoka jeska momfaga bera erek ribu egeka. 14Nou ongga rusnok ongga ringker joug mek ofoukou koma rik mar rot insa koma nomnaga fob, beda rua rufof jah kota noba rejrej monuh insa koma jeskaseda rifesij rot mar ongga rua ringk fob. Erek koma jefeda rusnok rufoukou rurogna jeska kota koma jeskaseda rik rot mar ongga rusnok insa koma ringk fob. 15Nou ongga rua runjowa keingg Yesus fob, beda rua rik, tina osnok egens ongga merei ongk insa koma engker doida Yesus aki. Ofa ergi meisoufa noba efen odou efesi eskeira fob. Rua ringk erek koma, jefeda rua nomnaga rimeesa rot Yesus jeska rua rik oida Ofa efen owesa efek eteb. 16Beda rua ongga ringk mar ongga Yesus ontunggom insa koma rifesij gu rusnok rineya koma rot teinefa Ofa ekemeji efena ofogog jeska osnok egens insa koma odou efesi noba rot mar ongga encirej mek ofoukou insa koma fob. 17Jefeda rusnok Gerasa koma rirejgei gu Yesus jeskaseda Ofa eja jeska rerin monuh ojgomu. 18Nou ongga Yesus eifef meg, beda osnok egens insa koma ongga eita eskeira fob bera ois gu Yesus jeskaseda ororu Ofa tein. 19Tina Yesus onoitij rot guru. Ofa agot gu osnok egens insa koma oida, "Bua bija noba bifesij gu bebin rusnok nomnaga rot mar ongga oufamofa ongga Allah ontunggom nou bua fob, noba rot teinefa Allah ocunc rot efen odou ongga oufamofa skoita bua fob." 20Erek koma jefeda ofa ejefesij gu rusnok gij kota setka ongga angh gij monuh egens insa koma osok gij mar ongga Yesus ontunggom nou ofa fob. Noba rusnok nomnaga ongga ringg rot mar insa koma bera rudou oubsaha eteb rot tein. 21Yesus eja jeska rusnok Gerasa insa koma, beda Ofa oksons jah meren Galilea enama. Noba nou ongga Ofa enjesaga jah meren efembra, beda rusnok rufoukou doska rumohoturuma rejrej Ofa. 22Gij mona insa koma bera osnok egens ongga ofoka Yairus en skoita Yesus. Ofa erek ebirfaga nou mod egens ongga rusnok Yahudi rum riteij gu Allah gij. Nou ongga ofa ek Yesus, beda ofa es okeibi gu mebi jah Yesus odou noba ois rot odou ongga okora eteb gu Ofa oida, 23"Akeina, dedin edesa ojaga egens bera maren eteb doska noba ofa doida nou anggos. Jefeda Bua bin jah dedin mod noba baha bitma esij ofa jeskaseda bita eskeira gu ofa. Erek Bua bita mar erek koma beda ofa enagos guru." 24Jefeda Yesus jera efen ruforoker rija morototuma jera Yairus jah efen mod. Noba rusnok rufoukou insa koma tein ongga ruroru Yesus bera rimeradgoduma rejrej Ofa. 25Noba ojaga egens ongga mesta ebah ojgomuja gij tahun rara setka kungkob erfeka fob ecira otoij rusnok rufoukou insa koma rifekesa. 26Mar insa koma bera eita efera okora eteb gu ofa ojgomuja. Jefeda ofa ohu efen mareibra nomnaga jeskaseda orka esinsa skoita dokter ojgomuja. Ofa eita mar erek koma onjoros efen mareibra nomnaga oisa fob. Tina ofa eneita eskeira guru. Ofa efen ogufu ongga mesta ebah insa koma eya erek ekirsa ojgomuja. 27Ojaga egens koma engg rot mar onswos ofoukou ongga Yesus ontunggom fob. Jefeda ofa tein eretka gij rusnok rufoukou insa koma rifekesa onjoros onjot doida jah Yesus ejmeg fob. 28Ofa eita mar erek koma jeska ofa osujohu rot oida erek ofa otub ofou onduis meifeti tumu Yesus efaga, beda ofa emeita eskeira si. 29Nou ongga ofa otub ofou oduis meifeti tumu Yesus fob, beda ainsa koma tein efen ogufu aha toumou jah. Beda ainsa koma tein ofa ejginaga rot oida ofa eita eskeira rot tenten fob. 30Beda ainsa koma tein Yesus ejginaga gij odou efesi rot oida efen owesa efek orogna jeska Ofa fob. Jefeda Ofa eyajga jah ejmeg skoita rusnok rufoukou insa koma noba ejeka oida, "Idu bera otub ofou onduis meifeti tumu dijmeg kef?" 31Beda efen ruforoker ragot gu Ofa oida, "Akeina, rusnok riskemba ongga runt rejrej Bua noba rimeradgoduma skoita Bua jah sif. Jefeda erek rusnok rufoukou otub ofou oduis Bua." 32Tina Yesus eiteij orohcohca ojgomuja rot osnok egens insa koma ongga otub ofou oduis meifeti tumu efen efaga. 33Ojaga egens insa koma odou ejginaga rot oida ofa eita eskeira fob. Jefeda ofa en skoita Yesus rot odou ongga osousoyu noba emeesa eteb beda ofa ougif gu Ofa. Beda ofa efesij rot mar insa koma nomnaga gu Ofa. 34Erek koma beda Yesus agot gu ojaga egens insa koma oida, "Edesa, jeska budou ororu Didif rot tenten fob, jefeda bua binsma eskeira fob. Noba bija rot budou ongga efaga ouka rot ojgomu, jeska mar egens koma ongga eita efera okora gu bua sis fob bera onoksons skoita bua deika guru." 35Askesi Yesus anggot mar ros, beda rusnok rineya rin jeska Yairus efen mod noba ragot gu Ofa oida, "Tuan, bebin ebesa ojaga insa koma agos fob. Jefeda bua bunorohrus Yesus en deika guru." 36Yesus eg rot mar ongga rua ranggot insa koma, tina Ofa agot gu Yairus oida, "Bua binemeesa rot guru. Budou ororu oida dedin owesa efek ongga adaij nou dufij bua ojgomu." 37Rusnok enjgineg rudou os ruroru Yesus jah Yairus efen mod tein, tina Ofa oroun Petrus, Yakobus jera Yakobus efen mokosa Yohanes ojgomu. 38Nou ongga rua rinsaga gu mod ongga Yairus efen fob beda Yesus ek, tina rusnok rufoukou jah suma erek ribisa ohohora gij eteb doska, noba rudou tein oubsaha rot ojgomuja. 39Erek koma beda Yesus oira gij mod egens insa koma noba agot gu rusnok oida, "Iwa ibisa fogora yuga onohohora gij erek koma rot meidu? Jeska oforoka egens koma enagos guru. Ofa ahca koma." 40Nou ongga rua ringg Yesus anggot mar erek koma beda rua nomnaga rutut rot Ofa jeska rua rijginaga rot oida oforoka egens insa koma bera agos rot tenten fob. Tina Ofa obk rua nomnaga rurogna jeska mod insa koma. Beda Ofa oroun oforoka egens insa koma efen meka gonu mosu jera Ofa efen ruforoker rugomu insa koma morototuma jera Ofa gij morongsu ongga mar agos angh gij. 41Beda Yesus agei oforoka egens insa koma etma beda agot oida, "Talita kum!" Koma efen ofou oida, "Buforoka, bidebecki." 42Beda oforoka ojaga egens insa koma edebecki ebeirens, noba ecira jah. (Ofa efen tahun erek setka kungkob erfeka fob.) Rua ongga ringk mar insa koma rufos graga eteb rot. 43Tina Yesus eyahehir joug rua nomnaga jeskaseda rinagot rot mar insa koma gu rusnok enjgineg guru. Beda Ofa obk rua jeskaseda rita maat gu oforoka ojaga egens insa koma ojgomu.

will be added

X\